12-Нөвәтлик хәлқаралиқ түрк дуняси йеза игилик йәрмәнкисидә уйғурлар тонутулмақта

Мухбиримиз әркин тарим
2017-03-10
Елхәт
Пикир
Share
Принт
12-Нөвәтлик хәлқаралиқ түрк дуняси йеза игилик йәрмәнкисигә қатнашқан уйғурлар
12-Нөвәтлик хәлқаралиқ түрк дуняси йеза игилик йәрмәнкисигә қатнашқан уйғурлар
RFA/Erkin Tarim


Түркийәниң оттура райониға җайлашқан уйғурлар әң көп олтурақлашқан қәйсәри шәһиридә өткүзүлгән 12-нөвәтлик хәлқаралиқ түрк дуняси йеза игилик мәһсулатлири йәрмәнкисидә уйғур мәдәнийити вә уйғурларниң бүгүнки вәзийити тонутулмақта.

Қәйсәри вилайәтлик йеза игилик идариси билән әтләс йәрмәнкә ширкити ортақ уюштурған бу йәрмәнкигә қазақистан, қирғизистан, өзбекистан, әзәрбәйҗан вә түркийә қатарлиқ 14 дөләттин 1900 йеза игилик вә чарвичилиқ ширкити бөлүм ечип йеза игилик мәһсулатлирини тонутмақта. Уйғурларға вакалитән қәйсәридә паалийәт елип бериватқан шәрқий түркистан мәдәнийәт вә һәмкарлиқ җәмийити мәхсус бөлүм ечип, уйғур мәдәнийитини тонутқандин сирт, хитай һөкүмитиниң уйғурларға елип бериватқан бесим сиясити әкс әттүрүлгән рәсим вә лозункиларни есип түркийәдә уйғурлар тоғрисида нәшр қилинған китаб-журналларни қоюп, уйғурларниң һазирқи ечинишлиқ вәзийитини тонутмақта. Булардин башқа, йәрмәнкә мәйданиға тонур селип, уйғур нанлирини сетип уйғур мәдәнийити тонутулмақта. Қәйсәри вилайәтлик йеза игилик вә чарвичилиқ идариси мудири өзкан әпәнди бәргән мәлуматқа асасланғанда, 3-айниң 9-күнидин 12-күнигичә өткүзүлидиған түрк дуняси йеза игилик йәрмәнкисини 12 йилдин бери өткүзүватқан болуп, кейинки үч йилда пәқәтла түркий җумһурийәтлири вә түркий милләтләрниң ширкәт вә җәмийәтлири қатнишиватмақта. Йәрмәнкиниң ечилиш мурасими уйғур бөлүмидә ечиливетипту. Биз йәрмәнкә тоғрисида мәлумат игиләш үчүн бу йәрмәнкини уюштурған қәйсәри вилайәтлик йеза игилик идариси мәсули өзқан қаяҗан әпәнди, әтләс йәрмәнкичилик ширкити мәсули вә бу йәрмәнкигә қатнишиватқан уйғурлар билән телефон сөһбити елип бардуқ.
turkiye-turk-dunyasi-yeza-igilik-yermenkisi-2017-2.jpg
Өзқан қаяҗан әпәнди түрк дуняси йеза игилик йәрмәнкиси тоғрисида мәлумат берип мундақ деди: «биз 12-қетимлиқ йеза игилик йәрмәнкисини өткүзиватимиз. Кейинки 3 йилдин бери түрк дуняси қериндаш милләтләр йеза игилик йәрмәнкиси дәп исмини өзгәрттуқ. Пүтүн түркий милләтләрдин қериндашлиримиз кәлди, қәйсәридә меһман қиливатимиз. Бу йәрмәнкини ечиштики мәқситимиз барлиқ қериндаш милләтләрниң йеза игиликтики йеңилиқлирини пүтүн дуняға көрситиш. Түркий милләтләрниң йеза-игилик вә мәдәнийәтлирини түрк хәлқигә көрситиш, өз-ара һәмкарлиқни күчәйтиштин ибарәт.»

Өзқан қаяҗан әпәнди түрк дуняси йеза игилик йәрмәнкисидә уйғурларға мәхсус бөлүм ечип орун бериватқанлиқини, ечилиш мурасимида рәһбәрләрниң биринчи болуп уйғур бөлүмини екискурсийә қиливатқанлиқини баян қилип мундақ деди: «биз һәр йили уйғур бөлүми ечиватимиз. Ечилиш мурасимиға кәлгәнләргә уйғур бөлүмини екискурсийә қилдуруватимиз. Йәрмәнкидә уйғур тамақлириниң һәммини қилип, кәлгәнләргә тәмини татқузиватимиз. Мушу арқилиқ уйғур мәдәнийити вә бүгүнки вәзийитини тонутиватимиз. Мухбирларниң уйғурларға қизиқишиму бәкла юқири, түнүгүн германийәдә тарқитиливатқан бир телевизийә нәқ мәйдандин уйғур бөлүмини тонуштурди.

Бу паалийәткә қатнашқан шәрқий түркистан мәдәнийәт вә һәмкарлиқ тәшкилатиниң баянатчиси абдулқадир түмтүрк әпәнди 12-нөвәтлик түрк дуняси йеза игилик йәрмәнкисиниң ечилиш сөзини қәйсәри валиси сулайман қамча әпәндиниң қилғанлиқини, уйғурларни тонутидиған чоң бир зал йәни бөлүм бәргәнликини баян қилди.
turkiye-turk-dunyasi-yeza-igilik-yermenkisi-2017-3.jpg
Йәрмәнкидә уйғур ненини йеқип сетиватқан ели навай йәрмәнкигә кәлгән кишиләрниң уйғур ненини яхши көрүп еливатқанлиқини, түрк нени билән уйғур нениниң пәрқини баян қилди.

Абдулқадир түмтүрк әпәнди бу паалийәттә йүз миңлиған кишигә уйғур мәдәнийитини тонуштуруш пурсити барлиқини, наһайити паалийәт үнүмлүк болуватқанлиқини тәкитлиди.

Хәлқаралиқ йеза игилик мәһсулатлири йәрмәнкиси 12 йилдин бери өткүзүлүп кәлмәктә болуп, уйғурлар 10 қетим мәхсус бөлүм ечип қатнишип, уйғурларниң мәдәнийитини вә бүгүнки ечинишлиқ вәзийитини тонуштурған.


Пикирләр (0)
Share
Толуқ бәт