Almatada qazaqistan türkiy xelqliri yashlirining dunyawi birinchi qurultiyi ötti

Qazaqistan türkiy xelqliri yashlirining dunyawi birinchi qurultiyidin körünüsh. 2014-Yili 18-yanwar, almata.

18-Yanwarda almata shehiride türkiy xelqler medeniy fondining uyushturushi, “Köchmenler mirasi” xelq'araliq ammiwi fondining qollap-quwwetlishi bilen qazaqistan türkiy xelqliri yashlirining dunyawi birinchi qurultiyi ötti.

Qazaqistanda yashawatqan her xil türkiy xelqlerning yash wekilliri qatnashqan mezkur murasimda kirishme nutuq bilen sözge chiqqan türkiy xelqler medeniy fondining prézidénti ehmet daghduran, “Köchmenler mirasi” xelq'araliq ammiwi fondning prézidénti séydomar batirjan, “Turan dunyasi” ammiwi fondining prézidénti karlin mexpiroflar köpligen türkiy xelqler wekilliri yashawatqan qazaqistandiki milletler dostluqi, milliy razimenlik we birlik heqqide öz pikirlirini otturigha qoyup, bu qedriyetlerni saqlashta yashlarning élip bériwatqan pa'aliyetlirini hem kelgüsi wezipilirini alahide tekitlidi.

Murasimda, türkiy xelqler medeniy fondi yashlar ittipaqi re'isi banu düysébay qizi shundaqla xazar, türkmen, özbék, Uyghur, xaqas, qirim tatarliri, qirghiz we bashqimu türkiy xelqler wekilliri öz doklatliri bilen sözge chiqti. Yighin jeryanida türkiy xelqlerning naxsha-muzikiliri ijra qilindi.

Radi'omiz ziyaritini qobul qilghan türkiy xelqler medeniy fondining prézidénti ehmet daghduran, mezkur qurultaygha qatnashquchi Uyghur wekilliridin biri, yash sha'ir abduljan aznibaqiyéf qurultay heqqide öz tesiratini otturigha qoydi.