Түркийә баш министири әһмәт давутоғлу: әнқәрәдики террорлуқ һуҗумини сүрийәлик елип барған

Мухбиримиз әркин тарим
2016-02-18
Share
turkiye-partlash-salih-neccar-nejjar.jpg 17 - январ күнидики әнқәрә партлаш вәқәсидики гумандар салиһ нәҗҗар
RFA/Erkin Tarim

17 - январ күни түркийәниң пайтәхти әнқәрәниң мәркизигә җайлашқан түркийә армийәси баш штаби бинаси, һава армийәси қоманданлиқи вә қуруқлуқ армийәси баш қоманданлиқи җайлашқан йолда кетиветип қизил чирағда турған 5 һәрбий аптомобилниң дәл оттурисиға киргән бомба қачиланған аптомобил террорчилар тәрипидин партлитилди. Вәқәдә 27 һәрбий, 1 пуқра өлди. Түркийә баш министири әһмәт давутоғлу түркийә армийәси баш штабида мәзкур вәқә тоғрисида баянат берип, мәзкур һуҗумни қилған террорчиниң сүрийәлик салиһ нәҗҗар икәнликини ашкарилиди.

У мундақ деди: "бүгүн игилигән мәлуматларға асаслинип туруп, бу һуҗумни түркийәдики террор тәшкилати әзалири билән сүрийәдин кәлгән й п г террор тәшкилатиға әза бириниң қилғанлиқи ениқланди. Өзини өлтүрүвелиш һуҗумини қилған салиһ нәҗҗар исимлик, амуда 1992 - йили туғулған. Амуд сүрийәниң шималидики бир шәһәр. Террорлуқ һуҗумни й п г тәшкилатиниң қилғанлиқи ениқ оттуриға чиқирилди. Җамаәт хәвпсизлик хадимлиримизниң таң атқичә елип барған мәзкур әнзини ениқлаш хизмити нәтиҗисидә 9 киши қолға елинди, бу һуҗум билән мунасивити болған пүтүн кишиләр оттуриға чиқирилип сотқа чиқирилиду. Дөлитимиз ичидики п к к террор тәшкилати билән сүрийәниң шималидики әсәд һакимийити билән тил бириктүрүп келиватқан й п г тәшкилатиниң дөлитимизгә қарши һәрикәт елип бериватқанлиқи ениқ болди."

Түркийә баш министири әһмәт давутоғлу түркийәниң әтрапиниң муқимсиз дөләтләр билән толғанлиқини баян қилип мундақ деди: "қиммәтлик хәлқимгә шуни чақириқ қилимәнки, түркийә һазир мурәккәп бир йәрдә. Түркийәниң әтрапида муқимсиз 6 - 7 дөләт мәвҗут. Биқинимизда сүрийә билән ирақ, шималимизда украина, түнүгүн дөлитимизгә зиярәткә кәлгән йәмән, ливийә вә ливан қатарлиқ дөләтләрниң земининиң бир қисми һөкүмәтлириниң башқуруши астида әмәс. Булар дөлитимизгә хәвп елип кәлмәктә. Буларниң дөлитимизниң муқимлиқиға, хәлқимизниң бихәтәрликигә сәлбий тәсир көрсәтмәслики үчүн күч чиқириватимиз."

У баянатиниң ахирида дуня дөләтлиригә чақириқ қилип мундақ деди: "ахирқи чақириқим шу, й п г террор тәшкилати түнүгүнки һуҗуми арқилиқ п к к бөлгүнчи террор тәшкилати билән бирликтә түркийәниң дүшмини икәнликини йәнә бир қетим оттуриға қойди. Бизниң иттипақдаш дөләтлиримизгә вә башқа террорға қарши күрәш қиливатқан дөләтләрниңму бу террор тәшкилатиға болған позитсийисини ениқ оттуриға қоюшини тәләп қилимиз. Түркийәниң дүшмини болған бу тәшкилатларни биваситә вә васитилик һалда қоллиған дөләтләр биз билән болған достлуқини йоқитип қоюши мумкин. Пайтәхтимизгә террор һуҗуми елип барған бундақ тәшкилатларни кәчүрүшимиз мумкин әмәс. Мән түркийә армийәси баш штабиға сәвр тиләймән."

Бир мухбирниң "түркийәниң пайтәхти әнқәрәдә елип берилған террорлуқ һуҗумда 28 киши қаза тапти, 61 киши яридар болди. Буни сүрийәниң шималидики п й д террор тәшкилатиниң қилғанлиқини дедиңиз, сүрийәниң шималиға һәрбий һуҗум елип бармақчиму ?" дегән соалиға әһмәт давутоғлу мундақ җаваб бәрди: "түнүгүн кәч 9 йеримдин тартип һафтанин әтрапида бөлгүнчи террор тәшкилатиниң лагерлириға қарита һәрбий һәрикәт елип бардуқ. Бу йәрдә 70 әтрапида террорчи өлтүрүлди. Бу шималий ирақта елип берилди. Сүрийәдики й п г террор тәшкилати вә әсәд һөкүмити армийәсигә қарши топ оқи етишимиз давамлишиватиду. Дөлитимизниң земиниға ким таҗавуз қилса, униңға қарши турушни давам қилимиз."

Баш министир әһмәт давутоғлу бу қетимқи террорлуқ һуҗумни сүрийәлик п й д әзаси билән п к к дәп аталған корт қораллиқ күчлириниң қилғанлиқини, буларни террор тәшкилати демигән дөләтләр билән түркийәниң дост болалмайдиғанлиқини тәкитлиди. Америка вә явропа дөләтлиригә охшаш нурғун дөләтләр п к к ни террор тәшкилати дәп елан қилған болсиму, хитай дөлити п к к ни техиғичә террор тәшкилати демигән. Бу һәқтә зияритимизни қобул қилған доктор әркин әкрәм әпәнди, түркийә шәрқий түркистан ислам һәрикитини террор тизимликкә киргүзгән болсиму, хитайниң улар билән мунасивити барлиқини баян қилди.

Түркийә истратегийәлик чүшәнчә институти мутәхәссиси доктор әркин әкрәм әпәнди хитайниң бу тәшкилатни террор тәшкилати дәп елан қилмаслиқидики сәвәб тоғрисида тохталғинида, хитайниң корт вә сүрийә сияситиниң түрк, хитай мунасивитигә сәлбий тәсир көрситидиғанлиқини илгири сүрди.

17 - январ күнидики вәқә йүз берип узун өтмәй, америка қошма штатлири башчилиқида нурғун дөләт рәһбәрлири түркийә җумһур рәиси әрдоғанға телефон қилип һал сориған вә террорни әйиблигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт