Istanbuldiki Uyghur musapirlar herqaysi döletlerdiki Uyghur qérindashlirining iqtisadiy yardimini kütmekte

Yéqinqi yillardin béri her xil yollar bilen türkiyege kélip olturaqlishiwatqan Uyghurlarning sani künsayin köpeymekte. Biz igiligen melumatlargha qarighanda, kéyinki birqanche ay ichidila 4 - 5 ming Uyghur istanbulgha yétip kelgen. Bularning ichide köp sanda yoqsul insan bar bolup, ular qish kirip qalay dégen bügünki künde istanbulda qéyin ehwalda turmush köchürmekte. Gerche bezi türk ammiwiy teshkilatliri bilen sherqiy türkistan ammiwiy teshkilatliri yardem qiliwatqan bolsimu, bular yéterlik emes iken.

Sherqiy türkistan medeniyet we hemkarliq jem'iyiti re'isi hidayetullah oghuzxanning éytishiche, bu Uyghurlarning köpi ikki - üch a'ile bir öyde turuwatqan bolup, her küni 50 - 60 Uyghur doxturxanining aldigha kélip dawalinish üchün öchret saqlaydiken. Bezi doxturxanilar Uyghurlarni heqsiz dawalawatqan bolsimu, Uyghurlarning köpi pulsizliqtin dawalinalmaydiken. Hidayetullah oghuzxan ependi radi'omizgha bergen bayanatida bundaq bir weziyette türkiyediki we dunyaning herqaysi jayliridiki Uyghurlarning musapir Uyghurlargha yardem qilishi kéreklikini, chünki bulargha yardem qilishning herbir Uyghurning diniy we milliy burchi ikenlikini tekitlidi. U, sözining axirida bu Uyghurlargha yardem qilishni xalighan Uyghurlar türkiyediki herqandaq bir teshkilat we shexis bilen alaqe ornatsa, musapir Uyghurlarni tapalaydighanliqini, yardem béreleydighanliqini éytti.