تۈركىيە ئۇيغۇرلارنىڭ جازا لاگېرلىرىغا قامىلىشى مەسىلىسىدە خىتاينى قاتتىق ئەيىبلىدى

مۇخبىرىمىز ئالىم سەيتوف
2019.02.09
Share on WhatsApp
Share on WhatsApp
Erdoghan.jpg تۈركىيە جۇمھۇرىيىتى پرېزىدېنتى رەجەپ تايىپ ئەردوغان.
Social Media

تۈركىيە تاشقى ئىشلار مىنىستىرلىقى شەنبە كۈنى بايانات ئېلان قىلىپ، خىتاي ھۆكۈمىتىنىڭ بىر مىليوندىن ئارتۇق ئۇيغۇرلارنى جازا لاگېرلىرىغا سولىغانلىقىنى قاتتىق ئەيىبلەپ، بۇنى «ئىنسانىيەت ئۈچۈن بىر بۈيۈك نومۇس» دەپ بىلدۈردى.

تۈركىيە تاشقى ئىشلار مىنىستىرلىقى باياناتچىسى ھامى ئاكسوي، «بىر مىليوندىن ئارتۇق ئۇيغۇر تۈركلىرىنىڭ جازا لاگېرلىرىغا ۋە تۈرمىلەرگە خالىغانچە تۇتۇلۇپ، تەن جازاسىغا ئۇچرىشى ۋە كاللىسىنىڭ سىياسىي جەھەتتىن يۇيۇلۇشى ھازىر بىر مەخپىيەتلىك ئەمەس. بىز خىتاي ھۆكۈمىتىنىڭ ئۇيغۇر تۈركلىرىنىڭ ئاساسلىق ھەق-ھوقۇقلىرىنى ھۆرمەت قىلىشىنى ۋە جازا لاگېرلىرىنى تاقىۋېتىشىنى تەشەببۇس قىلىمىز» دېدى. 

باياناتچى ھامى ئاكسوي سۆزىدە يەنە، ئۇيغۇر تۈركلىرىنىڭ خىتاي ھاكىمىيىتى قولىدا ئۇزۇن يىللاردىن بۇيان سىياسىي بېسىمغا، شۇنداقلا سىستېمىلىق ئاسسىمىلاتسىيەگە ئۇچراپ كېلىۋاتقانلىقىنى ئالاھىدە تەكىتلەپ ئۆتتى.

تۈركىيە ھۆكۈمىتى خىتاي دائىرىلىرى ئۇيغۇرلارنى مىليونلاپ جازا لاگېرلىرىغا سولىغان ئىككى يىلغا يېقىن ۋاقىت جەريانىدا بۇ مەسىلە ئۈستىدە سۈكۈتتە تۇرۇۋالغان بولسىمۇ، ئەمما مۇھاجىرەتتىكى ئۇيغۇرلار تۈركىيەنىڭ شەنبە كۈنى خىتاينى ئەيىبلەپ ئېلان قىلغان باياناتىدىن سۆيۈندى. دۇنيا ئۇيغۇر قۇرۇلتىيى تۈركىيەنىڭ بۇ مەيدانىدىن مەمنۇن بولۇپ، ئەردوغان ھۆكۈمىتىنىڭ بۇ مەسىلىنى بىرلەشكەن دۆلەتلەر تەشكىلاتىغا كۆتۈرۈپ چىقىشى، شۇ ئارقىلىق خىتايدىكى جازا لاگېرلىرىدا تۇتۇپ تۇرۇلۇۋاتقان مىليونلىغان ئۇيغۇرلارنىڭ قويۇپ بېرىلىشىنى قولغا كەلتۈرۈشكە چاقىرىق قىلدى.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.