Türk metbu'atliri sériqbuya weqesige keng kölemde orun berdi

Türk axbarat wasitiliri maralbéshidiki sériqbuya saqchixanisining yene hujumgha uchrap, 11 kishining ölgenlik xewirige keng kölemde orun berdi. Türkiyening eng chong dölet téléwiziyisi bilen shexsiy téléwiziye istansilirining hemmisi dégüdek “Sherqiy türkistanda yene qan töküldi”, “Sherqiy türkistan yene qalaymiqan boldi”, “Sherqiy türkistanda yene weqe chiqti”, “Sherqiy türkistandiki Uyghur türkliri yene saqchixanigha hujum qildi” dégen'ge oxshash témilarda uchur tarqatti.

Bulardin bashqa türkiyediki “Yéngi asiya”, “Yawropa bülteni”, “Dunya bülteni” we “Yéngi chagh” gézitlirige oxshash köp sanda tor gézitlirimu sériqbuya weqesi toghrisida tepsiliy xewer berdi. Emma türk hökümitining bu heqte bayanat élan qilmighanliqi türkiyediki sherqiy türkistan ammiwi teshkilatlirining naraziliqini qozghimaqta.

Türkiyening axbarat wasitiliride maralbéshining sériqbuya saqchixanisining yene hujumgha uchrighanliqi, weqede saqchilardin ikki, hujumchilardin 9 bolup, jem'iy 11 kishining ölgenliki heqqide xewer bérilgendin kéyin d u q ning mu'awin re'isi séyit tümtürk ependi türkiye tashqi ishlar ministirliqi, türkiyening eng chong öktichi partiyiliridin jumhuriyet xelq partiyisi we milletchi heriket partiyisige sériqbuyida meydan'gha kelgen weqeler toghrisida melumat berdi.

Tepsilatini yuqiridiki awaz ulinishidin anglighaysiler.