باراك ئوباما دېموكراتلار پارتىيىسىنىڭ پرېزىدېنت نامزاتلىقىنى قوبۇل قىلدى

 ئوباما ئامېرىكا تارىخىدا بۇ نۆۋەتلىك پرېزىدېنتلىقنى تالىشىدىغان ئىككى پارتىيىنىڭ بىرى تەرىپىدىن تۇنجى قېتىم نامزاتلىققا كۆرسىتىلگەن ئافرىقا ئىرقىدىكى ئامېرىكىلىقتۇر. ئۇ نۇتۇقىدا ھەر بىر ئامېرىكىلىقنىڭ ئامېرىكا غايىسىنى ئەمەلگە ئاشۇرۇشىغا ئوخشاش پۇرسەت بىلەن تەمىنلەيدىغانلىقى، ئامېرىكا ئىقتىسادىدىكى چېكىنىشنى ئوڭشايدىغانلىقى ۋە ئامېرىكىنىڭ خەلقئارا ئورنىنى تەكرار تىكلەيدىغانلىقىنى بىلدۈردى.

ئوباما يەنە پرېزىدېنت بۇشنىڭ سىياسىتىنى تەنقىد قىلىپلا قالماي، جۇمھۇرىيەتچىلەر پارتىيىسىنىڭ پرېزىدېنت نامزاتى جون مىكېيننى تەنقىد قىلىپ، مىكېيىننىڭ بۇش ھاكىمىيەت سورىغان 8 يىل جەريانىدا بۇشنىڭ سىياسىتىنىڭ %90 نى قوللىغانلىقىنى ئەيىبلىدى. ئۇ" ئۆتكەنكى 8 يىلدا بىزنىڭ ئەھۋالىمىز ھازىرقىدىن ياخشى بولۇشى كېرەك ئىدى. دۆلىتىمىزنىڭ ئەھۋالى ھازىرقىدىن ئوبدان بولۇشى لازىم ئىدى،" دەپ كۆرسەتتى.

ئوبامانىڭ پەيشەنبە كۈنى دەنۋېر شەھىرىدىكى ئىنۋەسكو تەنتەربىيە مەيدانىدا سۆزلىگەن نۇتقى ئامېرىكا خەلق ھوقۇقى ھەرىكىتىنىڭ رەھبىرى مارتىن لۇتېر كىڭنىڭ 1963 ‏ - يىلى "مېنىڭ بىر غايەم" دېگەن مەشھۇر نۇتۇقىنى ئېلان قىلغان كۈن بىلەن ئوخشاش بىر كۈنگە توغرا كەلدى.

ئوباما بۇ نۆۋەتلىك سايلامنىڭ تارىخىي ئەھمىيىتىنى ئەسكەرتىپ " بۇ مىنۇتلار ‏ - بۇ قېتىمقى سايلام بىز ئۈچۈن 21 - ئەسىردە ئامېرىكا ۋەدىسىنىڭ مەۋجۇتلۇقىنى ساقلىشىمىزدىكى بىر پۇرسەت،" دەيدۇ. دېموكراتلار رىقابەتچى پارتىيە جۇمھۇرىيەتچىلەرنىڭ دۆلەتلىك قۇرۇلتىيى كېلەر دۈشەنبە كۈنى مىننېسوتا شتاتىنىڭ مىئانناپىئولىس شەھىرىدە ئېچىلىدۇ.