Президент буш бейҗиңда ибадәт паалийитигә қатнишип, хитайни диний әркинликтин қорқмаслиққа чақирди

 Буш бу сөзләрни йәкшәнбә күни бейҗиңдики куанҗйе черкавиниң диний ибадәт паалийитигә қатнашқанда тәкитлигән болуп, буш куанҗйе черкавида хитай христиан балиларниң йәкшәнбилик диний хорини аңлиған вә балилар билән хатирә рәсимгә чүшкән иди. У мундақ дәйду: "бу шуни көрситидуки, тәңри болмиған йәр мәвҗут әмәс. Һәр қандақ дөләт, һәр қандақ шәхс адәмгәрчиликни өгитидиған динниң тәсир күчидин қорқмаслиқи керәк."

 Лекин шу күни хитай сақчилар куанҗйе черкавидики ибадәткә қатнашмақчи болған бейҗиңдики бир йәр асти протестант черкавиниң мәсули лю хуйчини паалийәткә қатнаштурмай тутуп кәткән. Лю хуйчиниң аилә тавабатидикиләр, лю хуйчиниң куанҗйе черкавидики йәкшәнбилик ибадәт паалийитигә кетиватқанда сақчилар тәрипидин тутуп кетилгәнликини, униң һазирға қәдәр қоюп берилмигәнликини билдүргән.

Хәвәрләргә қариғанда, лю хуйчи куанҗйе черкавида чөмүлдүрүлгән болуп, у президент буш билән учришип қелиш үмидини көңлигә пүкүп йәкшәнбилик ибадәтни мәзкур черкавда өткүзмәкчи болған икән. Буш куанҗйе черкавида ибадәткә қатнашқан шу күни йәнә хитай дөләт рәиси ху җинтав билән көрүшүп, кишилик һоқуқ вә башқа сәзгүр мәсилиләр үстидә сөһбәт өткүзгән.