رۇسىيە - خىتاي ئارىسىدا چېگرا كېلىشىمى ئىمزالاندى
مۇخبىرىمىز جۈمە خەۋىرى
2008.07.21
2008.07.21
كېلىشىم ئىمزالاش مۇراسىمى خىتاي پايتەختى بېيجىڭدا ئۆتكۈزۈلگەن بولۇپ، كېلىشىمگە رۇسىيە تاشقى ئىشلار مىنىستىرى سېرگېي لاۋروف ۋە خىتاي تاشقى ئىشلار مىنىستىرى ياڭ جيېچىلار ئىمزا قويغان.
فرانسىيە ئاگېنتلىقىنىڭ نەقىل ئېلىپ كۆرسىتىشىچە، رۇسىيە تاشقى ئىشلار مىنىستىرى سېرگېي لاۋروف مەزكۇر چېگرا كېلىشىمىنىڭ ئىمزالىنىشى، مۇقىملىق، ئۆز - ئارا مەنپەئەت ۋە ھەمكارلىققا شەرت ھازىرلايدىغانلىقىنى بىلدۈرگەن.
گەرچە كېلىشىمگە ئىمزا قويغۇچى ھەر ئىككى تەرەپ كېلىشىمنىڭ تولۇق مەزمۇنلىرى ئۈستىدە ھېچقانداق تەپسىلىي مەلۇمات بەرمىگەن بولسىمۇ، ئەمما خەۋەرلەردىن مەلۇم بولۇشىچە، رۇسچە تاراباروف دەپ ئاتىلىدىغان يىنلۇڭ ئارىلىنىڭ ھەممىسى ۋە بولشوي ئۇسسۇرىسكي يەنى خېيشىيازى ئارىلىنىڭ يېرىمى خىتايغا قايتۇرۇلىدىكەن.
رۇسىيە - خىتاي چېگرا دە - تالىشى چاررۇسىيە دەۋرىدىلا مەۋجۇت بولۇپ، ھەتتا 1960 - ۋە 70 - يىللاردا بۇ ئىككى دۆلەت ئارىسىدا قوراللىق توقۇنۇشلارمۇ يۈز بەرگەن ئىدى.