Саркозий бейҗиң олимпик йиғиниға қатнишидикән

" Франсийә лемонде" гезитиниң җүмә күни хәвәр қилишичә, хитайниң тибәттики бастуруш һәрикити түпәйли бейҗиң олимпик йиғинини байқут қилидиғанлиқини агаһландурған франсийә президенти саркозий, олимпик йиғининиң 8 ‏ - авғусттики ечилиш мурасимиға қатнашмақчи болған.
Мухбиримиз әркин хәвири
2008-07-04
Share

 Хәвәрләргә қариғанда, саркозий келәр һәптә японийидә чиқирилидиған G - 8 ләр йиғинида хитай дөләт рәиси ху җинтавға өзиниң олимпик мурасимиға қатнишидиғанлиқини билдүридикән.
Франсийә президент сарийидин алған учурларға асасән берилгән хәвәрдә, " николас саркозий олимпик йиғининиң 8 ‏ - авғусттики ечилиш мурасимиға қатнишиш үчүн бейҗиңға бармақчи," дәп тәкитлигән.

Саркозий илгири хитайниң тибәт мәсилисидики позитсийисигә қарап, олимпик йиғиниға қатнишиш яки қатнашмаслиқини қарар қилидиғанлиқини билдүргән иди. Саркозийниң президент сарийи җүмә күни бу һәқтики хәвәрләргә баһа беришни рәт қилған, лекин франсийә президентиниң келәр һәптә G - 8 ләр йиғинида өз қарарини елан қилидиғанлиқини тәкитлигән.

Саркозий дүшәнбә күни франсийиниң бир телевизийә қанилидики сөһбитидә, өзиниң қандақ қарарға келиши хитай билән далай лама арисидики сөһбәтниң илгирилишигә бағлиқ икәнликини илгири сүргән иди. Франсийә хитайниң тибәттики бастуруш һәрикитини әң шиддәтлик тәнқид қилған ғәрб дөләтлириниң бири болуп, олимпик мәшили парижда йәткүзүлгәндә зор көләмлик қаршилиққа дуч кәлгән.

Саркозийниң тибәт мәсилисидики мәйдани хитай пуқралирида өчмәнлик туйғусини күчәйтип, хитайдики франсийә дукини "кәрйфор" ниң маллирини байқут қилиш чақириқи әвҗ алған иди. Йеқинда елип берилған торда рай синаш нәтиҗисидин қариғанда %90 хитай саркозийниң олимпик йиғиниға қатнишишиға қарши икән.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт