دۇنيا سودا تەشكىلاتىنىڭ ئاپتوموبىل زاپچاسلىرى ئەرزىدە خىتاي ئامېرىكىغا ئۇتتۇرۇۋەتتى

 دۇنيا سودا تەشكىلاتى خىتايدىن " قالايمىقان ئۆلچەملەرنى بىكار قىلىپ... ئۆتەشكە تېگىشلىك مەجبۇرىيىتىنى قېلىپلاشتۇرۇش" نى تەلەپ قىلغان.

خىتاينىڭ بەلگىلىمىسىدە ئاپتوموبىل زاپچاسلىرىنىڭ ئاز دېگەندە %60 ى يەرلىكتىن تەمىنلىنىشى كېرەك ئىدى. ئەگەر ئىمپورت قىلىنغان زاپچاسلار بۇنىڭدىن ئېشىپ كەتسە، پۈتۈن بىر ئاپتوموبىلنىڭ ئىمپورت بېجى ئېلىناتتى. خىتاي ھۆكۈمىتى بۇ بەلگىلىمىنى ئاپتوموبىل ئىمپورت قىلىدىغان بەزى شىركەتلەرنىڭ باجدىن قېچىپ، ئاپتوموبىللارنى پارچىلاپ ئىمپورت قىلىشىدىن ساقلىنىشنى مەقسەت قىلغان، دەپ ئاقلىماقتا ئىدى.

لېكىن ئامېرىكا، كانادا ۋە ياۋروپا ئىتتىپاقى خىتاينىڭ بۇ بەلگىلىمىسى دۇنيا سودا تەشكىلاتىنىڭ بازارنى ئېچىۋېتىش توغرىسىدىكى مۇناسىۋەتلىك قائىدە - قانۇنلىرىغا خىلاپ، دەپ قاراپ ئەرز قىلغان. ۋەقەدىن خەۋەردار كىشىلەر، مەركىزى جەنۋەدىكى دۇنيا سودا تەشكىلاتىنىڭ بۇ دېلوغا ئالاقىدار ھۆكۈمىنى بۇ يىل 2 ‏ - ئايدا چىقارغانلىقى، لېكىن جۈمە كۈنى رەسمىي ئېلان قىلغانلىقىنى بىلدۈرمەكتە.

ئامېرىكا سودا ۋەكىلى سۇزان شۋاب، سودا تەشكىلاتىنىڭ " كۈچلۈك قارارى"دىن "ناھايىتى مەمنۇن " بولغانلىقىنى ئېلان قىلدى. ئۇ" بۇ قارار خىتاينىڭ ئامېرىكا ئاپتوموبىل زاپچاسلىرىنى چەتكە قېقىشىغا دۇنيا سودا تەشكىلاتى سىستېمىسى ئىچىدە ئورۇن يوقلۇقىنىڭ شەك - شۈبھىسىز ئىكەنلىكىنى كۆرسەتتى" دەيدۇ. لېكىن خىتاينىڭ دۇنيا سودا تەشكىلاتىنىڭ بىر كوللېگىيىسى تەرىپىدىن چىقىرىلغان بۇ قارارغا ئېتىراز بىلدۈرۈش، سودا تەشكىلاتىدىكى يۇقىرى دەرىجىلىك يەنە بىر كوللېگىيىسىگە ئەرز قىلىش ھوقۇقى بار.