فرانسىيە پرېزىدېنتى ساركوزىي خىتايغا مەھبۇسلار تىزىملىكى بىلەن بارغان

 فرانسىيە تاشقى ئىشلار مىنىستىرلىقى باياناتچىسىنىڭ ئەسكەرتىشىچە، پرېزىدېنت ساركوزىي بۇ تىزىملىكنى ياۋروپا ئىتتىپاقىنىڭ بۇ نۆۋەتلىك رەئىس دۆلىتىنىڭ رەھبىرى بولۇش سالاھىيىتى بىلەن ياۋروپا ئىتتىپاقىغا ۋاكالىتەن بېيجىڭغا تاپشۇرغان. تىزىملىكتىكىلەر ياۋروپا ئىتتىپاقى بىلەن خىتاي ئارىسىدىكى كىشىلىك ھوقۇق سۆھبىتىدە ئوتتۇرىغا قويۇلغان كىشىلىك ھوقۇق دېلولىرىدا ئىسمى تىلغا ئېلىنغان مەھبۇسلارنى ئۆز ئىچىگە ئالىدىغانلىقى ئېلان قىلىندى.

فرانسىيە تاشقى ئىشلار مىنىستىرلىقى بۇ خەۋەرنى ئېلان قىلىشتىن بۇرۇن پارىژ شەھەرلىك ساقچى ئىدارىسى، "ئولىمپىك مەشئىلى پارىژدىن ئۆتكەندە يۈز بەرگەن قالايمىقانچىلىقنىڭ تەكرار يۈز بېرىشىدىن ساقلىنىش ئۈچۈن كىشىلىك ھوقۇق تەشكىلاتلىرىنىڭ جۈمە كۈنى پارىژدىكى خىتاي ئەلچىخانىسى ئالدىدا نامايىش قىلىشىنى چەكلىگەن" ئىدى.

ساركوزىي دەسلەپ ئولىمپىك يىغىنىنى بايقۇت قىلىدىغانلىقىنى ئاگاھلاندۇرغان بولسىمۇ، لېكىن كېيىنرەك ئېچىلىش مۇراسىمىغا قاتنىشىدىغانلىقىنى بىلدۈرگەن. مەركىزى پارىژدىكى چېگرىسىز مۇخبىرلار تەشكىلاتى پەيشەنبە كۈنى تارقاتقان بىر ئېلانىدا خىتاي ھۆكۈمىتى تەرىپىدىن تۇتقۇن قىلىنغان ئۆكتىچى زاتلارنىڭ رەسىمىنى ئېلان قىلىپ، ساركوزىينى خىتايدىن بۇ كىشىلەرنى قويۇۋېتىشنى تەلەپ قىلىشقا چاقىرغان ئىدى.