Erzdarlarning telipi emgek jazasigha yol achti

 Merkizi nyuyorktiki junggo kishilik hoquq teshkilatining charshenbe küni bildürüshiche, béyjingliq erzdar wu bilen wang, sheherlik saqchi idarisigha, hökümet yolgha qoyghan rayonlarda namayish élip bérish heqqide iltimas sun'ghan bolup, saqchilar ularning heqliq iltimasigha yol qoyushning ornigha ularni emgek bilen terbiyilesh jazasigha tartqan.

Bu yil 79 yashqa kirgen wu bilen 77 yashqa kirgen wang, 2001 ‏ - yili hökümet teripidin mejburiy chéqiwétilgen öyliri üchün, namayish ötküzüsh heqqide hökümetke 5 qétim iltimas sun'ghan. Ruxsetke érishelmigen bu ikkeylen, 5 ‏ - awghust küni saqchi teripidin 10 sa'et tutup turulghandin kéyin, yéqinda béyjing sheherlik hökümet emgek bilen terbiyilesh orginining " ammiwi meydan tertipige buzghunchiliq qilghan" dégen bahane bilen chiqirilghan bir yilliq emgek bilen özgertish qararini tapshurup alghan.

Xitay da'irilirining, közi yaxshi körmeydighan, yol yürüshtimu nahayiti qiynilidighan wu momayni, mejburlash, tehdit sélish hemde emgek bilen özgertish jazasigha tartishtek qilmishlirini qattiq eyibligen junggo kishilik hoquq teshkilati, olimpik jeryanida namayish élip bérishqa yol qoyulghan meydanlarning saxta yasalghanliqini, buning tamamen xelq'ara jama'etni aldash üchün élip bérilghan oyundin ibaret ikenlikini mu'eyyenleshtürdi.