Хитай үч күн матәм тутушни елан қилди

 Ройтерс вә хитай ахбарат васитилирида нәқил кәлтүрүлүшичә, хитай дөләт ишлири кабинетиниң буйруқи бойичә бу күни пүтүн мәмликәттики вә чәтәлләрдики хитай органлиридики хитай дөләт байриқи йерим чүшүрүлиду. 19 - Май күни саәт 14 тин 28 минут өткәндә пүтүн хитай бойичә үч минут матәм билдүрүлиду, аптомобил, пойиз, парахот һәм башқа қатнаш қораллириниң сигналлири вә һавадин мудапиә көрүш сигналлири челиниду.

Шуниң билән бир вақитта йәнә хитай һөкүмити дағдуғилиқ өткүзүлүватқан олимпик мәшилиниму йәткүзүш паалийитини уч кун тохтитип қоюшқа мәҗбур болған.
Бу қетимқи йәр тәврәштә һазирға қәдәр 32 миңдин артуқ адәмниң өлгәнлики, өлүм әһвалиниң бәлки 50 миңға йетиши мумкинлики җәзим қилинмақта, һазир җиддий қутулдуруш ишлири давамлишиватиду. Буниңға һәтта японийә, русийә қатарлиқ дөләтләрниң қутулудуруш әтрәтлириму қатнашқан. Бу хитайниң тунҗи қетим апәткә учраш сәвәби билән матәм күни елан қилиши болуп һесаблинидикән.

 Йәкшәнбә күни йәнә америкиниң һавай арилидики тинч окян қоманданлиқ шитаби икки тошуш айропилани чиқирип, зор миқдардики ичимлик су, йемәклик, әдиял қатарлиқ мадди буюмларни сичүәнгә йәткүзгән. Бу айропиланлар чиңдуға йетип келип ярдәм буюмлирини чүшүрүп болуп қайтип кәткән.