Гуйҗода сақчилар билән пуқралар арисида тоқунуш йүз бәрди

 Б б с агентлиқиниң игилишичә, тоқунушқа сәвәб болған амил җамаәт хәвпсизлик орниниң бир қизни өлтүрүветиш вәқәсигә мунасивәтлик җинайәт гумандариниң делосини бир тәрәп қилишта адил болмиғанлиқ билән келип чиққан икән.

Шәнбә күни кәчтә гуйҗониң мәркизи гуйяң шәһириниң шималидики венан шәһиридә келип чиққан бу тоқунушта нарази болған пуқралар җамаәт хәвпсизлик идарисиниң бинасиға от қоювәткән. Америка авази радиосиниң түрлүк учур йоллири арқилиқ игилишичә, гуйҗониң һәр қайси җайлиридин 1500 нәпәр сақчи йөткәп келинип, намайишчиларни бесиқтурған болуп, тоқунуш җәрянида он миң әтрапида намайишчи пуқра җамаәт хәвпсизлик бинасини қоршивалған.

Җуңго кишилик һоқуқ учур мәркизиниң игилишичә, сақчи машинисини өз ичигә алған 20 аптомобил көйдүрүветилгән. Бир намайишчи сақчилар билән тоқунуш җәрянида өлтүрүлгән, 150 дин артуқ адәм яриланған. Йәкшәнбә күни вәзийәт тинчландурулған. Хәвәрләрдә көрситилишичә, 16 яшлиқ бир қиз үч нәпәр яш тәрипидин алдап елип кетилип, басқунчилиқ қилишқа учриған һәмдә улар тәрипидин өлтүрүветилгән.

Қатилларниң иккиси җамаәт хәвпсизлик даирилириниң туғқанлири болғанлиқи үчүн, улар гунаһсиз дәп қарилип қоюп берилгән. Бу вәқә пуқраларниң қаттиқ наразилиқини қозғиған икән.

Һазирғичә хитай һөкүмәт тәрәп вәқәниң җәряни һәққидә рәсмий учур тарқатмиған болсиму, лекин йәкшәнбә күни шинхуа агентлиқи венан наһийисидә уруп чеқиш вәқәсиниң тинчландурулғанлиқи һәққидә қисқа хәвәр тарқитип, һәқиқәтән шундақ ишниң болғанлиқини етирап қилған. Вәқәниң тәпсилатини кишилик һоқуқ паалийәтчилири түрлүк йоллар билән игиләп, сиртқа тарқатқан.