Sabiq xitay re'isi xu'a goféng üchün depne murasimi ötküzüldi

Mawzédongdin kéyin xitayni qisqa muddet idare qilip, siyasiy sehnidin ghayip bolghan sabiq xitay rehbiri xu'a goféng üchün 31 - awghust küni béyjingdiki mexsus xitay kompartiyisining rehberliri depne qilinidighan babawshen qebristanliqida depne murasimi ötküzüldi.
Muxbirimiz ümidwar xewiri
2008.08.31

 Xitayning shinxu'a agéntliqining xewer qilishiche, depne murasimigha xu jintaw, wén jyabaw hemde sabiq xitay rehberliridin jang zémin, ju rongji qatarliqlar qatnashqan. Xu jintaw xu'a goféngni "uzun mezgil sinaqtin ötken sadiq kommunizm jengchisi we prolétariyat inqilabchisi" dep atighan.

Xewerde körsitilishiche, xu'a goféng 20 - awghust küni 87 yéshida béyjingda késel sewebidin wapat bolghan bolsimu, emma téxi hazirghiche depne murasimi ötküzülmigen idi.

Xu'a goféng 1976 - yili maw ölgendin kéyin uning wesiyiti boyiche xitayning eng aliy rehbirilik ornigha chiqqan bolup, 1980 - yili déngshyawping terepdarliri teripidin texttin chüshürülgendin buyan partiye merkiziy komitétidiki ezaliq orni saqlinip qélin'ghan bolsimu, lékin siyasiy sorunlardin orun almay, kishiler üchün sirliq tüs alghan idi.

Chet'ellerdiki xitay metbu'atlirida xu'a goféngning kimliki heqqide türlük uchurlar we matériyallar élan qilinip, uning 70 - 80 - yillardiki maw zédongning ölümidin kéyinki xitay aliy rehberlik qatlimidiki hoquq kürüshining qurbani bolghanliqi, hetta uning eslide mawzédongning naresmiy ayalidin bolghan oghli ikenlikige a'it qiyaslar otturigha qoyuldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.