6 نەپەر خىتاي ساقچىسىنى ئۆلتۈرگەن ياڭ جياغا ئۆلۈم جازاسى بېرىلدى

 خەۋەردە كۆرسىتىلىشىچە، بۇ يىل 28 ياشلىق ياڭ جياغا قەستەن ئادەم ئۆلتۈرۈش جىنايىتى ئارتىلغان بولۇپ، سوت ھۆكۈمى شاڭخەي شەھەرلىك 2 - سوت مەھكىمىسى تەرىپىدىن چىقىرىلغان.

خەۋەردە كۆرسىتىشىچە، سوت مەھكىمىسى ياڭ جيانىڭ روھىي ساغلاملىقى ئۈستىدىنمۇ تەكشۈرۈش ئېلىپ بارغان ھەمدە ئۇنىڭ روھىي جەھەتتە ساغلام ئىكەنلىكىنى بېكىتكەن بولۇپ، ياڭ جيامۇ ئۆزىنىڭ ئادەم ئۆلتۈرۈش جىنايىتىنى ئىقرار قىلغان.

خىتاي ساقچى دائىرىلىرىنىڭ باياناتىغا قارىغاندا، بۇ يىل ئىيۇلنىڭ بىرىنچى كۈنى ياڭ جيا پىچاق، بولقا ۋە پارتلاتقۇچ دورىلارنى كۆتۈرگەن ھالدا شاڭخەي شەھىرى جابېي رايونلۇق ساقچىخانىسىغا ھۇجۇم قىلغان ۋە 6 ساقچىنى پىچاق تىقىپ ئۆلتۈرگەندىن كېيىن 4 نەپىرىنى ئېغىر يارىلاندۇرغان.

ساقچىلارنىڭ بىلدۈرۈشىچە، ئۇ ئالدىنقى يىلى ۋېلىسىپىت ئوغرىلاش گۇماندارى سۈپىتىدە مەزكۇر ساقچىخانا تەرىپىدىن تەكشۈرۈلگەن بولغاچقا، شۇڭا ئۇ بۇ ھۇجۇمنى ساقچىلاردىن ئۆچ ئېلىشى ئۈچۈن ئېلىپ بارغان ئىكەن.

چەتئەللەردىكى خىتاي ئۆكتىچىلىرى ياڭ جيانى قەھرىمان ساناپ ياڭ جيا پالۋان دەپ ئاتاشقان ئىدى.