Ғуламидин пахтаниң һаяти (16): өйлинишим вә муһаҗирәттә өткән аилә һаятим

Мухбиримиз қутлан
2017.08.22
ghulamidin-paxta-ayali.jpg Ғуламидин пахта әпәнди билән аяли гүлнар ханим той қилған йиллири чүшкән сүрити. 1950-Йилларниң оттурилири, истанбул.
RFA/Qutlan

Һәр бир инсанниң һаятида өзигә хас муһәббәт кәчүрмиши вә романтик һес-туйғулири болиду.

Бу йил 87 яшниң қарисини алған ғуламидин пахта әпәндиму өз һаятидики муһәббәткә толған ашу сәһипиләрни әсла унталмайду. Бүгүнки күндә әслимиләр қайнимида яшаватқан ғуламидин әпәнди өзиниң яшлиқ баһаридики тунҗи гүзәл туйғуниң буниңдин 68 йил муқәддәм, йәни 1949-йилиниң кәчкүз күнлиридә кәшмирниң сиринагар дегән җайидики бир әзим булақ бойида ойғанғанлиқини тилға алиду.

Яш ғуламидин муһаҗирәт һаятиниң дәсләпки йили кәшмирдики түркистанлиқ муһаҗирлар су ичидиған бир булақ бойида бир кичик қизни учритиду. Түркистанчә кийим кийгән бу қизниң аилиси ғуламидин пахтаниң ата-бовилири билән йеқин мунасивити бар кишиләр болуп, улар ашу қетимлиқ һиҗрәттә қәшқәрдин айрилип һиндистанға кәлгән кишиләр икән.

Кәшмирдә 6 ай қалған ғуламидин пахта кейинчә сиринагардин бомбайға, у йәрдин 1951-йили түркийәгә кетиду. Аридин бирқанчә йиллар өтүп, яш ғуламидин әнқәрәдә оқуватқан йиллирида әйни вақитта кәшмирдики булақ бойида учратқан ашу гүзәл қизниң аилисиму түркийәгә көчмән болуп келиду. Ғуламидин пахта дадиси әхмәт пахта вә аилисидикиләр билән бирликтә истанбул пойиз истансисиға чиқип уларни күтүвалиду. Улар иккинчи қетим истанбулда йүз көрүшиду.

Шу йилларда ғуламидин пахта оқуш үчүн германийәгә кетиду. Оқуш пүттүргәндин кейин “азадлиқ радийоси” дики хизмәтләр билән алдираш болуп кетип, түркийәгә һәр икки йилда аран бир қетимдин келәләйду. У 1961-йилиниң күз күнлиридә түркийәгә туғқан йоқлап кәлгинидә дадиси әхмәт пахта униңға өйлиниш вә аилә қуруш тоғрилиқ гәп ачиду. Андин оғли ғуламидинни башлап истанбулдики түркистанлиқ муһаҗирлардин сәми ахунниң қорусиға меһман болушқа башлап бариду. Ача-сиңил чирайлиқ икки қиз меһманларға пәтнус билән чай елип чиқиду. яш ғуламидин һәйран болған һалда қизлардин биригә қариғиничә туруп қалиду. Бу қиз әйни вақитта у кәшмирдики булақ бойида учратқан қиз иди.

Аридин бирқанчә күн өткәндин кейин ғуламидин пахта билән гүлнар қизниң никаһ вә той мурасими өткүзүлиду. Бу түркийәгә йәрләшкән түркистанлиқ муһаҗирларниң 1960-йилларда истанбулда өткүзгән әң чоң той мурасимлиридин бири болуп қалиду. Той болуп үчинчи күни ғуламидин пахта аялини елип германийәгә қайтиду.

Шундин кейин ғуламидин әпәнди билән аяли гүлнар ханим йерим әсирдин артуқ аилә һаятини биргә өткүзиду. Уларниң инақ аилә һаяти түркийә, германийә вә ахирида америкада давамлишиду. Бир оғул вә бир қиз пәрзәнтлик болиду. Ғуламидин әпәнди зияритимиз җәрянида әр-аял иккийләнниң той қилғанлиқиниң 55 йиллиқ хатирисини техи йеқинда қутлиғанлиқини һаяҗан билән тилға алди.

(Давами бар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.