រំដួលកោះដាច់
ដោយ យី ឆេងអ៊ួ
2017.09.29
2017.09.29
ឱភូមិកោះដាច់ កោះឧកញ៉ាតី ឆោមស្រស់ពិសី ប៉ាក់ច្នៃក្រមា
ត្បាញហូលផាមួង ស្អាតដូចអប្សរា បងអ្នកទស្សនា ចិន្ដាស្រមៃ។
ភូមិភាគឦសាន នៃក្រុងភ្នំពេញ ចិត្តរៀមទន្ទេញ តែឈ្មោះស្រស់ស្រី
រំដួលកោះដាច់ ចំណេះប្រពៃ មានចិត្តភក្ដី ស្នាដៃដូនតា។
ស្រស់ស្រីសោភា រាំតាមបង្អួច ត្របាញ់ចិត្តកួច បំណងប្រាថ្នា
បង់ចិត្តស្រលាញ់ លើរំដួលផ្កា នៃជាតិខេមរា ផ្កាថែវប្បធម៌។
ព្រមស្ម័គ្របងចុះ មិនខុសទេស្រី បងអ្នកថ្លាថ្លៃ នៃក្រុងអង្គរ
ទីធ្លាប់ច្បាំងឈ្នះ ជោគជ័យបវរ យើងសាងបន្ត អង្គរជាតិខ្មែរ។
កំណាព្យនេះនិពន្ធដោយ យី ឆេងអ៊ួ។