មនុស្ស​៧​នាក់​ត្រូវ​ចាប់​ខ្លួន​ក្នុង​ជម្លោះ​រាំ​ធុង​បាស​នៅ​ខែត្រ​បាត់ដំបង

ជន​សង្ស័យ​៧​នាក់ ក្នុង​នោះ​មាន​ម្នាក់​ជា​ជន​ដៃ​ដល់​ក្នុង​ការ​បាញ់​សម្លាប់​មនុស្ស ត្រូវ​កម្លាំង​សមត្ថកិច្ច​ប៉េអឹម​ខេត្ត​បាត់ដំបង​កសាង​សំណុំ​រឿង​បញ្ជូន​ទៅ​តុលាការ​នៅ​ថ្ងៃ​២៥ កុម្ភៈ ដើម្បី​ចាត់ការ​តាម​ផ្លូវ​ច្បាប់ ក្រោយ​ពី​ចាប់​ខ្លួន​ពាក់ព័ន្ធ​ក្នុង​អំពើ​ឃាតកម្ម​សម្លាប់​មនុស្ស​កាល​ពី​យប់​ថ្ងៃ​ទី​២២ ខែ​កុម្ភៈ ឆ្នាំ​២០១០ ក្នុង​ជម្លោះ​នៃ​ពិធី​ចាក់​ធុង​បាស​រាំ​កម្សាន្ត។
ដោយ សួន សុផលមុន្នី
2010-02-25
អ៊ីម៉ែល
មតិ
Share
បោះពុម្ព

ជន​សង្ស័យ​ទាំង​នោះ​មាន​ឈ្មោះ គឹម សម្បត្តិ មេ​បញ្ជាការ​រង​កង​ល្បាត​ទី​១ នៃ​កង​ការពារ​ព្រំដែន​គោក ៥០២ ជា​ជន​ដៃ​ដល់ និង​ក្រុម​ក្មេង​ចំនួន ៦​នាក់​ទៀត​មាន​ឈ្មោះ សយ សេង, ឆាន យ៉ន, លឹម ធិ, ឡាច ថន, ណុប ធន និង យ៉ាន គង់។

លោក សូ ឌី នាយ​ការិយាល័យ​សន្តិសុខ​នៃ​ទី​បញ្ជាការដ្ឋាន​កង​រាជ​អាវុធ​ហត្ថ​ខេត្ត​បាត់ដំបង បាន​មាន​ប្រសាសន៍​ថា ជាមួយ​នឹង​ការ​បញ្ជូន​ជន​សង្ស័យ​ខាង​លើ​ទៅ​តុលាការ កម្លាំង​សមត្ថកិច្ច​កំពុង​តាម​ចាប់​មនុស្ស​ចំនួន ១៥​នាក់​ដែល​ជា​ភាគី​បង្ក​ជម្លោះ។

លោក សូ ឌី បាន​បញ្ជាក់​ថា ៖ «ម្សិលមិញ ថ្ងៃ​មិញ​ក៏​ខ្ញុំ​បន្ត​ទៅ​ដែរ ប៉ុន្តែ​វា​អត់​នៅ។ យើង​ស្គាល់​ផ្ទះ ស្គាល់​ឈ្មោះ​អស់​ហើយ នឹង​ឲ្យ​ស្រង់​សាវតារ​មក​ក្រោយ​ទៀត។ អ្នក​ទាំង​នេះ ព្រះរាជអាជ្ញា​ឲ្យ​បញ្ជូន​ទៅ​គាត់​សិន»

កាល​ពី​វេលា​ម៉ោង​១០​យប់​ថ្ងៃ​ទី​២២ ខែ​កុម្ភៈ ក្មេង​ស្ទាវ​២​ក្រុម ម្ខាង​មាន​គ្នា​ជិត ១០​នាក់ និង​ម្ខាង​ទៀត​មាន​គ្នា​ជាង ១០​នាក់ បាន​ឈ្លោះ​គ្នា​នៅ​ពេល​ចាក់​ធុង​បាស​រាំ​កម្សាន្ត​ក្នុង​ពិធី​បុណ្យ​មួយ​នៅ​ភូមិ​តាសាញត្បូង ឃុំ​តាសាញ ស្រុក​សំឡូត ខេត្ត​បាត់ដំបង។

ជន​សង្ស័យ​ទាំង ៦​នាក់​ដែល​ត្រូវ​កម្លាំង​កង​រាជ​អាវុធ​ហត្ថ​ចាប់​បញ្ជូន​ខ្លួន​ទៅ​តុលាការ​នោះ​បាន​ថ្លែង​ថា នៅ​ពេល​កំពុង​រាំ ស្រាប់​តែ​ភាគី​ជម្លោះ​ម្ខាង​ទៀត​ដែល​មាន​គ្នា​ជាង ១០​នាក់​ចូល​ទៅ​វ៉ៃ ៖ «គេ​វ៉ៃ​ខ្ញុំ​មុន ពេល​ចេញ​ពី​រាំ គេ​វ៉ៃ​ខ្ញុំ​ផាំង​តែម្ដង! ខ្ញុំ​មិន​ដឹង​មូលហេតុ​អី​ដែរ​បាន​គេ​វ៉ៃ! អត់​ដែល​មាន​រឿង​ជាមួយ​គេ​ផង​ហ្នឹង!»

លោក គឹម សម្បត្តិ មាន​តួនាទី​ជា​មេ​បញ្ជាការ​រង​កង​ល្បាត​ទី​១ នៃ​កង​ការពារ​ព្រំដែន​គោក ដែល​ជាប់​ចោទ​ជា​អ្នក​ប្រើ​កាំភ្លើង​បាញ់​សម្លាប់​មនុស្ស​នោះ បាន​ថ្លែង​ថា នៅ​ពេល​មាន​ការ​ឈ្លោះ​គ្នា លោក​បាន​ចូល​ទៅ​ឃាត់ តែ​ក្រុម​ក្មេង​មាន​គ្នា​ជាង ១៥​នាក់​មិន​ស្តាប់ ហើយ​ព្យាយាម​ដណ្តើម​កាំភ្លើង ទើប​លោក​បាញ់ ទើប​បណ្តាល​ឲ្យ​មាន​មនុស្ស​ម្នាក់​ស្លាប់ និង​ម្នាក់​ទៀត​រង​របួស។

លោក គឹម សម្បត្តិ បាន​អះអាង​ថា ៖ «អ៊ីចឹង​ខ្ញុំ​សម្រេច​ចិត្ត​ថា​បាញ់​ដើម្បី​រត់ បើ​ខ្ញុំ​មិន​បាញ់​ត្រូវ​ស្លាប់! បាញ់​អស់ ៣​គ្រាប់ គ្រាប់​ទី​១ បាញ់​ឡើង​លើ គ្រាប់​ទី​២ បាន​ខ្ញុំ​បាញ់​សំដៅ មិន​ដឹង​ត្រូវ​ឬ​អត់? បើ​ខ្ញុំ​មិន​បាញ់ វា​វ៉ៃ​ខ្ញុំ​សន្លប់ ហើយ​វា​យក​កាំភ្លើង​បាញ់​ខ្ញុំ​ស្លាប់ រួច​បាញ់​អ្នក​ដែល​វា​គុំ ពីព្រោះ​វា​ស្រវឹង​គ្រប់​គ្នា​ហើយ!»

ជន​រង​គ្រោះ​ដែល​ស្លាប់​មាន​ឈ្មោះ អឿន ឆាន់ ភេទ​ប្រុស អាយុ​៣៣​ឆ្នាំ មាន​មុខរបរ​ធ្វើ​ស្រែ រស់​នៅ​ភូមិ​អន្លង់ពួក ឃុំ​តាសាញ និង​អ្នក​រង​របួស​ម្នាក់​ទៀត​ឈ្មោះ សីល ស៊ូ ហៅ ធារ៉ា អាយុ ២៦​ឆ្នាំ ជា​យោធា​កង​ល្បាត​ទី​៦ នៃ​កង​ការពារ​ព្រំដែន ៥០២ មាន​ទី​លំនៅ​នៅ​ភូមិ​តាសាញត្បូង ឃុំ​តាសាញ ស្រុក​សំឡូត ខេត្ត​បាត់ដំបង ត្រូវ​ចំ​ដើម​ទ្រូង​របួស​ធ្ងន់ កំពុង​សង្គ្រោះ​បន្ទាន់​នៅ​មន្ទីរ​ពេទ្យ៕

ព័ត៌មាន (0)
Share
គេហទំព័រ​ទាំងមូល