មន្ត្រីនៃសាលាក្ដីខ្មែរក្រហមបញ្ជាក់ថា ការដោះលែងបណ្ដោះអាសន្ន មិនមានន័យថា រួចផុតពីការចោទប្រកាន់របស់ព្រះរាជអាជ្ញានៃសាលាក្ដីនេះឡើយ។
អង្គជំនុំជម្រះវិសាមញ្ញនៃតុលាការកម្ពុជា អាចនឹងដោះលែងអតីតមេដឹកនាំខ្មែរក្រហមដែលកំពុងមានកាយសម្បទាទន់ខ្សោយមួយរូបឲ្យនៅក្រៅឃុំជាបណ្ដោះអាសន្នដើម្បីព្យាបាលជំងឺវង្វេងវង្វាន់។
អ្នកនាំពាក្យនៃសាលាក្ដីខែ្មរក្រហម លោក នេត្រ ភក្ត្រា មានប្រសាសន៍ថា ក្រុមគ្រូពេទ្យជំនាញបានរកឃើញអ្នកស្រី អៀង ធីរិទ្ធ កំពុងមានជំងឺវង្វេងវងា្វន់យ៉ាងធ្ងន់ធ្ងរ ដែលមិនអាចចូលខ្លួនក្នុងសវនាការនាពេលខាងមុខនោះបានឡើយ។
លោក នេត្រ ភក្ត្រា៖ «ចៅក្រមនៃសាលាដំបូងបានរកឃើញរួមគ្នា ហើយបានឯកភាពរួមគ្នាថា អ្នកស្រី អៀង ធីរិទ្ធ គាត់មិនមានកាយសម្បទាមាំមួនអាចចូលរួមក្នុងសវនាការទេ។ ហើយចំណុចមួយទៀត ចៅក្រមនៃអង្គជំនុំជម្រះ គឺយល់ស្របនូវការបំបែកបទចោទចំពោះអ្នកស្រី អៀង ធីរិទ្ធ។ ទាក់ទងបញ្ហានេះមិនមែនមានន័យថា ជាការបញ្ចប់ការចោទប្រកាន់លើគាត់នោះទេ ប៉ុន្តែគ្រាន់តែផ្អាកនីតិវិធីចំពោះគាត់តែប៉ុណ្ណោះ»។
កន្លងមកអង្គជំនុំជម្រះសាលាដំបូងនៃតុលាការខ្មែរក្រហមបានបើកសវនាការលើបញ្ហាកាយសម្បទារបស់ជនជាប់ចោទពីររូប គឺអ្នកស្រី អៀង ធីរិទ្ធ និងលោក នួន ជា។
អង្គជំនុំជម្រះសាលាដំបូងបានសំរេចរួចហើយថា លោក នួន ជា មានកាយសម្បទាគ្រប់គ្រាន់ក្នុងការចូលបង្ហាញខ្លួនក្នុងសវនាការនាពេលខាងមុខ។ ប៉ុន្តែចំណែកអ្នកស្រី អៀង ធីរិទ្ធ អាយុ ៧៩ឆ្នាំ ដែលជាភរិយារបស់លោក អៀង សារី វិញនោះ កំពុងមានកាយសម្បទាទន់ខ្សោយយ៉ាងខ្លាំង។
អង្គជំនុំជម្រះសាលាដំបូងនៃសាលាក្ដីខ្មែរក្រហម នឹងបើកសវនាការលើសំណុំរឿងលេខ ០០២ នៅថ្ងៃទី២១ ខែវិច្ឆិកា ឆ្នាំ២០១១ លើជនជាប់ចោទបួនរូប ដែលមានលោក នួន ជា លោក ខៀវ សំផន លោក អៀង សារី និងអ្នកស្រី អៀង ធីរិទ្ធ។ ប៉ុន្តែវត្តមានរបស់អ្នកស្រី អៀង ធីរិទ្ធ ក្នុងតុលាការនឹងត្រូវអាក់ខាន។
លោក នេត្រ ភក្ត្រា បន្តថា នីតិវិធីនៃការជំនុំជម្រះអាចធ្វើទៅបានលុះត្រាជន់ជាប់ចោទមានបញ្ញាស្មារតីអាចយល់ដឹងអំពីដំណើរកាត់សេចក្តីផ្សេងៗ ប៉ុន្តែអ្នកស្រី អៀង ធីរិទ្ធ មិនមានសមត្ថភាពដូច្នោះទេ៖ «យោងតាមនីតិវិធីច្បាប់នៅក្នុងដំណើរការជំនុំជម្រះរឿងព្រហ្មទណ្ឌនោះ គឺជនជាប់ចោទគាត់ត្រូវមានបញ្ញាស្មារតីល្មមនៅក្នុងការចូលរួមសវនាការ។ មានន័យថា គាត់ត្រូវដឹងអំពីបទចោទប្រកាន់របស់គាត់ ហើយគាត់អាចក្តាប់អំពីភស្តុតាង ហើយឆ្លើយតបទៅនឹងសំណួរទាំងឡាយបាន ហើយអ៊ីចឹងទេ! ប្រសិនបើជនជាប់ចោទមិនមានបញ្ញាស្មារតីគ្រប់គ្រាន់ មិនអាចឆ្លើយតបទៅនឹងអ្វីដែលជាចំណុចខ្ញុំបានលើកឡើងនោះទេ នោះគាត់មិនអាចចូលរួមសវនាការបានទេ»។
លោកបន្តថា ការសំរេចឲ្យអ្នកស្រី អៀង ធីរិទ្ធ នៅឃុំជាបណ្តោះអាសន្តនេះ លុះត្រាតែមានការសំរេចជាមុនពីអង្គជំនុំជម្រះតុលាការកំពូលនៃតុលាការខ្មែរក្រហម ហើយអាចតម្រូវឲ្យអ្នកស្រីបំពេញកាតព្វកិច្ចមួយចំនួន ក្នុងនោះមានការហាមមិនឲ្យមានការជ្រៀតជ្រែកទៅលើរដ្ឋបាលយុត្តិធម៌ និងមិនត្រូវមានទំនាក់ទំនងជាមួយសាក្សីដែលមានឥទ្ធិពលទៅលើសាលាក្តីខ្មែរក្រហម។
ម្យ៉ាងទៀត អ្នកស្រីត្រូវផ្ដល់អំពីអាសយដ្ឋានថ្មីរបស់អ្នកស្រីទៅអង្គជំនុំជម្រះសាលាដំបូង ព្រមទាំងមានសិទ្ធិក្នុងការតែងតាំងអ្នកជំនាញថ្មី ដើម្បីព្យាបាលឲ្យមានកាយសម្បទាមាំមួនឡើងវិញ សម្រាប់ចូលខ្លួនក្នុងសវនាការជំនុំជម្រះនៅថ្ងៃអនាគត៕