ក្រសួង​អប់រំ​រៀបចំ​ការ​ប្រណាំង​កង់​នៅ​ខេត្ត​តាកែវ

ក្រសួង​អប់រំ យុវជន និង​កីឡា បាន​ជ្រើស​យក​ខេត្ត​តាកែវ ជា​ទីតាំង​ប្រកួត​កីឡា​ប្រណាំង​កង់ ស្វែង​រក​ជើង​ឯក​ប្រចាំ​ឆ្នាំ​២០១០​នេះ។
ដោយ សេក បណ្ឌិត
2010-05-25
អ៊ីម៉ែល
មតិ
Share
បោះពុម្ព
យុវជន ខេង ទី កីឡាករ​ក្នុង​ក្លឹប​ក្រសួង​មហាផ្ទៃ ជាប់​ជា​ជើង​ឯក​ប្រណាំង​កង់​ប្រចាំ​ឆ្នាំ​២០១០។
យុវជន ខេង ទី កីឡាករ​ក្នុង​ក្លឹប​ក្រសួង​មហាផ្ទៃ ជាប់​ជា​ជើង​ឯក​ប្រណាំង​កង់​ប្រចាំ​ឆ្នាំ​២០១០។
RFA/Hong Sokunthea

កីឡា​នាំ​មក​នូវ​ថាមពល​កម្លាំង សាមគ្គីភាព និង​ការ​អភិវឌ្ឍ នេះ​ជា​ប្រធាន​បទ ដែល​ក្រសួង​អប់រំ យុវជន និង​កីឡា រួម​សហការ​ជា​មួយ​សហព័ន្ធ​ខ្មែរ​កីឡា​ប្រណាំង​កង់ បាន​កំណត់​ក្នុង​កម្មវិធី​ប្រណាំង​កង់​ប្រចាំ​ឆ្នាំ​២០១០ ដែល​មាន​រយៈ​ពេល​ពីរ​ថ្ងៃ គឺ​ថ្ងៃ​ទី​២៣ និង​២៤ ឧសភា ដោយ​ជ្រើស​យក​ខេត្ត​តាកែវ ជា​គោល​ដៅ​នៃ​ការ​ប្រារព្ធ​ពិធី​នេះ។

ថ្លែង​នៅ​មុន​ពិធី​ប្រកាស​ជ័យលាភី អភិបាល​រង​ខេត្ត​តាកែវ លោក អ៊ិត សុខ បាន​ឲ្យ​ដឹង​ថា ការ​ប្រណាំង​កង់​នេះ ជា​លើក​ទី​មួយ​ហើយ សម្រាប់​ខេត្ត​តាកែវ។ លោក​បន្ត​ថា កម្មវិធី​នេះ មាន​សារសំខាន់​ណាស់​ចំពោះ​យុវជន ដែល​ធ្វើ​ឲ្យ​ពួក​គេ​មាន​កម្លាំង​ប្រាជ្ញា ស្មារតី​រឹងមាំ ពួក​គេ​អាច​ជៀស​វាង​បាន​នូវ​អំពើ​ឧបាយ​មុខ​ទាំង​ឡាយ ស័ក្ដិសម​ជា​ឈ្មោះ​ថា​យុវជន​ជា​សសរ​ទ្រូង​នៃ​ប្រទេស​ជាតិ។

លោក​មាន​ប្រសាសន៍​បន្ត​ទៀត​ថា ៖ «បើ​យើង​មិន​យក​ចិត្ត​ទុក​ដាក់​រឿង​នេះ​ទេ យើង​បណ្ដែត​បណ្ដោយ​ខ្លួន​លុះ​ទៅ​ដោយ​អំពើ​មិន​ល្អ ឧបាយ​មុខ ផ្សា​ភ្ជាប់​ខ្លួន​នឹង​គ្រឿង​ញៀន វា​សប្បាយ​តែ​មួយ​ពព្រិច​ភ្នែក​ទេ កើត​ទុក្ខ​មួយ​ជីវិត»

គណៈកម្មការ​រៀបចំ​ការ​ប្រកួត បាន​ប្រកាស​ឲ្យ​ដឹង​ថា កង់​ដែល​យក​មក​ប្រកួត មាន​ពី​ប្រភេទ គឺ​កង់ «គួក» និង «ដៃ​ត្រង់»។ មាន​កីឡាករ​ចូល​រួម​ចំនួន ៤១​នាក់ ជា​យុវជន​មាន​អាយុ​ពី ១៨​ឆ្នាំ​ឡើង​ទៅ មក​ពី​ស្ថាប័ន​ចំនួន​៦ គឺ ខេត្ត​កណ្ដាល ខេត្ត​តាកែវ ខេត្ត​ព្រះសីហនុ ក្រសួង​មហាផ្ទៃ ក្រសួង​ការពារ​ជាតិ និង​ស្ថាប័ន​ធនធាន​មនុស្ស។

ថ្ងៃ​ច័ន្ទ​ទី​២៣ ឧសភា​កន្លង​ទៅ គឺ​ជា​វិញ្ញាសា​ប្រណាំង​កង់ «គួក» មាន​ចម្ងាយ​ផ្លូវ ១២០​គីឡូម៉ែត្រ ចេញ​ដំណើរ​ពី​ទីរួមខេត្ត​កណ្ដាល តាម​ផ្លូវ​ជាតិ​លេខ​ពីរ ឆ្ពោះ​ទៅ​ភ្នំដិន ព្រំដែន​កម្ពុជា-វៀតណាម និង​នៅ​ថ្ងៃ​ទី​២៤ ឧសភា ជា​ថ្ងៃ​ផ្ដាច់​ព្រ័ត្រ ជា​វិញ្ញាសា​ប្រណាំង​កង់ «ដៃ​ត្រង់» មាន​ចម្ងាយ​ផ្លូវ ៤០​គីឡូម៉ែត្រ ដោយ​ចេញ​ដំណើរ​ពី​រង្វង់​មូល​វិមាន​ឯករាជ្យ ទីរួមខេត្ត​តាកែវ ឆ្ពោះ​ទៅ​ទី​ប្រជុំ​ជន​អង្គ​តា​សោម តាម​ផ្លូវ​ជាតិ​លេខ​បី រួច​ត្រឡប់​មក​កន្លែង​ដើម​វិញ។

តំណាង​ឲ្យ​អ្នក​រៀបចំ​កម្មវិធី អគ្គនាយក​រង នៃ​ក្រសួង​អប់រំ ​យុវជន និង​កីឡា លោក ម៉ិល កាដូ ថ្លែង​បញ្ជាក់​ពី​គោល​បំណង និង​សារសំខាន់​ក្នុង​ការ​រៀបចំ​កម្មវិធី​ប្រណាំង​កង់​ប្រចាំ​ឆ្នាំ​នេះ​ថា ការ​ប្រកួត​ប្រណាំង​បាន​ផ្ដល់​នូវ​សុខភាព មិត្តភាព ចេះ​ស្រឡាញ់​ភូមិ​សាស្ត្រ​ទឹក​ដី បរិស្ថាន និង​នាំ​គ្នា​ការពារ អភិវឌ្ឍ​ប្រទេស​ជាតិ​ឲ្យ​រីក​ចម្រើន​ទៅ​អនាគត។

លោក ម៉ិល កាដូ មាន​ប្រសាសន៍​បន្ត​ថា ៖ «បើ​កាល​ណា​ទុក​ឲ្យ​ពួក​គេ​ទំនេរ បើ​សិន​ជា​គេ​ងាក​ទៅ​រក​អា​ភាព​អាប់អួ​នៃ​សង្គម​មួយ​ចំនួន ធ្វើ​ឲ្យ​យើង​ខាត​យុវជន​យើង»

ក្នុង​ការ​ប្រកួត​រយៈ​ពេល​ពីរ​ថ្ងៃ​នេះ យុវជន​អាយុ ១៨​ឆ្នាំ ឈ្មោះ ខេង ទី មាន​ទីលំនៅ​ខេត្ត​ព្រះសីហនុ ជា​​កីឡាករ​​ក្នុង​ក្លឹប​ក្រសួង​មហាផ្ទៃ បាន​ទទួល​ជ័យ​លាភី​លេខ​មួយ​ទាំង​ពីរ​វិញ្ញាសា គឺ កង់ «គួក» និង «ដៃត្រង់» ជាប់​ជា​ជើង​ឯក​ប្រចាំ​ឆ្នាំ​២០១០ នេះ។

យុវជន ខេង ទី ថ្លែង​ស្ទើរ​មិន​ចេញ ដោយ​អារម្មណ៍​រំភើប​ពេក​ចំពោះ​ជ័យលាភី​ដ៏​កម្រ និង​ជា​លើក​ដំបូង សម្រាប់​ជីវិត​កីឡា​របស់​គេ។

យុវជន​រូប​នេះ​គ្រាន់​ថ្លែង​ដោយ​ខ្លី​ប្រាប់​វិទ្យុ​អាស៊ី​សេរី​ថា គេ​ចង់​ឲ្យ​យុវជន​ចូល​រួម​ក្នុង​វិស័យ​កីឡា​ឲ្យ​បាន​ច្រើន​ជាង​នេះ​នៅ​ឆ្នាំ​ក្រោយ ព្រោះ​កីឡា​នាំ​មក​នូវ​សុខភាព​ល្អ ជៀស​ផុត​ពី​ការ​គំរាម​កំហែង​ដោយ​គ្រឿង​ញៀន​មក​លើ​យុវជន។

អគ្គនាយក​រង​នៃ​ក្រសួង​អប់រំ​ យុវជន និង​កីឡា លោក ម៉ិល កាដូ បាន​ឲ្យ​ដឹង​ដែរ​ថា ការ​ប្រណាំង​កង់ «គួក» និង «ដៃត្រង់» ពេល​នេះ ជា​លើ​ទី ២០​ហើយ សម្រាប់​ឆ្នាំ​ក្រោយ​ក្រសួង​គ្រោង​នឹង​រៀបចំ​ធ្វើ​នៅ​ខេត្ត​កោះកុង ភាគ​និរតី​នៃ​ប្រទេស​កម្ពុជា៕

ព័ត៌មាន (0)
Share
គេហទំព័រ​ទាំងមូល