ចំណែកឯប្រជាពលរដ្ឋមួយចំនួនតូច ដែលបានចាកចេញ ក៏បានសម្ដែងភាពមិនសប្បាយចិត្ត។
ប្រជាពលរដ្ឋឈ្មោះ សុផល ដែលមានលំនៅនៅបឹងកក់ បានអះអាងថា លោកមិនចុះចេញពីផ្ទះនេះដោយទទួលយកសំណងចំនួន ៨.៥០០ដុល្លារដូចដែលសាលាក្រុងភ្នំពេញបានប្រកាសនោះទេ ហើយសូមឲ្យក្រុមហ៊ុនមកដោះស្រាយផ្ទាល់ជាមួយនឹងពួកគាត់តាមតម្លៃទីផ្សារសេរីជាមុនសិន មុននឹងបន្តការបូមខ្សាច់បញ្ចូលបឹងកក់នេះ ៖ «មុនដំបូង យើងត្រូវដោះស្រាយជាមួយពលរដ្ឋសិន»។
ប្រជាពលរដ្ឋជាច្រើននាក់ផ្សេងទៀតបានអះអាងប្រហាក់ប្រហែលគ្នាថា ៖ «ខ្ញុំរស់នៅទីនេះតាំងពីឆ្នាំ១៩៩៣។ ការអភិវឌ្ឍរបស់ក្រុងហ្នឹង យើងមិនជំទាស់ទេ ប៉ុន្តែធ្វើម៉េចដោះស្រាយឲ្យប្រជាជនឲ្យសមស្រប»។
បើតាមមន្ត្រីសាលាក្រុងភ្នំពេញ បានឲ្យដឹងថា មានប្រជាពលរដ្ឋប្រមាណ ៤០០គ្រួសារហើយ ដែលបានស្ម័គ្រចិត្តចាកចេញពីបឹងកក់តាមការស្នើរបស់សាលាក្រុងភ្នំពេញ។ ប៉ុន្តែបើប្រជាពលរដ្ឋដែលមានលំនៅទល់មុខនឹងទុយោបូមខ្សាច់បញ្ចូលក្នុងបឹងកក់បានអះអាងថា ពួកគាត់បានរើផ្ទះទាំងបង្ខំ ៖ «តែបើយើងថា យើងដាច់ខាតយើងមិនចេញ គេនឹងបូមពន្លិចយើងហើយ»។
ចំណែកឯប្រជាពលរដ្ឋម្នាក់ទៀតបានឲ្យដឹងថា ការដែលគាត់បានយល់ព្រមទទួលយកសំណងផ្ទះមួយខ្នង ដែលមានទំហំ ៤ម៉ែត្រគុណនឹង១២ម៉ែត្រតាមសាលាក្រុង ព្រោះគាត់តែងតែបារម្ភពីសុវត្ថិភាពសន្តិសុខនៅក្នុងតំបន់បឹងកក់នេះ ម្យ៉ាងវិញទៀត ម្តងម្កាល ទឹកនៅក្នុងបឹងកក់នោះមានក្លិនស្អុយ ៖ «ចង់ចេញយូរដែរហើយ ព្រោះកន្លែងហ្នុងវាស្អុយ»។
ឆ្លើយតបនឹងការតវ៉ារបស់ប្រជាពលរដ្ឋក្នុងតំបន់បឹងកក់នេះ អភិបាលរងក្រុងភ្នំពេញ លោក ម៉ាន់ ឈឿន មានប្រសាសន៍ថា លោកបានដាក់សំណើទៅអភិបាលក្រុងរួចហើយ ហើយការសម្រេចឲ្យបូមខ្សាច់ដាក់បឹងនោះទៀត គឺសាលាក្រុងធ្វើតាមតែលិខិត ស.ជ.ណ. របស់ទីស្តីការគណៈរដ្ឋមន្ត្រីតែប៉ុណ្ណោះ។
មេធាវីរបស់ប្រជាពលរដ្ឋនៅក្នុងបឹងកក់ លោក ជូង ជូងី បានឲ្យដឹងថា លោកនឹងដាក់ពាក្យបណ្តឹងទៅតុលាការក្រុងភ្នំពេញ ដើម្បីឲ្យក្រុមហ៊ុនផ្អាកការបូមជាបណ្តោះអាសន្នសិន និងឲ្យក្រុមហ៊ុនចូលមកដោះស្រាយជាមួយប្រជាពលរដ្ឋដោយផ្ទាល់។
ប្រធាននាយកដ្ឋានជលសាស្រ្តនិងការងារទន្លេ ហើយជាអ្នកគ្រប់គ្រងការបូមខ្សាច់ចេញពីទន្លេនៃក្រសួងធនធានទឹកនិងឧតុនិយម លោក ម៉ៅ ហាក់ មានប្រសាសន៍ថា ប្រសិនបើក្រុមហ៊ុនអនុវត្តតាមផែនការនោះ ការបូមខ្សាច់ចូលបឹងកក់នេះ មិនបណ្ដាលឲ្យលិចលង់ផ្ទះរបស់ប្រជាពលរដ្ឋឡើយ។ ប៉ុន្តែលោកព្យាយាមមិនអត្ថាធិប្បាយអំពីផលប៉ះពាល់ក្នុងការបូមខ្សាច់បញ្ចូលបឹងនេះឡើយ។
លោក ម៉ៅ ហាក់ មានប្រសាសន៍ដូច្នេះថា ៖ «យើងផ្ដល់លក្ខណៈបច្ចេកទេសទៅគាត់ហើយ បើសិនជាគាត់អនុវត្តនូវបច្ចេកទេសហ្នឹង គឺពុំមានផលប៉ះពាល់អីទេ»។
ចំណែកឯរដ្ឋលេខាធិការក្រសួងបរិស្ថាន លោក ប្រាជ្ញ ស៊ុន មានប្រសាសន៍ថា ការបូមខ្សាច់ដាក់បឹងកក់នោះមិនមានផលប៉ះពាល់ដល់បរិស្ថានជុំវិញនោះទេ ព្រោះក្រសួងបរិស្ថានបានសិក្សានិងសម្រួលអំពីបរិស្ថានជុំវិញបឹងនោះរួចហើយ ៖ «មានក្រុមហ៊ុន មានខាង[ទីប្រឹក្សា] គេវាយតម្លៃផលប៉ះពាល់បរិស្ថានហ្នឹង បើប៉ះពាល់អី គេដោះស្រាយផ្នែកដែលប៉ះពាល់អស់ហើយ បានគេចាប់ផ្ដើមអនុវត្ត»។
តាមមេធាវីរបស់ប្រជាពលរដ្ឋបានឲ្យដឹងថា ការបូមខ្សាច់បញ្ចូលបឹង គឺខុសនឹងច្បាប់ភូមិបាលឆ្នាំ២០០១ ត្រង់មាត្រាទី៥៨ ដែលបានចែងថា បឹងកក់គឺជាបឹងធម្មជាតិជាទ្រព្យសម្បត្តិសាធារណៈរបស់រដ្ឋគឺរដ្ឋមិនអាចធ្វើសម្បទាន ឬជួលបានទេ ហើយខុសនឹងអនុក្រឹត្យលេខ១២៩ របស់រដ្ឋាភិបាលដែលកំណត់ថា ការជួលទ្រព្យសម្បត្តិសាធារណៈរបស់រដ្ឋ មិនឲ្យលើសពី១៥ឆ្នាំឡើយ។
ពាក់ព័ន្ធនឹងការទាមទាររបស់ប្រជាពលរដ្ឋនៅបឹងកក់នេះដែរ តំណាងរាស្ត្រមណ្ឌលភ្នំពេញនៃគណបក្សសមរង្ស៊ីលោក សុន ឆ័យ មានប្រសាសន៍ថា លោកកំពុងរង់ចាំចម្លើយពីក្រសួងបរិស្ថាន ហើយលោកក៏សូមឲ្យប្រជាពលរដ្ឋដាក់ពាក្យបណ្តឹងមករដ្ឋសភាផងដែរ ៖ «ហើយលើកនេះទៀត យើងក៏ត្រូវបញ្ជាក់ដែរ ន័យក្នុងការបញ្ឈប់សកម្មភាពបូមនេះ គឺត្រូវតែមានការបញ្ជាក់ពីរ។ ទី១ ពីក្រសួងបរិស្ថានម្ដងទៀត ហើយនិងការតវ៉ាផ្លូវការពីប្រជាពលរដ្ឋ»។
បើតាមឯកសារចម្លងនៃកិច្ចសន្យាជួលបឹងដែលវិទ្យុអាស៊ីសេរីទទួលបាន រវាងសាលាក្រុងភ្នំពេញជាមួយនឹងក្រុមហ៊ុន ស៊ូកាគូ អ៊ិន ក្នុងតម្លៃ ចិតសិបប្រាំបួនលាន ពីរពាន់ដុល្លារ សម្រាប់រយៈពេលដំបូង ៩៩ឆ្នាំ ថ្លៃឈ្នួលនេះ បានអនុញ្ញាតឲ្យប្រើប្រាស់ក្នុងការដោះស្រាយគោលនយោបាយជូនប្រជាពលរដ្ឋប្រមាណ ៤.២៥២គ្រួសារ។ ហើយភាគីក្រុមហ៊ុននិងបានទទួលទីតាំងបឹងកក់ចំនួន ១៣៣ហិកតារមកគ្រប់គ្រង គឺបន្ទាប់ពីភាគីសាលាក្រុងបានដោះស្រាយបញ្ហាដីរួចទាំងស្រុង។
នៅក្នុងកិច្ចសន្យាជួល ក្រុមហ៊ុនមានគម្រោងអភិវឌ្ឍតំបន់បឹងកក់នេះជាមជ្ឈមណ្ឌលពាណិជ្ជកម្ម វិប្បធម៌ ទេសចរណ៍ លំនៅដ្ឋាន រមណីយដ្ឋាន ជាដើម។
ពាក់ព័ន្ធនឹងសំណើរបស់ប្រជាពលរដ្ឋខាងលើនេះដែរ វិទ្យុអាស៊ីសេរីបានព្យាយាមសុំជួបជាមួយប្រធានក្រុមហ៊ុន ស៊ូកាគូ អ៊ិន ដើម្បីសុំការឆ្លើយតបចំពោះការទាមទាររបស់ប្រជាពលរដ្ឋ កាលពីថ្ងៃទី៣១ ខែសីហា នៅទីស្នាក់ការ ប៉ុន្តែបុគ្គលិកធ្វើការនៅទីនោះឆ្លើយថា ប្រធានក្រុមហ៊ុនមិននៅ។
វិទ្យុអាស៊ីសេរីបានសុំណាត់ជួប តែបុគ្គលិករូបនោះឆ្លើយថា មិនទទួលដោយឲ្យមកជួបនៅថ្ងៃបន្ទាប់។ នៅថ្ងៃទី១ ខែកញ្ញា វិទ្យុអាស៊ីសេរី បានទៅដល់ទីស្នាក់ការនោះម្តងទៀត ប៉ុន្តែបុគ្គលិកដែលធ្វើការនៅទីនោះបានប្រាប់ថា មិនអាចឲ្យជួបលោក ឡាវ ម៉េងឃីន ដែលជាប្រធានក្រុមហ៊ុនបានទេ ត្រូវសុំការអនុញ្ញាតពីមន្រ្តីសាលាក្រុងជាមុនសិន ទើបអាចជួបលោកបាន។
នៅថ្ងៃទី២ ខែកញ្ញា វិទ្យុអាស៊ីសេរីបានសុំការអនុញ្ញាតពីមន្ត្រីសាលាក្រុងភ្នំពេញដើម្បីជួបលោក ឡាវ ម៉េងឃីន ប៉ុន្តែមន្ត្រីសាលាក្រុងភ្នំពេញថា ការចង់់ជួបនរណាម្នាក់ក្នុងក្រុមហ៊ុន ស៊ូកាគូ អ៊ិន មិនពាក់ព័ន្ធនឹងសាលាក្រុងភ្នំពេញទេ។
នៅថ្ងៃដដែលនេះដែរ វិទ្យុអាស៊ីសេរី បានទៅដល់ទីស្នាក់ការក្រុមហ៊ុនស៊ូកាគូ អ៊ិន ម្តងទៀត ដើម្បីជួបលោក ឡាវ ម៉េងឃីន ប៉ុន្តែត្រូវអ្នកធ្វើការនៅទីនោះប្រាប់ថា លោកទើបចេញពីទីស្នាក់ការអម្បាញ់មិញនេះ ហើយវិទ្យុអាស៊ីសេរី ក៏បានដាក់សំបុត្រមួយដើម្បីសុំជួប ព្រមទាំងភ្ជាប់នឹងសំណួរមួយចំនួន ផងដែរ។ ហើយក្នុងអំឡុងពេលប៉ុន្មានថ្ងៃនេះដែរ វិទ្យុអាស៊ីសេរី បានព្យាយាមទូរស័ព្ទទៅលោក ឡាវ ម៉េងឃីន រាល់ថ្ងៃ ប៉ុន្តែមិនមានការឆ្លើយតប៕