ចំណីអាហារសម្រាប់មនុស្សទទួលទានភាគច្រើន ដែលដាក់លក់នៅលើទីផ្សារក្នុងប្រទេសកម្ពុជា ត្រូវបានគេរកឃើញថា មានផ្ទុកសារធាតុគីមីពុលច្រើនណាស់។
យោងតាមបណ្ដាញព័ត៌មានអូស្ត្រាលី (Networks News) មន្ត្រីជំនាញផ្នែកសារធាតុគីមី និងម្ហូបអាហារនៃរាជបណ្ឌិតសភាកម្ពុជា លោកស្រីបណ្ឌិត ចេក សុថា បានរកឃើញថា ផលិតផលម្ហូបអាហារចំនួន ៤១% ទៅ៨០% នៅក្នុងប្រទេសកម្ពុជា មានផ្ទុកសារធាតុគីមីដែលមានគ្រោះថ្នាក់ដល់សុខភាព។
ទាក់ទងនឹងបញ្ហានេះ មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា ហៅកាត់ថាសេដាក់ បានឲ្យដឹងថា ប្រសិនបើកម្ពុជាមានសហជីពទ្រទ្រង់អ្នកបរិភោគចំណីអាហារនៅក្នុងប្រទេសកម្ពុជានឹងមានគុណភាពល្អប្រសើរឡើង។ ពីព្រោះសហជីពទ្រទ្រង់អ្នកបរិភោគ នឹងចាត់វិធានការនានាជួយធ្វើឲ្យផលិតផលម្ហូបអាហារនៅលើទីផ្សារមានសុវត្ថិភាព មិនប៉ះពាល់ដល់សុខភាពដែលបានជាប្រយោជន៍ដល់អតិថិជន ឬអ្នកទិញគ្រប់រូប។
តាមការស្រាវជ្រាវរបស់រាជបណ្ឌិតសភាកម្ពុជា លោកស្រីបណ្ឌិត ចេក សុថា បានបង្ហាញថា មានសារធាតុពីរប្រភេទ គឺបូរាក់ (borax) និងហ្វក់ម៉ល (formalin)។ សារធាតុគីមីដែលប៉ះពាល់ដល់សុខភាពនេះ គេឃើញមាននៅក្នុងផលិតផលមួយចំនួន ដូចជានៅក្នុងសាច់ក្រក ត្រីងៀត គុយទាវ ម្ហូបសមុទ្រ និងប្រហិតសាច់គោជាដើម។
លោក យ៉ង សាំងកុម៉ា នាយកអង្គការសេដាក់ បានមានប្រសាសន៍ថា អតិថិជន ឬក្រុមអ្នកទិញ និងប្រើប្រាស់ផលិតផលចំណីអាហារ គូរតែអំពាវនាវដល់អ្នកជំនួញ និងអ្នកផលិតចំណីអាហារទាំងអស់ឲ្យទទួលខុសត្រូវលើសុខភាពប្រជាពលរដ្ឋខ្មែរ។ ដូច្នេះការបង្កើតឲ្យមានសហជីពទ្រទ្រង់អ្នកបរិភោគ ឬអ្នកទទួលទាន វាជាការល្អប្រសើរណាស់៕