បង្គោលព្រំដែនកម្ពុជា-វៀតណាមចំនួនជាង១០០ត្រូវបានបោះរួចរាល់
2009.02.27
លោក វ៉ា គឹមហុង ទេសរដ្ឋមន្រ្តីនិងជាប្រធានគណៈកម្មាធិការព្រំដែនបានមានប្រសាសន៍ថា គណៈកម្មាធិការនៃប្រទេសទាំងពីរគឺកម្ពុជា-វៀតណាមបានព្រមព្រៀងគ្នាទៅលើគម្រោងមេក្នុងការបោះបង្គោលព្រំដែននេះតាំងពីឆ្នាំ២០០៥មក ហើយគ្រោងនឹងបញ្ចប់នៃការបោះបង្គោលព្រំដែននៅឆ្នាំ២០១២ ដោយផ្អែកលើគម្រោងមេដែលភាគីទាំងពីរបានឯកភាពគ្នានាពេលកន្លងមកនោះ។
លោកបានបន្តថា ខេត្តដែលជាប់នឹងព្រំដែនវៀតណាមដែលគេត្រូវបោះបង្គោលនោះមាន៩ គឺខេត្តមណ្ឌលគិរី រតនគិរី ក្រចេះ កំពង់ចាម កណ្តាល ព្រៃវែង ស្វាយរៀង តាកែវ និងកំពត។
លោក វ៉ា គឹមហុង បានមានប្រសាសន៍ថា ៖ «យើង៣១៤បង្គោល ពិបាកដែររឿងបោះបង្គោល មិនមែនយើងបោះបង្គោលដីឯណា យើងបានឯកភាពគ្នាហើយ ធ្វើម៉េចឥឡូវ។ ហើយទី១ ថៃបង្គោលនៅប្រាសាទព្រះវិហារមួយបោះមិនបានផង ធ្វើម៉េច? ថាស្រួលឯណា ឥឡូវបោះបង្គោលព្រំដែន ឲ្យសុរិយោដីទៅបោះអ៊ីចឹង?»។
ប្រធានគណបក្សប្រឆាំង គឺលោក សម រង្ស៊ី បានមានប្រសាសន៍ថា ការបោះបង្គោលព្រំដែននេះ គឺអូសបន្លាយពេលយូរនិងធ្វើឲ្យប្រជាពលរដ្ឋរស់នៅតាមតំបន់ព្រំដែននាពេលកន្លងមករងទុក្ខនូវការបាត់បង់ដីស្រែដោយសារវៀតណាមបានខិតចូលមកខាងកម្ពុជា។
លោកបញ្ជាក់ថា ការកំណត់និងបោះបង្គោលព្រំដែននេះគណៈកម្មាធិការកម្ពុជាគួរតែផ្អែកលើផែនទីឲ្យបានច្បាស់លាស់។
លោក សម រង្ស៊ី បានបញ្ជាក់ថា ៖ «ផែនទីអន្តរជាតិ ផែនទីប្រទេសកម្ពុជា ដែលទទួលស្គាល់ដោយអង្គការសហប្រជាជាតិដែលសម្ដេចព្រះនរោត្ដម សីហនុ កាលពីសម័យសង្គមរាស្រ្ដនិយម លោកបានយកផែនទីកម្ពុជាយកទៅតម្កល់ទុកនៅអង្គការសហប្រជាជាតិ ហើយផែនទីនោះគឺមានកំណត់ព្រំដែនត្រឹមត្រូវដែលខ្ញុំយល់ឃើញថា ទាល់តែផ្អែកលើមូលដ្ឋានបែបហ្នឹង បានការកំណត់ព្រំដែនមានលក្ខណៈត្រឹមត្រូវ។ បងប្អូនកុំមើលតែខាងលិចមានបញ្ហាប្រាសាទព្រះវិហារ ជាមួយនឹងប្រទេសថៃ ប៉ុន្តែខាងកើតក៏យួនលេបទឹកដីខ្មែរក៏ច្រើនណាស់ដែរ»។
សូមជម្រាបថា នៅក្នុងកិច្ចប្រជុំលើកទី៨ក្នុងក្រុងភ្នំពេញកាលពីថ្ងៃទី២៣-២៥ អនុគណៈកម្មាធិការព្រំដែនបច្ចេកទេសរួម គឺរដ្ឋលេខាធិការក្រសួងការបរទេស គឺលោក ឡុង វិសាឡូ និងគណៈប្រតិភូវៀតណាម គឺលោក Nguyen Hong Thao ដែលជាអនុប្រធានគណៈកម្មាធិការព្រំដែនជាតិរបស់ក្រសួងការបរទេសវៀតណាម និងជាសមាជិកនៃគណៈកម្មាធិការព្រំដែនរួមកម្ពុជាវៀតណាមផងនោះ។ គឺភាគីទាំងពីរបានព្រមព្រៀងស្នើឲ្យមានការកែសម្រួលទៅលើផែនការមេដែលគ្រប់គ្រងការកំណត់បោះបង្គោលព្រំដែនសម្រាប់ឆ្នាំ២០០៩ដល់ឆ្នាំ២០១២។
យោងតាមលោកទេសរដ្ឋមន្រ្តី វ៉ា គឹមហុង បានឲ្យដឹងទៀតថា ប្រទេសកម្ពុជាមានព្រំដែនជាប់នឹងវៀតណាមប្រវែង១២៧០គីឡូម៉ែត្រ៕
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- លោក ហ៊ុន សែន តែងតាំងលោក ហៃ វណ្ណា និងសកម្មជន ១៨នាក់ទៀតជាទីប្រឹក្សា និងជំនួយការ