​សេរីភាព​សារព័ត៌មាន​នៅ​កម្ពុជា​ធ្លាក់​ដល់​​ចំណាត់​ថ្នាក់​ទី​១៤៣

អង្គការ​សារព័ត៌មាន​អន្តរជាតិ​​ឈ្មោះ​ថា «អ្នក​យក​ព័ត៌មាន​គ្មាន​ព្រំដែន» (Reporters Without Border) បាន​បញ្ចេញ​​របាយការណ៍​ប្រចាំ​ឆ្នាំ ដោយ​វាយតម្លៃ​អំពី​សេរីភាព​សារព័ត៌មាន​នានា​លើ​ពិភពលោក​ឆ្នាំ​២០១៣។
ដោយ វោហារ ជាតិ
2013.01.30
Share on WhatsApp
Share on WhatsApp
កាសែត305 មន្ត្រី​រដ្ឋាភិបាល​ថ្លែង​ថា អ្នក​កាសែត​ខ្មែរ​មាន​សេរីភាព​គ្រប់គ្រាន់​ក្នុង​ការ​រិះ​គន់​រដ្ឋាភិបាល។
Photo courtesy of tharum.info

ដោយ​​ឡែក​ចំពោះ​សេរីភាព​សារព័ត៌មាន​នៅ​ប្រទេស​កម្ពុជា​វិញ អង្គការ​នេះ​បាន​ចាត់​ចំណាក់​ថ្នាក់​ទាប​ដល់​ជិត ១៥០​ពិន្ទុ ក្នុង​ចំណោម​ប្រទេស​លើ​ពិភព​លោក។

អង្គការ «អ្នក​យក​ព័ត៌មាន​គ្មាន​ព្រំដែន» បាន​បញ្ចេញ​របាយការណ៍​មួយ​នៅ​ថ្ងៃ​ទី​៣០ មករា ដោយ​បាន​​ទម្លាក់​ពិន្ទុ​សេរីភាព​សារព័ត៌មាន​នៅ​ប្រទេស​កម្ពុជា ដល់​កម្រិត​ថ្នាក់​ទី ១៤៣ ក្នុង​ចំណោម​ប្រទេស ១៧៩។

របាយការណ៍​នេះ​បង្ហាញ​ថា ការ​វាយ​តម្លៃ​សេរីភាព​សារព័ត៌មាន​​កាល​ពី​ឆ្នាំ​ទៅ​មិញ កម្ពុជា​ស្ថិត​ចំណាត់​ថ្នាក់​គ្រាន់​បើ​ជាង​នេះ ពោល​គឺ​កម្រិត​​​ត្រឹម​លេខ ១១៧។ តែ​​​ឆ្នាំ​នេះ​បាន​ធ្លាក់​ចុះ​ចំនួន ៣៦​​ថ្នាក់ ដោយសារ​តែ​រដ្ឋាភិបាល​គាប​សង្កត់​លើ​សេរីភាព​សារព័ត៌មាន និង​ជា​ពិសេស​មាន​ការ​ចាប់​ខ្លួន​លោក ម៉ម សូណង់ដូ ប្រធាន​វិទ្យុ​សំបុកឃ្មុំ ដែល​អង្គការ​នេះ​ហៅ​ថា ជា​អ្នក​សារព័ត៌មាន និង​វិទ្យុ​ឯករាជ្យ។

វិទ្យុ​អាស៊ីសេរី​មិន​អាច​ទាក់​ទង​លោក ខៀវ កាញារីទ្ធ រដ្ឋមន្ត្រី​ក្រសួង​ព័ត៌មាន​បាន​ទេ នៅ​ថ្ងៃ​ទី​៣០ មករា ដើម្បី​សុំ​ការ​ឆ្លើយ​តប​ចំពោះ​ការ​វាយ​តម្លៃ​នេះ។ ក៏​ប៉ុន្តែ​លោក​ធ្លាប់​ថ្លែង​ប្រាប់​អ្នក​កាសែត​កាល​ពី​ខែ​មុន​នេះ​ថា សេរីភាព​សារព័ត៌មាន​នៅ​កម្ពុជា ស្ថិត​ក្នុង​កម្រិត​ខ្ពស់។ ដោយ​លោក​​​លើក​ជា​ឧទាហរណ៍​ប្រៀបធៀប​ថា បើ​សេរីភាព​ព័ត៌មាន​ក្នុង​តំបន់​ល្អ​កម្រិត​ខ្ពស់​ត្រឹម ១០ គឺ​សេរីភាព​សារព័ត៌មាន​កម្ពុជា ឈរ​ត្រឹម​លេខ​៨។

ក៏​ប៉ុន្តែ មន្ត្រី​អង្គការ​សិទ្ធិ​មនុស្ស និង​អង្គការ​សារព័ត៌មាន​អន្តរជាតិ​ខ្លះ បាន​រិះគន់​រដ្ឋាភិបាល​ថា បាន​ប្រើ​ប្រព័ន្ធ​តុលាការ​គាប​សង្កត់​អ្នក​សារព័ត៌មាន​ណា​ដែល​ប្រឆាំង ឬ​ហ៊ាន​រិះគន់​រដ្ឋាភិបាល ជំនួស​ការ​គាបសង្កត់​ដោយ​ប្រើ​ហិង្សា ឬ​គំរាមកំហែង​ដោយ​កម្លាំង​បាយ ក្នុង​ពេល​ប៉ុន្មាន​ឆ្នាំ​ចុង​ក្រោយ​នេះ។

តែ​ផ្ទុយ​ទៅ​វិញ លោក ឆាយ សុផល នាយក​សារព័ត៌មាន ខេមបូឌា ញូវ (Cambodia News) បាន​បញ្ជាក់​នៅ​ថ្ងៃ​ទី​៣០ មករា នេះ​ថា សេរីភាព​សារព័ត៌មាន​នៅ​កម្ពុជា ឆ្នាំ​នេះ​ប្រសើរ​ជាង​ឆ្នាំ​ទៅ​ច្រើន។ លោក​បាន​លើក​ហេតុផល​មួយ​ចំនួន​ដូច​ជា សេរីភាព​បញ្ចេញ​មតិ និង​សេរីភាព​សារព័ត៌មាន​តាម​រយៈ​ព័ត៌មាន​សង្គម ឬ ហ្វេសប៊ុក (Face book) ថា មាន​អ្នក​រិះគន់​រដ្ឋាភិបាល​ច្រើន តែ​ពួកគេ​មិន​ត្រូវ​បាន​ចាប់​ដាក់គុក ឬ​ទទួល​ការ​គំរាម​កំហែង​អ្វី​ទេ។

លោក ឆាយ សុផល៖ «ត្រង់​ថា ស្រុក​យើង​ខុស​ស្រុក​គេ។ នៅ​ស្រុក​យើង​មាន​សារព័ត៌មាន​គាំទ្រ​គណបក្ស​កាន់​អំណាច​ផង សារព័ត៌មាន​ដែល​ប្រឆាំង​នឹង​គណបក្ស​កាន់​អំណាច​ផង ហើយ​ក៏​មាន​សារព័ត៌មាន​ឯករាជ្យ។ ដូច្នេះ​ទាំង​អស់​នេះ វា​បង្ហាញ​សង្គម​ប្រជាធិបតេយ្យ​ហើយ។ បើ​សិន​ជា​សារព័ត៌មាន​ណាមួយ​មិន​ពិត ធ្វើ​ការរិះគន់​ដែល​មិន​មាន​ភស្តុតាង​ច្បាស់លាស់ មិត្ត​អ្នក​ស្ដាប់ អ្នក​ទស្សនា អ្នក​អាន​កាសែត ឥឡូវ​គាត់​ឆ្លាត​ណាស់ គាត់​ដឹង​ថា តើ​ព័ត៌មាន​ណា​ដែល​គាត់​ជ្រើស​រើស...»

របាយការណ៍​វាយ​តម្លៃ​សេរីភាព​សារព័ត៌មាន​ចំនួន ២៦​ទំព័រ បាន​បង្ហាញ​ថា ប្រទេស​ជាប់​លេខ​មួយ​ខាង​សេរីភាព​សារព័ត៌មាន គឺ​ប្រទេស​ហ្វាំងឡង់ (Finland) ហើយ​ប្រទេស​ដែល​អាក្រក់​ជាង​គេ​បំផុត​គឺ​ប្រទេស​អេរីត្រេ (Eritrea) ស្ថិត​​ចំណាត់​ថ្នាក់​លេខ ១៧៩ ជា​លេខ​​ក្រោម​គេ​​បំផុត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។