កងទ័ពកម្ពុជា និងថៃ កាលពីម៉ោង ៣ល្ងាចថ្ងៃសុក្រ ទី៤ ខែកុម្ភៈ បានពើបប្រយុទ្ធគ្នានៅតំបន់ជម្លោះព្រំដែនក្បែរប្រាសាទព្រះវិហារ ដែលបានបណ្ដាលឲ្យកងទ័ពខ្មែរចំនួនពីរនាក់ស្លាប់ និងពីរនាក់ផ្សេងទៀតរងរបួស ចំណែកឯទាហានថៃចំនួន ៣នាក់ បានរងរបួស និងពលរដ្ឋថៃម្នាក់បានស្លាប់។
ការផ្ទុះអាវុធបានផ្អាកនៅម៉ោង ៥ និង ៣០នាទីល្ងាចថ្ងៃសុក្រ ទី៤ ខែកុម្ភៈ ក្រោយពីទាហានថៃ ទាមទារឲ្យមានការចរចាគ្នា។
មន្ត្រីរដ្ឋាភិបាលកម្ពុជា បានឲ្យដឹងថា ក្នុងព្រឹត្តិការណ៍ប្រយុទ្ធគ្នានេះ ទាហានខ្មែរបានចាប់ខ្លួនទាហានថៃបានចំនួន ៤នាក់ ហើយបច្ចុប្បន្ននេះទាហានថៃ ៤នាក់នេះ កំពុងស្ថិតនៅក្នុងការឃុំឃាំងរបស់ទាហានខ្មែរ។
មន្រ្តីយោធាកម្ពុជា និងថៃ បានស្ដីបន្ទោសគ្នាទៅវិញទៅមកចំពោះអ្នកបង្កហេតុបណ្តាលឲ្យមានការផ្ទុះអាវុធនេះ។
មន្ត្រីជាន់ខ្ពស់កម្ពុជា បានឲ្យដឹងថា ទាហានថៃជាអ្នកបង្កឲ្យមានការផ្ទុះអាវុធ ចំណែកឯទាហានថៃ បានបន្ទោសការប្រយុទ្ធគ្នាបណ្ដាលមកពីការភ័ន្តច្រឡំគ្នារវាងកងទ័ពកម្ពុជា និងថៃ។
លោក កុយ គួង អ្នកនាំពាក្យក្រសួងការបរទេស កាលពីយប់ថ្ងៃសុក្រ ប្រាប់វិទ្យុអាស៊ីសេរី ឲ្យដឹងថា កម្ពុជានឹងដាក់ពាក្យបណ្តឹងទៅក្រុមប្រឹក្សាសន្តិសុខអង្គការសហប្រជាជាតិ អំពីការឈ្លានពានរបស់ថៃ មកលើទឹកដីកម្ពុជា ៖ «ដោយសារតែកងទ័ពថៃ ប្រមាណ ៣០០នាក់ នៅចម្ងាយ ៥០០ម៉ែត្រពីជណ្ដើរទី១នៃប្រាសាទព្រះវិហារ បានធ្វើការបាញ់កាំភ្លើងធំចូលមកជ្រៅក្នុងទឹកដីកម្ពុជាយើង ចម្ងាយពី ១៨ ទៅ ២០គីឡូម៉ែត្រ។ កម្ពុជានឹងប្ដឹងទៅអង្គការសហប្រជាជាតិនៅពេលឆាប់ៗខាងមុខនេះ...»។
លោក កុយ គួង បន្ថែមទៀតថា នៅមិនទាន់ព័ត៌មានលម្អិត ចំពោះការទាមទារឲ្យមានកិច្ចអន្តរាគមន៍ពីអង្គការសហប្រជាជាតិទាក់ទងនឹងជម្លោះកម្ពុជា-ថៃ នៅឡើយទេ។
លោក កុយ គួង បន្ថែមទៀតថា ទោះបីកងទ័ពកម្ពុជា និងថៃ បានប្រយុទ្ធគ្នាក៏ដោយ ប៉ុន្តែទំនាក់ទំនងការទូតរបស់ប្រទេសទាំងពីរនៅមិនទាន់មានការប្រែប្រួលនៅឡើយទេ។ ការប៉ះទង្គិចគ្នារវាងកងទ័ពថៃ និងកម្ពុជា កាលពីថ្ងៃសុក្រ ចំពេលដែលរដ្ឋមន្រ្តីក្រសួងការបរទេសកម្ពុជា-ថៃ បានជួបប្រជុំគ្នានៅខេត្តសៀមរាប ដើម្បីរៀបចំដោះស្រាយបញ្ហាជម្លោះព្រំដែន។
រដ្ឋមន្រ្តីការបរទេសកម្ពុជា-ថៃ បានសន្យាគ្នាក្រោយពីមានកិច្ចប្រជុំគណៈកម្មការព្រំដែនចម្រុះកម្ពុជា-ថៃថា ប្រទេសទាំងពីរឯកភាពគ្នាដើម្បីបញ្ចៀសកុំឲ្យមានជម្លោះ និងរក្សាសន្តិភាពសម្រាប់ប្រទេសទាំងពីរ។
អ្នកនាំពាក្យក្រសួងការពារជាតិ លោក ឈុំ សុជាត មានប្រសាសន៍ប្រាប់វិទ្យុអាស៊ីសេរី កាលពីយប់ថ្ងៃសុក្រ ឲ្យដឹងថា ការប្រយុទ្ធគ្នារវាងកងទ័ពកម្ពុជា និងថៃ ចាប់ផ្តើមឡើង បន្ទាប់ពីក្រុមទាហានថៃ ចង់ឈ្លានពានទឹកដីកម្ពុជា។
លោក ឈុំ សុជាត បន្ថែមថា មកទល់ពេលនេះ កងទ័ពកម្ពុជា នៅមិនទាន់មានព័ត៌មានលម្អិតស្ដីអំពីចំនួនកងទ័ពកម្ពុជាស្លាប់ និងរងរបួសនៅឡើយទេ។ ក៏ប៉ុន្តែសេចក្ដីរាយការណ៍របស់ទីភ្នាក់ងារបរទេសមួយចំនួនបានឲ្យដឹងថា កងទ័ពកម្ពុជា ចំនួនពីរនាក់ស្លាប់ និងរបួសពីរនាក់។
ចំណែកឯកាសែតក្នុងស្រុកមួយចំនួនបានផ្សាយថា យ៉ាងហោចណាស់ក៏មានរថក្រោះថៃចំនួនពីរគ្រឿងត្រូវបានបំផ្លាញ និងបន្ទាយទាហានថៃ ដែលមនុស្សភាគច្រើនស្គាល់ថា ផ្ទះក្រហមក៏ត្រូវបានបាញ់បំផ្លាញដោយកងទ័ពកម្ពុជា។
លោកបន្តថា មេដឹកនាំយោធារបស់កម្ពុជា និងថៃ អាចនឹងជួបគ្នានៅថ្ងៃសៅរ៍ ទី៥ ខែកុម្ភៈនេះ ដើម្បីចរចាគ្នាទាក់ទងដើម្បីបញ្ចៀសភាពតានតឹងផ្នែកយោធានៅតំបន់ជម្លោះព្រំដែនក្បែរប្រសាទព្រះវិហារ ៖ «ធម្មតាកម្ពុជាមិនដែលបង្ករឿងជាមួយថៃទេ មានតែថៃទេ ដែលគាត់បង្ករឿងជាមួយយើងមុន»។
អគ្គមេបញ្ជាការកងទ័ពថៃ លោក ប្រាយុត ចាន់អូចា (Prayuth Chan-Ocha) កាលពីថ្ងៃសុក្រ ត្រូវបានទីភ្នាក់ងារព័ត៌មានអង់គ្លេស Reuters ដកស្រង់សម្ដីថា ការប្រយុទ្ធគ្នារវាងកម្ពុជា និងថៃ ហាក់បីដូចជាបណ្ដាលមកពីការភ័ន្តច្រឡំរវាងកងទ័ពកម្ពុជា និងថៃ។ លោកបន្តថា កងទ័ពកម្ពុជា និងថៃ បានចាប់ផ្ដើមចរចាគ្នាជុំវិញការប្រយុទ្ធគ្នានេះ។
ទោះបីជាអគ្គមេបញ្ជាការកងទ័ពថៃ បានអះអាងថា ការផ្ទុះអាវុធបណ្តាលមកពីការយល់ច្រឡំក៏ដោយ ប៉ុន្តែនាយករដ្ឋមន្ត្រីថៃ លោក អាភីស៊ិត វេតឆាឈីវ៉ាក់ (Abhisit Vejjajiva) បានបន្ទោសកងទ័ពកម្ពុជា ជាអ្នកបង្កឲ្យមានការផ្ទុះអាវុធមុន ហើយទាហានថៃ បានបាញ់តបតកងទ័ពកម្ពុជាជាក្រោយ។
ការប៉ះទង្គិចគ្នារវាងកងទ័ពថៃ និងកម្ពុជា កើតឡើងក្រោយពេលដែលថៃ បានគំរាមធ្វើសង្គ្រាមជាមួយកម្ពុជា ប្រសិនបើគ្មានដំណោះស្រាយដោយសន្តិវិធីដើម្បីបញ្ចប់ជម្លោះព្រំដែនកម្ពុជា និងថៃ។
លោក អភីស៊ិត វេតឆាឈីវ៉ាក់ កាលពីថ្ងៃច័ន្ទ ទី៣១ ខែមករា ឆ្នាំ២០១១ បានគំរាមធ្វើសង្គ្រាមជាមួយកម្ពុជា ជាជម្រើសចុងក្រោយបង្អស់។ ការតានតឹងផ្នែកនយោបាយនេះបណ្ដាលមកពីរដ្ឋាភិបាលថៃ បានទាមទារឲ្យយោធាកម្ពុជា ទម្លាក់ទង់ជាតិខ្មែរចេញពីវត្តកែវសិក្ខាគិរីស្វារៈ ប៉ុន្តែកម្ពុជា បានបដិសេធមិនព្រមតាមសំណើរបស់ថៃ។
ករណីមួយទៀតដែលបណ្តាលឲ្យទំនាក់ទំនងឲ្យកម្ពុជា-ថៃ វិលទៅរកភាពល្អក់កករនឹងគ្នាវិញនោះ គឺដោយសារតុលាការទីក្រុងភ្នំពេញ បដិសេធមិនព្រមដោះលែងសមាជិកក្រុមអាវលឿងថៃ ចំនួនពីរនាក់ ដែលត្រូវបានចាប់ខ្លួនដោយសារការឆ្លងដែនចូលមកទឹកដីកម្ពុជា ដោយខុសច្បាប់។
លោក ផៃ ស៊ីផាន អ្នកនាំពាក្យគណៈរដ្ឋមន្ត្រី កាលពីយប់ថ្ងៃសុក្រ មានប្រសាសន៍ថា រដ្ឋាភិបាលកម្ពុជា នៅមិនទាន់បូកសរុបការខូចខាតរបស់ភាគីកម្ពុជា នៅឡើយទេ ប៉ុន្តែលោកដឹងថា សម្ភារៈ និងបន្ទាយខាងភាគីកងទ័ពថៃ បានខូចខាតមួយចំនួន។
លោក ផៃ ស៊ីផាន បានបន្តថា ការប្រយុទ្ធគ្នាលើកចុងក្រោយនេះ ភាគីកម្ពុជា បានប្រើប្រាស់អាវុធធុនធ្ងន់ ដូចជាកាំភ្លើងផ្លោងជាដើម ដើម្បីតបតនឹងទាហានថៃ ៖ «ក្នុងនាមជាអ្នកការពារ យើងការពារខ្លួន ប្រើអាវុធមួយចំនួនដែរ ប៉ុន្តែអាវុធម៉េចខ្ញុំមិនដឹងទេ គ្រាន់តែឮថា ប្រើអាវុធមួយគឺ BM ដែរ ដោយសារថៃចេះតែបង្កើនទ័ពវា...»។
ឆ្លើយតបទៅនឹងសំណួររបស់អ្នកកាសែតនៅខេត្តសៀមរាប រដ្ឋមន្ត្រីការបរទេសថៃ លោក កាស៊ិត ភិរម្យ (Kasit Piromya) បានអះអាងថា ការប្រយុទ្ធគ្នារវាងកងទ័ពកម្ពុជា និងថៃ មិនមែនជាបញ្ហាធ្ងន់ធ្ងរនោះទេ។
លោកបានព្រមានរួចជាស្រេចហើយថា ជម្លោះរវាងកម្ពុជា និងថៃ មិនត្រូវមានភាគីទីបីលូកដៃចូលនោះទេ ៖ "បញ្ហាព្រំដែន ជាពិសេសតំបន់ក្បែរប្រាសាទព្រះវិហារ ជាបញ្ហាដ៏ពិបាកដោះស្រាយសម្រាប់ភាគីសងខាង។ ដូច្នោះភាគីទាំងសងខាងត្រូវតែមានភាពអត់ធ្មត់ ទោះពីជាមានការប្រយុទ្ធគ្នាក៏ដោយ ការប្រយុទ្ធគ្នានេះកើតឡើងតែរយៈពេលប៉ុន្មានម៉ោងប៉ុណ្ណោះ។ ខ្ញុំបានជជែកជាមួយអាជ្ញាធរកម្ពុជា និងមន្ត្រីទូតថៃហើយ យើងអាចធ្វើឲ្យមានការឈប់បាញ់គ្នាបាន"។
អត្ថាធិប្បាយរបស់លោក កាស៊ីត ភិរម្យ ហាក់បីដូចជាការឆ្លើយតបទៅនឹងគម្រោងរបស់កម្ពុជា ដាក់ពាក្យបណ្ដឹងទៅអង្គការសហប្រជាជាតិប្រឆាំងនឹងកងទ័ពថៃ។
រដ្ឋាភិបាលថៃធ្លាប់បានបដិសេធមិនព្រមឲ្យអង្គការសហប្រជាជាតិ និងសមាគមអាស៊ានជួយសម្រុះសម្រួលវិបត្តិព្រំដែនកម្ពុជា និងថៃ ម្ដងរួចហើយ កាលពីឆ្នាំ២០១០។ ថៃទាមទារឲ្យកម្ពុជា វិលទៅរកការចរចាជាលក្ខណៈទ្វេភាគី ក្រោយពេលដែលកម្ពុជា បានជូនដំណឹងទៅអង្គការសហប្រជាជាតិ និងប្រធានសមាគមអាស៊ានអំពីវិបត្តិព្រំដែនកម្ពុជា និងថៃ។
ទោះជាមានការសន្យាពីភាគីថៃ ក្នុងការចរចាជាលក្ខណៈទ្វេភាគីក៏ដោយ ប៉ុន្តែការចរចាជាលក្ខណៈទ្វេភាគីបានជួបភាពទាល់ច្រក ដោយសារតែសភាថៃ មិនព្រមផ្ដល់សច្ចាប័នលទ្ធផលនៃការចរចាកម្ពុជា និងថៃ ឆ្នាំ២០០០៕