ចៅក្រមស៊ើបសួរ លោក ស៊ិន វីរៈ នៃតុលាការខេត្តកណ្ដាល នៅថ្ងៃទី១៣ ខែកុម្ភៈ ឆ្នាំ២០១២ បានលើកពេលសាកសួរចំលើយមេធាវីគណបក្ស សម រង្ស៊ី គឺលោក ជូង ជូងី នៅថ្ងៃខាងមុខទៀត ដោយមិនកំណត់កាលបរិច្ឆេទជាថ្មីនៅឡើយទេ ដោយសារតែមេធាវីចំនួន ៨នាក់ ការពារក្ដីឲ្យលោក ជូង ជូងី នោះ មិនបានមកការពារក្ដីនៅតុលាការខេត្តកណ្ដាល។
មេធាវីម្នាក់ដែលបានអមដំណើរលោក ជូង ជូងី មកតុលាការខេត្តកណ្ដាលនោះ គឺលោក សុខ សំអឿន ជាប្រធានប្រតិបត្តិនៃគំរោងអ្នកការពារក្ដីកម្ពុជា និងមានតំណាងរាស្ត្រគណបក្ស សម រង្ស៊ី ជាច្រើនរូបទៀត មានដូចជា លោក យឹម សុវណ្ណ លោកស្រី មូរ សុខហួរ លោក ហូរ វ៉ាន់ លោក ជា ប៉ូច និងលោក គីមសួរ ភីរិទ្ធ ជាដើម។
មេធាវីគណបក្ស សម រង្ស៊ី លោក ជូង ជូងី បានមានប្រសាសន៍ប្រាប់អ្នកកាសែតនៅក្រៅតុលាការខេត្តកណ្ដាល នៅថ្ងៃទី១៣ ខែកុម្ភៈ ឆ្នាំ២០១២ ថា ការចោទប្រកាន់មកលើរូបលោកកន្លងមកនេះ គឺជារឿងបំពាន ដូច្នេះលោកមិនអាចទទួលយកបានទេ៖ «សួរខ្ញុំថា តើអាចផ្ដល់ចំលើយបានទេ? ខ្ញុំថា ខ្ញុំមិនអាចផ្ដល់ចំលើយបានទេ ត្រូវតែមានវត្តមានមេធាវីទាំង ៨រូប ចូលរួមទាំងអស់គ្នាទើបខ្ញុំផ្ដល់ចំលើយបាន។ អ៊ីចឹងចៅក្រមគាត់ក៏សំរេចថា ចាំគាត់ចេញលិខិតអញ្ជើញនៅថ្ងៃក្រោយទៀត»។
មេធាវីម្នាក់នៅក្នុងចំណោមមេធាវីចំនួន ៨នាក់ ការពារក្ដីឲ្យលោក ជូង ជូងី នោះ គឺលោក សុខ សំអឿន បានមានប្រសាសន៍ថា លោករង់ចាំការកោះហៅជាថ្មីទៀតមកសាកសួរចំលើយកូនក្ដីរបស់លោក៖ «ហើយម្យ៉ាងទៀត ដោយសារតែលោក ជូង ជូងី បានស្នើសុំតុលាការថា លោកអាចឆ្លើយបាននៅក្នុងករណីដែលមានមេធាវីគ្រប់ទាំងអស់គ្នាទើបគាត់អាចឆ្លើយបាន»។
ទាក់ទងនឹងសំណុំរឿងនេះ តំណាងរាស្ត្រគណបក្ស សម រង្ស៊ី គឺលោក យីម សុវណ្ណ និងជាអ្នកនាំពាក្យបានមានប្រសាសន៍ថា លោកចាត់ទុកថា សំណុំរឿងនេះគឺជារឿងនយោបាយ៖ «យើងត្រូវគិតអំពីបញ្ហាដែលដោះស្រាយជូនប្រជាពលរដ្ឋ ជាពិសេសអ្នកដែលរឹបយកដីធ្លីប្រជាពលរដ្ឋ អ្នកដែលបាញ់សំលាប់ប្រជាពលរដ្ឋ អ្នកដែលចាប់ប្រជាពលរដ្ឋដាក់គុកដោយខុសច្បាប់នោះ អ្នកហ្នឹងដែលត្រូវតែនាំគ្នាគិតគូរដោះស្រាយបញ្ហាហ្នឹងរកយុត្តិធម៌ជូនប្រជាពលរដ្ឋ»។
នៅមុនការកោះហៅមកឆ្លើយបំភ្លឺនៅតុលាការខេត្តកណ្ដាល នៅថ្ងៃទី១៣ ខែកុម្ភៈ ឆ្នាំ២០១២ លោកមេធាវី ជូង ជូងី បានកោរសក់ និងរក្សាសីលរយៈពេល ១ខែ នៅខែមករា កន្លងទៅនេះ ដើម្បីទាមទារមានយុត្តិធម៌នៅក្នុងប្រព័ន្ធតុលាការកម្ពុជា និងរក្សាឯករាជភាព។
ព្រះរាជអាជ្ញានៃតុលាការខេត្តកណ្ដាល លោក អ៊ុក គឹមសិទ្ធិ បានចោទប្រកាន់លោក ជូង ជូងី ក្រោមបទព្រហ្មទណ្ឌ ថាបានផ្ដល់មធ្យោបាយឲ្យជនជាប់ចោទរត់ចេញពីពន្ធនាគារ កាលពីខែកញ្ញា ឆ្នាំ២០១១ កន្លងទៅនេះ។
ជនជាប់ចោទនោះ គឺជាសកម្មជនគណបក្ស សម រង្ស៊ី ឈ្មោះ មាស ប៉េង ជាជំទប់ទី២ ឃុំបន្ទាយដែក ស្រុកកៀនស្វាយ ខេត្តកណ្ដាល ត្រូវបានចាប់ខ្លួននៅថ្ងៃទី២៣ ខែកញ្ញា ឆ្នាំ២០១១ កន្លងទៅនេះ ក្រោមបទញុះញ៉ង់ឲ្យមានអំពើហិង្សានៅក្នុងជំលោះដីធ្លី ទំហំ ៤៣ហិកតារ រវាងអតីតអភិបាលរងខេត្តកណ្ដាល លោក ប្រាក់ សាវុធ ជាមួយប្រជាពលរដ្ឋ ១១៥គ្រួសារ នៅស្រុកកៀនស្វាយ ខេត្តកណ្ដាល។
តំណាងរាស្ត្រគណបក្ស សម រង្ស៊ី មណ្ឌលខេត្តកណ្តាល គឺលោក ចាន់ ចេង ត្រូវបានសភាជាតិបានដកហូតអភ័យឯកសិទ្ធិតំណាងរាស្រ្ត នៅថ្ងៃទី២០ ខែធ្នូ ឆ្នាំ២០១១ កន្លងទៅនេះ តាមសំណើរបស់ក្រសួងយុត្តិធម៌ ដើម្បីឲ្យតុលាការខេត្តកណ្ដាល ចោទប្រកាន់ និងចាប់ខ្លួន ក្រោមបទចូលរួមសំរួលដោះលែងលោក មាស ប៉េង នោះ។
តំណាងរាស្ត្រ ២រូប របស់គណបក្ស សម រង្ស៊ី គឺលោកស្រី មូរ សុខហួរ និងលោក សុន ឆ័យ បានដាក់លិខិតជាផ្លូវការមួយថ្មីៗនេះ ឲ្យសភាជាតិកោះហៅរដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍនា មកឆ្លើយបំភ្លឺនៅសភាជាតិ ជុំវិញប្រព័ន្ធតុលាការនៅប្រទេសកម្ពុជា និងបញ្ហាជាច្រើនទៀត៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។