សេចក្តីព្រមាននេះធ្វើឡើងតាមរយៈកិច្ចសម្ភាសន៍វិទ្យុអាស៊ីសេរីនៅថ្ងៃសុក្រ ទី២៦ ធ្នូ ឆ្នាំ២០០៨ បន្ទាប់ពីខុទ្ទកាល័យលោកនាយករដ្ឋមន្ត្រីកាលពីថ្ងៃទី១៨ ធ្នូ បានចេញលិខិតច្រានចោលបណ្តឹងតវ៉ារបស់ពួកគេ ហើយណែនាំឲ្យអាជ្ញាធរខេត្តជំរុញរំសាយក្រុមសាមគ្គីឲ្យមានប្រសិទ្ធភាពនិងរារាំងមិនឲ្យសាមីបណ្តឹងមកតវ៉ានៅក្បែរនិវេសនដ្ឋានលោកនាយករដ្ឋមន្ត្រីតទៅទៀតក្រោមហេតុផលថា លោកនាយករដ្ឋមន្ត្រីបានសម្រេចរួចហើយដែលទីស្តីការគណៈរដ្ឋមន្ត្រីបានជូនដំណឹងតាមរយៈលិខិតស.ជ.ណ. ចុះថ្ងៃទី១៩ កញ្ញា ឆ្នាំ២០០៨ ស្តីពីការជំរុញឲ្យរំសាយក្រុមសាមគ្គី។
ក្រុមអ្នកតវ៉ាបានប្រមូលផ្តុំគ្នាចំនួន៤លើករួចទៅហើយនៅក្បែរនិវេសនដ្ឋានលោកនាយករដ្ឋមន្ត្រីឯខេត្តកណ្តាល ដោយចោទប្រកាន់ក្រុមហ៊ុនវិនិយោគចម្ការកៅស៊ូ តាយសេង ថាបានក្លែងឯកសារជាមូលហេតុនាំឲ្យរាជរដ្ឋាភិបាលឯកភាពរំសាយក្រុមសាមគ្គីតាមសេចក្តីស្នើសុំពីក្រសួងកសិកម្ម។
តំណាងអ្នកតវ៉ា លោក ប៊ុន ថា ប្រតិកម្ម ៖ «ខ្ញុំមិនអាចទទួលយកបាន ពួកខ្ញុំចូលគ្រប់គ្រងដោយផ្ទាល់ពីរដ្ឋអំណាចហើយនិងអន្តរក្រសួងត្រឹមត្រូវ។ ការរំសាយនេះក្រុមហ៊ុនបានប្រព្រឹត្តនូវអំពើអយុត្តិធម៌ណាស់ បានក្លែងបន្លំឯកសារបញ្ជូនមកថ្នាក់លើហើយសម្រេចដកឈ្មោះពីពួកខ្ញុំ»។
នាយកក្រុមហ៊ុនវិនិយោគចម្ការកៅស៊ូខេត្តរតនគិរី លោក លី ហុងស៊ីន ប្រតិកម្មតប ៖ «រដ្ឋាភិបាលកំពុងថាប្រធានក្រុមសាមគ្គីជាឈ្មួញកណ្ដាលជិះជាន់កម្មករយើង។ យើងសង្ឃឹមថា គណៈកម្មការត្រូវតែជួយធ្វើឲ្យលឿន»។
ចំណែកអភិបាលរងខេត្តរតនគិរី លោក ជ័យ សាយឿន និងជាអនុគណៈកម្មការសម្របសម្រួលរំសាយក្រុមសាមគ្គីមានប្រសាសន៍ថា ៖ «យើងជូនដំណឹងលើកទី២រួចហើយ ផុតថ្ងៃ១០យើងនឹងស្ដាប់របាយការណ៍របស់មន្ទីរកសិកម្ម តើមានអ្នកចុះឈ្មោះហើយឬនៅ? បានប៉ុន្មានហើយ? ថ្ងៃបន្តបន្ទាប់យើងនឹងចេញលិខិតលើកទី៣ ហើយបើលើកទី៣គាត់មិនព្រមចូលទេ អាហ្នឹងយើងអនុវត្តតាមស.ជ.ណ.ហ្នឹង»។
ក្រសួងកសិកម្មកាលពីខែសីហា ឆ្នាំ២០០៦ បានចេញសេចក្តីសម្រេចរំសាយក្រុមសាមគ្គីចម្ការកៅស៊ូរដ្ឋនៅខេត្តរតនគិរីក្រោមហេតុផលមានការទាមទារយកចម្ការកៅស៊ូរដ្ឋជាសម្បត្តិឯកជនធ្វើឲ្យមានការស្មុគស្មាញទាក់ទិនទៅនឹងលក្ខណៈបច្ចេកទេសចៀរជ័រនិងការផលិតជ័រកៅស៊ូ បាតុភាពកេងប្រវ័ញ្ចតម្លៃពលកម្មកម្មករក្នុងក្រុម ជម្លោះតវ៉ាពីកម្រិតទឹកជ័រ ការបង្កកជ័រកៅស៊ូខុសលក្ខណៈបច្ចេកទេសនិងចលនារត់ពន្ធជ័រកៅស៊ូទៅលក់ខុសគោលការណ៍វិនិយោគ។
មន្ត្រីស៊ើបអង្កេតសមាគមអាដហុកខេត្ត លោក ប៉ែន ប៊ុណ្ណារ៍ មានប្រសាសន៍ថាការបញ្ចប់រចនាសម័្ពន្ធក្រុមសាមគ្គីគឺជាវិធីលុបបំបាត់បាតុភាពដែលកើតមាននៅក្នុងកិច្ចវិនិយោគចម្ការកៅស៊ូរដ្ឋមួយនេះ ហើយកម្មករគឺជាអ្នករួចផុតពីផលវិបាក។
បើតាម លោក ជ័យ សាយឿន បញ្ជាក់ថាអាជ្ញាធរខេត្តនឹងសុំកិច្ចសហការពីអាជ្ញាធរខេត្តកណ្តាលរារាំងមិនឲ្យមានការតវ៉ាបានទៀតឡើយ៕