នាយករដ្ឋមន្ត្រីថៃសន្យាផ្ដល់ដំណោះស្រាយដល់ទណ្ឌិតជាប់គុកនៅកម្ពុជា
2013.02.12
អ្នកទោសថៃ លោក វីរៈ ស៊ុំក្វាមឃីត (Veera Somkwamkid) និងអ្នកស្រី រ៉ាត់ទ្រី ប៉ៃប៉ូតាណាប៉ៃប៉ូន (Ratree Paiputanapaiboon) កំពុងតែលត់ជង្គង់សំពះនៅគ្រាដែលមន្ត្រីពន្ធនាគារព្រៃស អានព្រះរាជក្រឹត្យដោះលែង និងបន្ធូរបន្ថយទោស នៅគុកព្រៃស កាលពីថ្ងៃទី១ ខែកុម្ភៈ ឆ្នាំ២០១៣។
សារព័ត៌មានបាងកកប៉ុស្តិ៍ បានផ្សព្វផ្សាយនៅថ្ងៃទី១២ កុម្ភៈ ថា នាយករដ្ឋមន្ត្រីថៃ អ្នកស្រី យីងឡាក់ ស៊ីណាវ៉ាត់ (Yingluck Shinawatra) បានអះអាងថានឹងមានជម្រើស២ ដែលត្រូវផ្ដល់អោយទណ្ឌិតថៃ លោក វីរៈ ស៊ុំក្វាមឃីត គឺការបន្ធូរបន្ថយទោសបន្ថែមទៀត ឬការផ្ទេរទៅកាន់ពន្ធនាគារក្នុងប្រទេសថៃ។
អ្នកស្រី យីងឡាក់ ស៊ីណាវ៉ាត់ បានអះអាងបែបនេះនៅពេលដែលអ្នកស្រីបានជួបជាមួយអ្នកស្រី រ៉ាត់ទ្រី ប៉ៃប៉ូតាណាប៉ៃប៉ូន (Ratree Paiputanapaiboon) កាលពីថ្ងៃច័ន្ទ ទី១១ ខែកុម្ភៈ។
ក្នុងពេលនោះដែរ អ្នកស្រី យីងឡាក់ បញ្ជាក់ថា រដ្ឋាភិបាលកម្ពុជា បានប្រាប់អ្នកស្រីអោយរង់ចាំឱកាសពិសេស ដើម្បីការផ្តល់ការបន្ធូរបន្ថយទោសបន្ថែមដល់លោក វីរៈ ស៊ុំក្វាមឃីត។ យ៉ាងណា រដ្ឋាភិបាលថៃ មានសង្ឃឹមថានឹងអាចសុំផ្ទេរលោកពីពន្ធនាគារកម្ពុជា។
មន្ត្រីនាំពាក្យក្រសួងការបរទេស និងសហប្រតិបត្តិការកម្ពុជា លោក កុយ គួង មានប្រសាសន៍ថា ការផ្ទេរអ្នកទោស គឺត្រូវអនុវត្តតាមកិច្ចព្រមព្រៀងរវាងរដ្ឋាភិបាលនៃប្រទេសទាំងពីរ។ យ៉ាងនេះក្ដី លោក កុយ គួង បញ្ជាក់ថា កម្ពុជា នៅមិនទាន់មានវិធានការយ៉ាងណាចំពោះករណីទណ្ឌិតថៃ នេះនៅឡើយ។
សកម្មជនអាវលឿងថៃ លោក វីរៈ ស៊ុំក្វាមឃីត ដែលត្រូវកាត់អោយជាប់ទោស ៨ឆ្នាំ និងសកម្មជនអាវលឿងថៃ ម្នាក់ទៀតឈ្មោះ រ៉ាត់ទ្រី ប៉ៃប៉ូតាណាប៉ៃប៉ូន ត្រូវកាត់ទោសឲ្យជាប់គុក ៦ឆ្នាំពីបទលបចូលកម្ពុជា ខុសច្បាប់ និងបំណងធ្វើចារកម្ម។ អ្នកស្រី រ៉ាត់ទ្រី ប៉ៃប៉ូតាណាប៉ៃប៉ូន ត្រូវព្រះមហាក្សត្រខ្មែរប្រទានការលើកលែងទោស ចំណែកលោក វីរៈ ស៊ុំក្វាមឃីត ដែលត្រូវបានបន្ធូរបន្ថយទោសចំនួន ៦ខែ ក្នុងពិធីថ្វាយព្រះភ្លើងដល់ព្រះបរមរតនកោដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
- លោក សម រង្ស៊ី អំពាវនាវឱ្យកងកម្លាំងប្រដាប់អាវុធ និងអ្នកនយោបាយរួមគ្នាផ្លាស់ប្ដូររបបត្រកូល ហ៊ុន