សត្វ​មាន​ជីវិត​ក្នុង​អូរ​ព្រំដែន​ខ្មែរ​ថៃ​ពុល​ងាប់​ដោយ​គ្មាន​មូលហេតុ

អ្នក​ស្រុក​និង​មន្ត្រី​សុខាភិបាល​នៅ​ជិត​ព្រំដែន​ខ្មែរ​ថៃ​បាន​ថ្លែង​ថា ពួក​គេ​ប្រទះ​ឃើញ​ត្រី កំពឹស ក្តាម​និង​ខ្យង ពុល​ងាប់​ពេញ​ទឹក​ដោយ​គ្មាន​មូលហេតុ​នៅ​ក្នុង​អូរ​ព្រំដែន​គីឡូ​១៣ ជាប់​ស្រុក​សំពៅលូន ខេត្ត​បាត់ដំបង និង​ជាប់​ស្រុក​ខ្លងហាត ខេត្ត​ស្រះកែវ​ថៃ។
ដោយ សុផល មុន្នី
2009-06-28
Share

លោក ដួង ខែម រស់នៅ​ភូមិ​គីឡូ​១៣ ឃុំ​សន្តិភាព ស្រុក​សំពៅលូន ខេត្ត​បាត់ដំបង បាន​ថ្លែង​នៅ​ព្រឹក​ថ្ងៃ​សៅរ៍ ទី​២៧ ខែ​មិថុនា ថា​ក្នុង​ទឹក​អូរ​ដែល​ចែក​ខណ្ឌ​ព្រំ​ប្រទល់​ខ្មែរ​ថៃ​នៅ​ចំណុច​ខាង​លើ​ទំនង​ត្រូវ​បាន​គេ​លួច​ដាក់​ថ្នាំ​បំពុល​កាលពី​ល្ងាច​ម្សិលមិញ​នៅ​ពេល​យប់។

លោក ដួង ខែម បាន​ឲ្យ​ដឹង​ថា ៖ «ទឹក​ឡើង​ពណ៌​ខៀវ ប៉ុន្តែ​គ្រាន់តែ​ទៅ​ទឹក​ហ្នឹង​ក៏​អត់​បាន​ដែរ ព្រោះ​វា​រាង​ស៊ី​ដូច​ទឹក​អាស៊ីត ងាប់​ទាំងអស់ ងាប់​គ្មាន​សល់​ទេ»

ជំទប់​ទី​២​នៃ​ឃុំ​សន្តិភាព លោក អ៊ូ គីម បាន​ថ្លែង​ថា រហូត​មក​ទល់​ពេល​នេះ​គេ​មិន​ទាន់​ដឹង​ពី​មូលហេតុ​ពិត​ប្រាកដ​ថា សត្វ​ត្រី កំពឹស ក្តាម ខ្យង នៅ​ក្នុង​អូរ​នោះ​ស្លាប់​ដោយសារ​មូលហេតុ​អ្វី​ទេ។

លោក អ៊ូ គីម បាន​មាន​ប្រសាសន៍​ថា ៖ «មាន​លក្ខណៈ​មួយ​ហៅ​ថា របៀប​លួច​ចាក់​ថ្នាំ​តាម​ទឹក​ហ្នឹង​ធ្វើ​ឲ្យ​ងាប់​ត្រី​ងាប់​អី​ហ្នឹង»

ប្រធាន​សុខាភិបាល​ប្រតិបត្តិ​ស្រុក លោក ទាប ស៊ីថុន បាន​ថ្លែង​ថា ក្រោយ​ពី​ទទួល​បាន​ព័ត៌មាន​ក្រុម​មន្ត្រី​សុខាភិបាល​ទាំង​ភាគី​កម្ពុជា​និង​ភាគី​ថៃ​បាន​ចុះ​ទៅ​យក​ត្រី​ដែល​ពុល​ស្លាប់ និង​យក​ទឹក​អូរ​នោះ​ដើម្បី​ធ្វើការ​ត្រួត​ពិនិត្យ ប៉ុន្តែ​ដោយសារ​មន្ទីរ​សុខាភិបាល​ខេត្ត​មិន​មាន​ឡាបូ​ត្រួត​ពិនិត្យ​វិភាគ​ជាតិ​គីមី ត្រូវ​បញ្ជូន​ទៅ​វិទ្យាស្ថាន​ប៉ាស្ទ័រ​នៅ​ទីក្រុង​ភ្នំពេញ​ដើម្បី​ត្រួត​ពិនិត្យ​រក​មូលហេតុ​ដែល​បណ្តាល​ឲ្យ​ពុល។

លោក ទាប ស៊ីថន បាន​បញ្ជាក់​ថា ៖ «អ៊ីចឹង​យើង​មិន​ទាន់​សន្និដ្ឋាន​ថា ពុល​ហ្នឹង​មក​ពី​ថ្នាំ​អី​ទេ! ព្រោះ​ខាង​យើង​នេះ​អត់​មាន​ឡាបូ​សម្រាប់​វិភាគ​ជាតិ​គីមី​ហ្នឹង»

លោក​បន្ត​ថា មិន​មាន​ប្រជាពលរដ្ឋ​ណា​ម្នាក់​ទទួល​រងគ្រោះ​ដោយសារ​ទឹក​អូរ​នោះ​ទេ។ ជាមួយ​គ្នា​នេះ​លោក​បាន​បន្ត​ថា គម្លាត​ចម្ងាយ​ដែល​មាន​ទឹក​ពុល​ស្លាប់​ត្រី​មាន​ចម្ងាយ​ប្រហែល​ជា​៣​គីឡូម៉ែត​ចាប់​ពី​ចំណុច​ទឹក​ធ្លាក់​៣២ អតីត​ជា​កន្លែង​រណសិរ្ស​២៥០​ចាស់ មក​ដល់​មណ្ឌល​សុខភាព​នៅ​សិរីមានជ័យ​ក្នុង​ស្រុក​សំពៅលូន ខេត្ត​បាត់ដំបង។

គួរ​បញ្ជាក់​ថា ទឹក​អូរ​ព្រំដែន​គីឡូ​១៣ មាន​ប្រភព​ហូរ​មក​ពី​ភ្នំ​៥៣ ហៅ​ថា​ភ្នំ​ព្រឹក នៅ​ក្នុង​ស្រុក​ភ្នំ​ព្រឹក ហូរ​ចែក​គ្នា​ពី​ទិស​ខាង​ជើង កាត់​តាម​ស្រុក​ក្នុង​ខេត្ត​បាត់ដំបង​ដល់​ក្រុង​ប៉ោយប៉ែត​និង​បឹង​ទន្លេសាប ចំណែក​ការហូរ​ទៅ​ទិស​ខាង​ត្បូង​ហូរ​ធ្លាក់​ទៅ​ស្រុក​កំរៀង ទៅ​ភ្នំ​កុយ ចូល​ស្ទឹង​ក្នុង​ស្រុក​បវេល និង​បន្ត​ហូរ​ទៅ​ស្រុក​សេរីសោភ័ណ ខេត្ត​បន្ទាយមានជ័យ។

ក្រុម​អ្នក​ភូមិ​ដែល​សង់​លំនៅ​ឋាន​នៅ​តាម​មាត់​អូរ​ក្នុង​ទឹក​ដី​ខ្មែរ​បាន​ថ្លែង​ថា នៅ​ក្នុង​អូរ​តំាង​ពី​ដើម​មក​មិន​ដែល​ធ្លាប់​មាន​ការពុល​ស្លាប់​ត្រី​ដូច​ពេល​នេះ​ទេ ទោះ​បី​មាន​ភ្លៀង​ធ្លាក់​ខ្លាំង​យ៉ាង​ណា​ក៏​ដោយ។

ពួក​គេ​បន្ត​ថា ទឹក​អូរ​ព្រំដែន​គីឡូ​១៣​នោះ​ក្រុម​អ្នក​ភូមិ​បាន​ប្រើប្រាស់​សម្រាប់​ងូត​និង​បោក​គក់​ខោ​អាវ ប៉ុន្តែ​មិន​ទទួល​ទាន​ទេ។

មន្ត្រី​សុខាភិបាល​បាន​អំពាវនាវ​ឲ្យ​ពលរដ្ឋ​មាន​ការប្រុង​ប្រយ័ត្ន​នៅ​ក្នុង​ការប្រើប្រាស់​ទឹក​អូរ​ដែល​កំពុង​តែ​មាន​សារធាតុ​ពុល​នោះ៕

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល