ការ​ចាប់​ខ្លួន​អ្នក​កាសែត​នៅ​ក្រចេះ​ស្ថិត​ក្នុង​ភាព​មិន​ប្រក្រតី

អ្នក​កាសែត​ក្នុង​ស្រុក​មួយ​រូប ដែល​តុលាការ​ខេត្ត​ក្រចេះ សម្រេច​ឃុំ​ខ្លួន​អស់​រយៈពេល​ជិត​ពីរ​ខែ​មក​ហើយ ក្រោម​បទ​ចោទ​ថា «កំហែង​យក» នោះ មក​ទល់​ពេល​នេះ​តុលាការ​មិន​ទាន់​បើក​សវនាការ​សួរ​នាំ​នៅ​ឡើយ។
ដោយ ទីន ហ្សាការីយ៉ា
2013.01.29
Share on WhatsApp
Share on WhatsApp
គំនរ​ឈើ​ខុស​ច្បាប់ ខេត្ត​ក្រចេះ ៣០៥ ១០-ធ្នូ-២០១២៖ គំនរ​ឈើ​សុក្រំ ផ្ចឹក ត្បែង ទំហំ​មុខ​៥០​ឡើង​ទៅ ប្រមាណ ៦០​ដើម ត្រូវ​ក្រុមហ៊ុន​៧២ បាន​ប្រមូល និង​ដឹក​ចេញ​ភ្លាមៗ​តាម​ច្រក​ប៉ុស្តិ៍​អូរថ្ម ទៅ​ប្រទេស​វៀតណាម។
Photo by ADHOC

មន្ត្រី​ផ្នែក​សិទ្ធិ​មនុស្ស​បាន​លើក​ឡើង​ថា ការ​ចាប់​ខ្លួន​អ្នក​កាសែត​រូប​នេះ ឋិត​ក្នុង​ភាព​អាថ៌កំបាំង ដែល​ជាប់​ទាក់ទង​នឹង​បទល្មើស​ជួញដូរ​ខុស​ច្បាប់។

អ្នក​កាសែត​នៃ​សមាគម​អ្នក​ព័ត៌មាន​ខ្មែរ​ប្រជាធិបតេយ្យ លោក តាំង ទ្រី បាន​ឲ្យ​ដឹង​ពី​ពន្ធនាគារ​នៅ​ខែត្រ​ក្រចេះ ថា តុលាការ​មិន​ទាន់​យក​រូប​លោក​ទៅ​សួរ​នាំ​នៅ​ឡើយ​ទេ បន្ទាប់​ពី​ប្រធាន​ផ្នែក​រដ្ឋបាល​ព្រៃឈើ​បាន​ចាប់​ខ្លួន​លោក​កាល​ពី​ដើម​ខែ​ធ្នូ ឆ្នាំ​២០១២ មក​នោះ។

លោក តាំង ទ្រី បាន​ឲ្យ​ដឹង​កាល​ពី​ថ្ងៃ​ទី​២៧ មករា ថា លោក​រង់ចាំ​តុលាការ​នាំ​ខ្លួន​លោក​ពី​ពន្ធនាគារ​ទៅ​សួរ​នាំ​អំពី​ការ​ចោទ​ប្រកាន់​ប្រឆាំង​នឹង​លោក ពី​បទ​កំហែង​យក​នោះ ដែល​គេ​ចោទ​លោក​ថា បាន​ឃាត់​ឡាន​ដឹក​ឈើ​ជំរិត​ទារ​លុយ កាល​ពី​ថ្ងៃ​ទី​៧ ធ្នូ កន្លង​ទៅ។

លោក តាំង ទ្រី បាន​សម្ដែង​ពី​ការ​ហួស​ចិត្ត​ថា កាល​ពី​ថ្ងៃ​ទី​៧ ខែ​ធ្នូ ឆ្នាំ​២០១២ លោក​បាន​ឃើញ​ឈ្មួញ​ឈ្មោះ អឿន ដឹក​ឈើ​បម្រុង​យក​ទៅ​លក់​នៅ​ប្រទេស​វៀតណាម តាម​ច្រក​អូលាវ ស្រុក​ស្នួល ហើយ​លោក​បាន​រាយការណ៍​ទៅ​ប្រធាន​រដ្ឋបាល​ព្រៃ​ឈើ​ខែត្រ​ក្រចេះ និង​ព្រះរាជអាជ្ញា​សាលាដំបូង​ខែត្រ គឺ​អ្នកស្រី ចាត សូរស្មី។

បន្ទាប់​ពី​រាយការណ៍​រួច ស្រាប់​តែ​សមត្ថកិច្ច​ស្រុក​ស្នួល ឃាត់​ឡាន​ដឹក​ឈើ និង​ចាប់​ទាំង​ម្ចាស់​ឡាន​ឈ្មោះ អឿន យក​ទៅ​អធិការ​ស្រុក។ បន្ទាប់​មក ប្រធាន​ផ្នែក​រដ្ឋបាល​ព្រៃឈើ​ស្រុក​ស្នួល លោក ប្រាក់ សំបូរ បាន​កោះ​ហៅ​លោក​ទៅ​សួរ​នាំ រួច​ចោទ​លោក​ថា លោក​បាន​ឃាត់​ឡាន​ឈើ​ជំរិត​ទារ​លុយ ២៥.០០​០រៀល។ លុះ​ព្រឹក​ថ្ងៃ​ទី​៨ ធ្នូ គេ​បញ្ជូន​លោក​មក​តុលាការ និង​បញ្ជូន​ដាក់​ពន្ធនាគារ​ខែត្រ​ក្រចេះ។

លោក តាំង ទ្រី អះអាង​ថា លោក​មិន​បាន​ជំរិត​ទារ​លុយ​ពី​ឡាន​ដឹក​ឈើ​នោះ​ទេ។ លោក​បញ្ជាក់​ថា ការ​រក​ស៊ី​ដឹក​ឈើ​យក​ទៅ​លក់​នៅ​ប្រទេស​វៀតណាម​នេះ ជាប់​ពាក់ព័ន្ធ​នឹង​មន្ត្រី​រដ្ឋបាល​ព្រៃ​ឈើ​ស្រុក​ស្នួល ពីព្រោះ​ថា នៅ​ពេល​គេ​កោះ​ហៅ​លោក​ទៅ​សួរ​នាំ​នោះ លោក ប្រាក់ សំបូរ បាន​យក​ម៉ាស៊ីន​ថត​របស់​លោក​ដែល​លោក​បាន​ថត​ពី​សកម្មភាព​ដឹក​ជញ្ជូន​ឈើ​នោះ​លុប​រូបថត​ក្នុង​ម៉ាស៊ីន​ចោល​ទាំង​អស់។

លោក តាំង ទ្រី បាន​លើក​ឡើង​ទៀត​ថា បន្ទាប់​ពី​សមត្ថកិច្ច​ស្រុក​ស្នួល និង​មន្ត្រី​រដ្ឋបាល​ព្រៃ​ឈើ​បាន​បញ្ជូន​លោក​មក​ដាក់​ពន្ធនាគារ​រួច គេ​ដោះលែង​ឡាន​ដឹក​ឈើ និង​ម្ចាស់​ឈ្មោះ អឿន នោះ​វិញ គេ​មិន​បាន​បង្ក​សំណុំ​រឿង​បញ្ជូន​មក​តុលាការ​នោះ​ទេ។ លោក តាំង ទ្រី អះអាង​ថា ការ​ចាប់​ខ្លួន​លោក​មក​ដាក់​គុក​នេះ​ជា​រឿង​អយុត្តិធម៌​មួយ ពីព្រោះ​ថា អ្នក​ដឹក​ឈើ​ខុស​ច្បាប់​បែរ​ជា​រួច​ខ្លួន​ទៅ​វិញ។

ទាក់ទង​នឹង​បញ្ហា​នេះ ប្រធាន​ផ្នែក​រដ្ឋបាល​ព្រៃ​ឈើ​ស្រុក​ស្នួល លោក ប្រាក់ សំបូរ មិន​ធ្វើ​អត្ថាធិប្បាយ​អំពី​បញ្ហា​នេះ​ទេ កាល​ពី​ថ្ងៃ​ទី​២៧ មករា។

ចៅក្រម​ស៊ើបសួរ​សាលាដំបូង​ខែត្រ​ក្រចេះ អ្នកស្រី ហេង ផល្លា បាន​ឲ្យ​ដឹង​ថា ករណី​លោក តាំង ទ្រី នេះ អ្នកស្រី​កំពុង​ធ្វើ​ការ​ស៊ើប​អង្កេត​មិន​ទាន់​ចប់​ទេ ដូច្នេះ​តុលាការ​ក៏​មិន​ទាន់​កំណត់​កាល​បរិច្ឆេទ​បើក​សវនាការ​ថា នឹង​ធ្វើ​នៅ​ថ្ងៃ​ណា​នៅ​ឡើយ​ដែរ។ ប៉ុន្តែ​នៅ​ពេល​សួរ​ថា ហេតុ​អ្វី​បាន​ជា​តុលាការ​មិន​ធ្វើ​ការ​ស៊ើប​អង្កេត​ទៅ​លើ​ដើម​បណ្ដឹង​ដែល​លោក តាំង ទ្រី អះអាង​ថា ជា​ឈ្មួញ​ជួញ​ដូរ​ឈើ​នោះ?

អ្នកស្រី ហេង ផល្លា បាន​បំភ្លឺ​ថា តុលាការ​ធ្វើ​ការ​ស៊ើប​អង្កេត​ទៅ​តាម​របាយការណ៍​របស់​ប៉ូលិស​ទេ៖ «ខ្ញុំ​អត់​ដឹង​ទេ គ្រាន់​តែ​ថា​ខ្ញុំ​ស៊ើប​សួរ​តាម​ការ​ចោទ​ប្រកាន់​របស់​តំណាង​អយ្យការ សាច់​រឿង​ហ្នឹង​គេ​ចោទ​ប្រកាន់​លើ​ឈ្មោះ តាំង ទ្រី ហើយ​ការ​ស៊ើប​សួរ​របស់​ខ្ញុំ​អត់​ទាន់​ចប់...»

ទោះ​បី​ជា​យ៉ាង​នេះ​ក្ដី មន្ត្រី​ស៊ើប​អង្កេត​ជាន់​ខ្ពស់​នៃ​អង្គការ​សិទ្ធិ​មនុស្ស​លីកាដូ លោក អំ សំអាត បាន​ពន្យល់​ថា ការ​ចោទ​ប្រកាន់​លោក តាំង ទ្រី នេះ គឺ​ធ្វើ​ឡើង​ដោយ​ភាព​មិន​ប្រក្រតី។ លោក អំ សំអាត លើក​ឡើង​ថា ជា​ទូទៅ​គេ​ត្រូវ​លើក​ទឹក​ចិត្ត​ដល់​ប្រជាពលរដ្ឋ ឬ​អ្នក​កាសែត​នៅ​ពេល​រាយការណ៍​អំពី​ការ​ដឹក​ជញ្ជូន​ឈើ​ខុស​ច្បាប់។ ម្យ៉ាង​វិញ​ទៀត លោក​បញ្ជាក់​ថា ទោះ​បី​ជា​មន្ត្រី​រដ្ឋបាល​ព្រៃឈើ​ចាប់​បាន​ឡាន​ឈើ ហើយ​រក​ឃើញ​ថា ឡាន​ដឹក​ឈើ​នោះ​ដឹក​ស្រប​ច្បាប់​ក្ដី គេ​មិន​ត្រូវ​ចាប់​អ្នក​រាយការណ៍​ផ្ដល់​ព័ត៌មាន​នោះ​ដែរ។

មន្ត្រី​នៃ​អង្គការ​ទប់​ស្កាត់​បទល្មើស​ព្រៃឈើ និង​សត្វព្រៃ នៅ​ខែត្រ​ក្រចេះ បាន​ឲ្យ​ដឹង​ថា មូល​ហេតុ​សំខាន់​ដែល​បណ្ដាល​ឲ្យ​សមត្ថកិច្ច​ចាប់​ខ្លួន​លោក តាំង ទ្រី គឺ​បណ្ដាល​មក​ពី​គាត់​បាន​រាយការណ៍​ពី​ការ​ជួញដូរ​ឈើ​ខុស​ច្បាប់​ប៉ះ​ចំ​អ្នក​ជួញដូរ​ឈើ​នោះ​ជា​មនុស្ស​មាន​ឥទ្ធិពល​ខ្លាំង ហើយ​តែងតែ​ប្រព្រឹត្ត​បទល្មើស​ជួញដូរ​ឈើ​គ្មាន​ខ្លាចរអា​សមត្ថកិច្ច​នោះ​ទេ។ ម្យ៉ាង​ទៀត មន្ត្រី​រដ្ឋបាល​ព្រៃឈើ​មួយ​ចំនួន​នៅ​ខែត្រ​ក្រចេះ ជាប់​ពាក់ព័ន្ធ​ការ និង​ការ​ដឹក​ជញ្ជូន​ឈើ​ខុស​ច្បាប់​នេះ​ដែរ។

ភ្ជាប់​ទៅ​នឹង​បញ្ហា​នេះ លោក អំ សំអាត បាន​បញ្ជាក់​ថា បញ្ហា​នេះ​តុលាការ​ត្រូវ​តែ​ធ្វើ​ការ​ស៊ើប​អង្កេត​ឲ្យ​បាន​ច្បាស់​លាស់ ដើម្បី​រក​យុត្តិធម៌​ជូន​លោក តាំង ទ្រី ដែល​កំពុង​ជាប់​នៅ​ក្នុង​ពន្ធនាគារ​នោះ។ លោក​បញ្ជាក់​ថា តុលាការ​ត្រូវ​តែ​ធ្វើ​ការ​ឲ្យ​ឯករាជ្យ និង​ស្វែង​រក​អ្នក​ជាប់​ពាក់ព័ន្ធ​នឹង​ការ​ដឹក​ឈើ​នោះ​យក​មក​ផ្ដន្ទាទោស​តាម​ច្បាប់។

ម្យ៉ាង​វិញ​ទៀត មក​ទល់​ពេល​នេះ​លោក តាំង ទ្រី មិន​ទាន់​មាន​មេធាវី​ការពារ​ក្ដី​នៅ​ឡើយ​ទេ។ លោក តាំង ទ្រី បញ្ជាក់​ថា មូលហេតុ​ដែល​អូស​បន្លាយ​ពេល​រក​មេធាវី​នេះ ដោយសារ​តែ​មិត្ត​របស់​គាត់​ឈ្មោះ អ៊ឹង តារា ហៅ ដា បាន​យក​ឡាន​គាត់​ទៅ​លក់ ហើយ​សន្យា​ថា នឹង​យក​លុយ​លក់​ឡាន​ទៅ​ជួល​មេធាវី​ឯកជន​ដើម្បី​ការពារ។ ផ្ទុយ​ទៅ​វិញ មិត្ត​របស់​គាត់​ឈ្មោះ អ៊ឹង តារា ហៅ ដា នោះ មិន​បាន​យក​លុយ​ថ្លៃ​លក់​ឡាន​ជួល​មេធាវី​ឲ្យ​គាត់​ទេ គេ​បាន​គេច​ខ្លួន​បាត់។

ភ្ជាប់​នឹង​បញ្ហា​នេះ ប្រធាន​សមាគម​អ្នក​សារព័ត៌មាន​ខ្មែរ លោក សុខ សុវណ្ណ បាន​ឲ្យ​ដឹង​ថា លោក​នឹង​រក​មេធាវី​ដើម្បី​ការពារ​លោក តាំង ទ្រី នៅ​ក្នុង​ពេល​ឆាប់ៗ​នេះ។ លោក សុខ សុវណ្ណ បញ្ជាក់​ថា កន្លង​មក​លោក​មិន​ទាន់​រក​មេធាវី​ជូន​លោក តាំង ទ្រី នេះ ដោយសារ​តែ​ក្រុម​គ្រួសារ​របស់​លោក​ឃាត់​ឲ្យ​ផ្អាក​សិន ពីព្រោះ​មាន​មិត្តភ័ក្ដិ​លោក តាំង ទ្រី កំពុង​រត់ការ​ហើយ ទី​បញ្ចប់​មិត្តភ័ក្ដិ​លោក តាំង ទ្រី បាន​មិន​បាន​ជួយ​រក​មេធាវី​ឲ្យ​ទេ។

លោក សុខ សុវណ្ណ បាន​លើក​ឡើង​ទៀត​ថា លោក​នឹង​ដាក់​លិខិត​ទៅ​តុលាការ​ខែត្រ​ក្រចេះ ដើម្បី​សុំ​ជួប​សួរ​នាំ​អំពី​ករណី​ចាប់​ខ្លួន​លោក តាំង ទ្រី នេះ ឲ្យ​បាន​ច្បាស់លាស់ និង​ស្នើ​តុលាការ​ឲ្យ​ដោះលែង​លោក តាំង ទ្រី នៅ​ក្រៅ​ឃុំ​ជា​បណ្ដោះអាសន្ន តាម​រយៈ​ឲ្យ​មេធាវី​ធានា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
លោក​នាយក​រដ្ឋមន្ត្រី ហ៊ុន សែន ប្រកាស​មិន​ជួប​អ្នក​គាំទ្រ នៅ​បុរី​ញូវយ៉ក ខណៈ​គណបក្ស​ប្រឆាំង​គ្រោង​ធ្វើ​បាតុកម្ម​ប្រឆាំង​លោក
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។