ញឹក ប៊ុនឆៃ គ្រោងធ្វើបាតុកម្មនៅមុខស្ថានីយទូរទស្សន៍ CTN

មន្ត្រីជាន់ខ្ពស់គណបក្សហ៊្វុនស៊ិនប៉ិចបានដាក់ពាក្យទៅសាលាក្រុងភ្នំពេញដើម្បីសុំធ្វើបាតុកម្មនៅមុខស្ថានីយបណ្តាញទូរទស្សន៍កម្ពុជា CTN តវ៉ាចំពោះម្ចាស់ស្ថានីយដែលអនុញ្ញាតឲ្យអ្នកធ្វើអត្ថាធិប្បាយប្រើពាក្យបន្តុះបង្អាប់និងប៉ះពាល់ដល់កិតិ្តយសគណបក្សហ៊្វុនស៊ិនប៉ិច កាលពីពេលថ្មីកន្លងមកនេះ។

ដោយ មុំ សុផុន
2009-03-16

សុផុន031509

អគ្គលេខាធិការគណបក្សហ៊្វុនស៊ិនប៉ិច លោក ញឹក ប៊ុនឆៃ បានថ្លែងបញ្ជាក់ថា សមាជិកសមាជិការបស់គណបក្សហ៊្វុនស៊ិនប៉ិច មានការខឹងសម្បាជាមួយនឹងការធ្វើអត្ថាធិប្បាយរបស់លោក សយ សុភាព ដែលជាអ្នកធ្វើអត្ថាធិប្បាយព័ត៌មាននៅស្ថានីយទូរទស្សន៍ CTN នោះ។

លោកបញ្ជាក់ទៀតថា ការធ្វើបាតុកម្មនោះ សមាជិកសមាជិការបស់គណបក្សហ៊្វុនស៊ិនប៉ិច គ្រោងចូលរួមប្រមាណពីរពាន់នាក់។

លោក ញឹក ប៊ុនឆៃ មានប្រសាសន៍ដូច្នេះថា ៖ «ខ្ញុំមិនបាតុកម្មបញ្ឈប់ទេ ខ្ញុំបាតុកម្ម សុំច្បាប់គេទៅបាតុកម្មប្រឆាំងស៊ីធីអិន ដែលឲ្យផ្សាយព័ត៌មានអានដោយ សយ សុភាព ហ្នឹង ទី១ និយាយប៉ះពាល់រាជានិយម ទី២ ញុះញង់ឲ្យមានបញ្ហារវាងគណបក្សហ៊្វុនស៊ិនប៉ិច និងគណបក្សប្រជាជន ហើយទី៣ គាត់អំពាវនាវឲ្យក្រុមប្រឹក្សាឃុំរបស់ហ៊្វុនស៊ិនប៉ិចហ្នឹង ទៅចុះចូលជាមួយគណបក្សប្រជាជន ដែលសុទ្ធតែជាប្រការមួយដែលធ្វើខុសផ្ទុយនឹងច្បាប់ ជាមួយក្រមសីលធម៌អីទាំងអស់»។

អ្នកអត្ថាធិប្បាយព័ត៌មាននយោបាយនៅស្ថានីយបណ្តាញទូរទស្សន៍កម្ពុជា ហៅថា CTN លោក សយ សុភាព បានថ្លែងប្រាប់វិទ្យុអាស៊ីសេរីនៅថ្ងៃអាទិត្យនេះថា លោកធ្លាប់បានអត្ថាធិប្បាយព័ត៌មានមួយចំនួនដែលទាក់ទងនឹងគណបក្សហ៊្វុនស៊ិនប៉ិច ហើយចំពោះការធ្វើបាតុកម្មនោះគឺជាសិទ្ធិរបស់បុគ្គល។

លោក សយ សុភាព ដែលបានបម្រើការងារឲ្យស្ថានីយទូរទស្សន៍ CTN ៥ឆ្នាំហើយនោះ បានថ្លែងឲ្យដឹងទៀតថា ប្រសិនបើកើតមានការធ្វើបាតុកម្មនោះ ហើយអ្នកគ្រប់គ្រងស្ថានីយបណ្តាញទូរទស្សន៍កម្ពុជាបញ្ឈប់រូបគាត់ពីការងារនោះ ក៏មិនមានបញ្ហាអ្វីឡើយ។

លោក សយ សុភាព មានប្រសាសន៍ដូច្នេះថា ៖ «យប់ថ្ងៃព្រហស្បតិ៍មុនហ្នឹង ខ្ញុំធ្វើអត្ថាធិប្បាយទាក់ទងពីបញ្ហារឿងស្បថ គឺខ្ញុំបានលើកឡើង ព្រោះទាក់ទងទៅនឹងគណបក្សហ៊្វុនស៊ិនប៉ិច គណបក្ស នរោត្ដម រណឫទ្ធិ ដែលថាទៅស្បថនៅព្រះអង្គគោកធ្លក នៅកន្លែងដ៏ស័ក្ដិសិទ្ធិ។ ហើយខ្ញុំនិយាយនយោបាយជាទូទៅថា កាលពី ៩៨ នាំគ្នាចោទគណបក្សប្រជាជនថា គេសុទ្ធតែបង្ខំឲ្យគេស្បថ រួចដល់ឥឡូវមកដើរតាមគេ។ ហើយខ្ញុំ ខ្ញុំប្រាប់ថា ខ្ញុំមិនជឿថា គណបក្សប្រជាជន គេបានឲ្យទៅស្បថទេ ប៉ុន្តែដល់ពេលមកខ្លួនឯងហ្នឹង នាំគ្នាទៅស្បថ។ ហើយខ្ញុំចុងក្រោយ ខ្ញុំនិយាយមួយម៉ាត់អ៊ីចឹងទៅ ខ្ញុំថាវាមិនផេះទេ បោះឆ្នោតឲ្យគណបក្សប្រជាជនទាំងអស់ទៅវាស្រួលជាង ខ្ញុំនិយាយអ៊ីចឹងមែន តែគាត់ប្ដឹងខ្ញុំអី ខ្ញុំក៏អត់ដឹងដែរ»។

ទាក់ទងនឹងការស្នើសុំធ្វើបាតុកម្មនេះ មន្ត្រីសាលាក្រុងភ្នំពេញមិនអាចទំនាក់ទំនងដើម្បីសុំការបញ្ជាក់បានទេនៅថ្ងៃអាទិត្យនេះ ហើយគេនៅមិនទាន់ដឹងនៅឡើយថា អាជ្ញាធរក្រុងភ្នំពេញនឹងអនុញ្ញាតឲ្យធ្វើបាតុកម្មនៅមុខស្ថានីយទូរទស្សន៍ CTN នោះដែរឬយ៉ាងណានៅឡើយ។

សូមបញ្ជាក់ថា នេះគឺជាលើកដំបូងហើយដែលអ្នកនយោបាយសុំធ្វើបាតុកម្មប្រឆាំងនឹងអ្នកធ្វើអត្ថាធិប្បាយព័ត៌មាននៅស្ថានីយទូរទស្សន៍ឯកជននោះ៕