ជំនួប ហោ ណាំហុង និង កាស៊ីត ភិរម្យ

រដ្ឋ​មន្ត្រី​ក្រសួង​ការ​បរទេស​កម្ពុជា លោក ហោ ណាំ​ហុង នៅ​រសៀល​ថ្ងៃ​ព្រហស្បតិ៍ ទី​៣០ ខែ​ធ្នូ បាន​អះអាង​ថា ជន​ជាតិ​ថៃ​ចំនួន ៧​រូប ដែល​អាជ្ញាធរ​ខ្មែរ​ចាប់​ខ្លួន​បាន កាល​ពី​ថ្ងៃ​ទី​២៩ ខែ​ធ្នូ កន្លង​ទៅ​នេះ មាន​ចេតនា​ចូល​មក​ក្នុង​ទឹក​ដី​ខ្មែរ​ទាំង​បំពាន​យ៉ាង​ពិត​ប្រាកដ មិន​មែន​ជា​ការ​វង្វេង​ផ្លូវ​នោះ​ទេ។
ដោយ គឹម ពៅ
2010-12-30
អ៊ីម៉ែល
មតិ
Share
បោះពុម្ព
រដ្ឋមន្ត្រី​ក្រសួង​ការបរទេស​ថៃ លោក កាស៊ីត ភិរម្យ (Kasit Piromya) [ឆ្វេង] និង​រដ្ឋមន្ត្រី​ក្រសួង​ការបរទេស​កម្ពុជា លោក ហោ ណាំហុង​ [ស្ដាំ] ធ្វើ​សន្និសីទ​កាសែត​នៅ​ក្រសួង​ការបរទេស​កម្ពុជា កាល​ពី​ថ្ងៃ​ទី​៣០ ខែ​ធ្នូ ឆ្នាំ​២០១០។
រដ្ឋមន្ត្រី​ក្រសួង​ការបរទេស​ថៃ លោក កាស៊ីត ភិរម្យ (Kasit Piromya) [ឆ្វេង] និង​រដ្ឋមន្ត្រី​ក្រសួង​ការបរទេស​កម្ពុជា លោក ហោ ណាំហុង​ [ស្ដាំ] ធ្វើ​សន្និសីទ​កាសែត​នៅ​ក្រសួង​ការបរទេស​កម្ពុជា កាល​ពី​ថ្ងៃ​ទី​៣០ ខែ​ធ្នូ ឆ្នាំ​២០១០។
RFA/Mom Sophon

មាន​ប្រសាសន៍​នៅ​ក្នុង​សន្និសីទ​កាសែត នៅ​រសៀល​ម៉ោង​៤ ក្រោយ​ពី​ជំនួប​ជា​មួយ​រដ្ឋ​មន្ត្រី​ការ​បរទេស​ថៃ លោក កាស៊ីត ភិរម្យ (Kasit Piromya) ដែល​បាន​អញ្ជើញ​មក​ដល់​កម្ពុជា​ជា​បន្ទាន់ ក្រោយ​ពី​ការ​ចាប់​ខ្លួន​ជន​ជាតិ​ថៃ ៧​រូប​នោះ ដើម្បី​ស្វែង​រក​ការ​ដោះ​លែង លោក ហោ ណាំ​ហុង បាន​បដិសេធ​​ថា រដ្ឋាភិបាល​ខ្មែរ​ហួស​សមត្ថភាព​ក្នុង​ការ​ដោះ​លែង​ហើយ។ គេ​បាន​ទុក​ឲ្យ​តុលាការ​ខ្មែរ​សម្រេច​ទៅ​តាម​នីតិ​វិធី​របស់​តុលាការ​នៅ​ក្នុង​រឿង​នេះ។

លោក ហោ ណាំ​ហុង អះអាង​បន្ថែម​ដូច្នេះ ៖ "ដូច្នេះ​មិន​មែន​ជា​អចេតនា វង្វេង​ផ្លូវ​មក​ដល់​ព្រំដែន​ទេ គឺ​មាន​ចេតនា​មក​ដល់​ភូមិ​កម្ពុជា​យើង"

លោក ហោ ណាំ​ហុង បាន​បញ្ជាក់​ទៀត​ថា ការ​ចូល​លុកលុយ​មក​ក្នុង​ទឹក​ដី​ខ្មែរ​ពី​សំណាក់​ជន​ជាតិ​ថៃ បាន​ធ្វើ​ឡើង​ចំនួន ៣​លើក​រួច​មក​ហើយ ដែល​លើក​ទី​១ ធ្វើ​ឡើង​នៅ​ក្នុង​ខែ​កក្កដា និង​លើក​ទី​២ នៅ​ក្នុង​ខែ​កញ្ញា​កន្លង​ទៅ។

ការ​ឆ្លង​ដែន​ចូល​ទឹក​ដី​កម្ពុជា​ខុស​ច្បាប់ ពី​សំណាក់​ជន​ជាតិ​ថៃ​ចំនួន ៧​រូប កាល​ពី​ថ្ងៃ​ពុធ​ ទី​២៩ ខែ​ធ្នូ កន្លង​ទៅ​នេះ បាន​ធ្វើ​ឡើង​នៅ​ក្នុង​ភូមិ​ជ័យ​ជោគ នៅ​ក្នុង​ស្រុក​អូរជ្រៅ ប្រទេស​កម្ពុជា ដែល​មាន​ចម្ងាយ ៤០០​ម៉ែត្រ ពី​ទល់​ដែន​ថៃ។

លោក ហោ ណាំ​ហុង បាន​ថ្លែង​ថា ជន​ជាតិ​ថៃ​ទាំង​នោះ បាន​ដើរ​តាម​បង្គោល​ព្រំដែន​លេខ​១៤៦ ដែល​គិត​ជា​ចម្ងាយ​មាន​ប្រមាណ ១.២០០​ម៉ែត្រ​មក​ក្នុង​ដី​ខ្មែរ។

លោក កាស៊ីត ភិរម្យ រដ្ឋ​មន្ត្រី​ក្រសួង​ការ​បរទេស​ថៃ ដែល​មាន​ប្រសាសន៍​តាម​រយៈ​អ្នក​បក​ប្រែ​ឲ្យ​ដឹង​ថា លោក​មិន​បាន​ដឹង​ថា ជន​ជាតិ​ថៃ​ទាំង​នោះ បាន​ចូល​មក​ដល់​ដី​ខ្មែរ​យ៉ាង​ជម្រៅ​ដូច្នេះ​ទេ ហើយ​លោក​បាន​យល់​ព្រម​ទុក​ឲ្យ​ស្ថាប័ន​តុលាការ​ខ្មែរ​ជា​អ្នក​សម្រេច​រឿង​នេះ​ផង​ដែរ ដោយ​សុំ​ឲ្យ​មាន​ការ​ពន្លឿន​រឿង​នេះ​ឲ្យ​បាន​ឆាប់។

ទាក់​ទង​នឹង​បញ្ហា​ស្ថានភាព​ប្រឈម​មុខ​ដាក់​គ្នា​រវាង​ប្រទេស​ទាំង​ពីរ លោក កាស៊ីត ភិរម្យ បាន​ធានា​អះអាង​ដូច្នេះ​ថា ៖ "ដូច្នេះ យើង​ឃើញ​ថា ទំនាស់​ទាស់​ទែង​គ្នា​រវាង​ប្រទេស​យើង​ទាំង​ពីរ​មិន​មាន​កើត​ឡើង​ទេ យើង​មាន​នយោបាយ​របស់​យើង។ ការ​ណែនាំ​ដល់​កង​កម្លាំង​នៃ​ប្រទេស​ទាំង​ពីរ ក៏​ច្បាស់​លាស់​ផង​ដែរ"

លោក ហោ ណាំ​ហុង និង​លោក កាស៊ីត ភិរម្យ បញ្ជាក់​ថា កិច្ច​សហ​ប្រតិបត្តិការ​នៃ​ប្រទេស​ទាំង​ពីរ​នៅ​ល្អ​នៅ​ឡើយ មិន​មាន​ការ​ទាក់​ទង​នឹង​បញ្ហា​ចាប់​ខ្លួន​​ជន​ជាតិ​ថៃ​នោះ​ឡើយ៕

ព័ត៌មាន (0)
Share
គេហទំព័រ​ទាំងមូល