នៅក្នុងសន្និសីទកាសែតនាព្រឹកថ្ងៃច័ន្ទនេះលទ្ធផលបណ្តោះអាសន្នរបស់ខុមហ្វ្រែលដែលធ្វើឡើងដោយក្រុមអ្នកសង្កេតការណ៍ចំនួន ១១៧០ការិយាល័យបោះឆ្នោត បានបង្ហាញថាគណបក្សប្រជាជនកម្ពុជា ទទួលបាននូវការគាំទ្រចំនួន ៥៨,២២% បន្ទាប់មកគឺគណបក្សសមរង្ស៊ី ទទួលបាន ២១,៨% គណបក្សសិទ្ធិមនុស្សទទួលបាន ៦,៣៧% គណបក្ស នរោត្តម រណឫរិទ្ធ ទទួលបាន ៥,៦៧% គណបក្សហ៊្វុនស៊ិនប៉ិច ទទួលបាន ៥,០៤% ។
សមាជិកគណៈនាយករបស់របស់ខុមហ្រ្វែល លោក ធន សារ៉ាយ មានប្រសាសន៍ថាគេពិបាកនឹងទទួលស្គាល់ថា លទ្ធផលបោះឆ្នោតនោះធ្វើឡើងដោយសេរីនិងយុត្តិធម៌ណាស់ ដោយសារតែបញ្ហាជាច្រើនដូចជា មនុស្សរាប់ម៉ឺននាក់បានបាត់ឈ្មោះនៅក្នុងបញ្ជីជាដើម ។
លោក ធន សារ៉ាយ បានឲ្យដឹងថា ៖ «យើងឃើញថាគណបក្សប្រឆាំងលោកទាមទារឲ្យមានការបោះឆ្នោតឡើងវិញនៅភ្នំពេញ ។ ខ្ញុំគិតថារឿងបញ្ជីឈ្មោះនេះគឺជារឿងមួយធំជាងគេនៅក្នុងដំណើរការនៃការបោះឆ្នោតនេះ» ។
របាយការណ៍នៃភាពមិនប្រក្រតីរបស់អង្គការខុមហ្វ្រែលបានបញ្ជាក់ថា អ្នកគាំទ្រគណបក្សផ្សេងៗទៀតចំនួន៦ម៉ឺននាក់ត្រូវបានបាត់ឈ្មោះនៅក្នុងបញ្ជីអ្នកបោះឆ្នោត នៅបន្ទាប់ពីគណៈកម្មាធិការជាតិរៀបចំការបោះឆ្នោត (គ.ជ.ប.) បានធ្វើការសម្អាតបញ្ជីឈ្មោះនៅមុនថ្ងៃបោះឆ្នោត ។ បន្ទាប់ពីនោះទៀតរបៀបបោះឆ្នោតស្មុគស្មាញនាំឲ្យអ្នកបោះឆ្នោតធុញថប់ ហើយនៅមានការឃោសនាដែលធ្វើឡើងមិនស្មើភាពគ្នាទាល់តែសោះ ។
លោក ធន សារ៉ាយ បន្ថែមទៀតថាលទ្ធផលដែលគណបក្សប្រជាជនកម្ពុជានាំមុខគេ នាំឲ្យមានការបារម្ភខ្លាំងអំពីសេរីភាពនៃការសម្ដែងមតិនិងលទ្ធិប្រជាធិបតេយ្យ នាពេលឆាប់ៗខាងមុខនេះ តាមរយៈការកាន់អំណាចផ្ដាច់មុខម្នាក់ឯង ។
លោក ធន សារ៉ាយ បានមានប្រសាសន៍ថា ៖ «សំឡេងដែលមាននៅក្នុងសភាលើកនេះ គឺថាលើសពី២ភាគ៣ទៅទៀត ។ អ៊ីចឹងយើងមានការព្រួយបារម្ភដែរនៅពេលខាងមុខនេះ លំហនៃលទ្ធិប្រជាធិបតេយ្យ លំហនៃសេរីភាពដែលយើងនឹងទទួលបាននេះនឹងអាចជួបប្រទះនូវការលំបាក» ។
តាមលទ្ធផលបណ្តោះអាសន្នរបស់អង្គការខុមហ្រ្វែល គណបក្សប្រជាជនកម្ពុជា បានទទួលអាសនៈប្រហែល ៩១កៅអី គណបក្សសមរង្ស៊ី បានទទួល ២៦កៅអី គណបក្សសិទ្ធិមនុស្ស បាន ៣កៅអី នៅខេត្តកំពង់ចាម កណ្តាល និងព្រៃវែង គណបក្ស នរោត្តម រណឫទ្ធិ បាន ២កៅអី នៅខេត្តព្រៃវែងនិងកំពង់ចាម រីឯគណបក្សហ៊្វុនស៊ិនប៉ិចដែលជាគណបក្សធ្លាប់ទទួលបានការគាំទ្រពីមហាជនធំជាងគេ ពេលនេះបានទទួលអាសនៈសរុបចំនួន ១កៅអី នៅខេត្តកំពង់ធំប៉ុណ្ណោះ ។ ក្រៅពីនោះគណបក្សផ្សេងៗទៀតមិនទទួលបានអាសនៈទាល់តែសោះ ៕