ខារ៉ាម​ស្នើ​រដ្ឋាភិបាល​ប្រទេស​សមាជិក​អាស៊ាន​ការពារ​ពលករ​ចំណាក​ស្រុក

ពលករ​ចំណាក​ស្រុក​ត្រូវ​បាន​អង្គការ​ក្រៅ​រដ្ឋាភិបាល​នៃ​ប្រទេស​អាស៊ាន​ស្វែង​រក​វិធានការ​ផ្លូវ​ច្បាប់ ដើម្បី​ជួយ​ការពារ​សិទ្ធិ​ពលករ​ទាំង​នោះ ក្នុង​ពេល​កំពុង​ធ្វើ​ការងារ ពេល​ទទួល​ប្រាក់​កម្រៃ និង​ការ​ទារ​លុយ ឬ​ហៅ​ថា បង់​ពន្ធ ពេល​ពលករ​វិល​មក​ស្រុក​កំណើត​វិញ​ជាដើម។
ដោយ អ៊ុក សាវបូរី
2013-02-16
Share
យ៉ា ណាវុធ ៣០៥ នាយក​អង្គការ​ខារ៉ាម​កម្ពុជា (CARAM Cambodia) លោក យ៉ា ណាវុធ (ឆ្វេង) នៅ​ក្នុង​សិក្ខាសាលា​ស្ដីពី​វេទិកា​ពលករ​ទេសន្តរប្រវេសន៍​អាស៊ាន នៅ​សណ្ឋាគារ​សាន់វ៉េ (Sunway Hotel) កាល​ពី​ថ្ងៃ​សុក្រ ទី១៥ ខែ​កុម្ភៈ ឆ្នាំ​២០១៣។
RFA/Ouk Savborey

អង្គការ​ក្រៅ​រដ្ឋាភិបាល​ក្នុង និង​ក្រៅ​ប្រទេស ដែល​ធ្វើ​ការ​ពាក់ព័ន្ធ​ពលករ​ចំណាក​ស្រុក បាន​ជួប​ជុំ​គ្នា​បង្កើត​អនុសាសន៍​ត្រៀម​ដាក់​ចូល​រួម​ប្រជុំ​អាស៊ាន​លើក​ទី៦ ឆ្នាំ​២០១៣ នៅ​ប្រទេស​ប្រ៊ុយណេ ដើម្បី​បង្កើន​កិច្ច​ជួយ​ការពារ​សិទ្ធិ​ពលករ​ចំណាក​ស្រុក។

នាយក​អង្គការ​ខារ៉ាម​កម្ពុជា (CARAM Cambodia) លោក យ៉ា ណាវុធ ថ្លែង​នៅ​ថ្ងៃ​សុក្រ ទី១៥ ខែ​កុម្ភៈ ថា កាល​ពី​ខែ​តុលា ឆ្នាំ​២០១២ កន្លង​មក ក្រសួង​ការងារ​នៃ​ប្រទេស​តំបន់​អាស៊ាន និង​សង្គម​ស៊ីវិល បាន​ប្រជុំ​លើក​ទី៥ នៅ​ប្រទេស​កម្ពុជា។ ការ​ប្រជុំ​នោះ​បាន​បង្កើត​អនុសាសន៍ ៥​ចំណុច ដើម្បី​ឲ្យ​ប្រទេស​ទទួល​ពលករ និង​ប្រទេស​បញ្ជូន​ពលករ អនុវត្ត​អនុសាសន៍​នោះ ដើម្បី​ការពារ​សិទ្ធិ​ពលករ​ទេសន្តរប្រវេសន៍​អាស៊ាន។

លោក​ថា នៅ​ក្នុង​សេចក្តី​ប្រកាស​អាស៊ាន បាន​អនុម័ត​ពី​ឆ្នាំ​២០០៧ មាន​មាត្រា​មួយ​បាន​ឲ្យ​ប្រទេស​នីមួយៗ​បង្កើត​លិខិតុបករណ៍​អាស៊ាន។ រហូត​មក​ដល់​ពេល​នេះ លិខិតុបករណ៍​នោះ​នៅ​ក្នុង​ពង្រាង និង​កំពុង​ជំទាស់​រវាង​ប្រទេស​ទទួល​ពលករ និង​ប្រទេស​បញ្ជូន​ពលករ​នៅ​ក្នុង​តំបន់​អាស៊ាន មិន​ទាន់​ចេញ​ជា​ផ្លូវការ ដើម្បី​ការពារ​សិទ្ធិ​ពលករ​ទេ៖ «ពិនិត្យ​មើល​ទៅ​ក្នុង​អនុសាសន៍ តើ​មាន​ចំណុច​ណា​ដែល​អត់​ទាន់​ធ្វើ​បាន ចំណុច​ណា​ដែល​ធ្វើ​បាន ដើម្បី​យើង​ធ្វើ​ផែនការ​បន្ត​សម្រាប់​ឆ្នាំ​២០១៣»

តំណាង​អង្គការ​យូអិន​វូមីន (UN Women) លោក រស់ វ៉ា ថ្លែង​ថា នៅ​តំបន់​អាស៊ាន​មាន​ពលករ​ចំណាក​ស្រុក​កើន​ច្រើន តែ​មិន​មាន​ច្បាប់​ជួយ​ការពារ​ទេ។ បញ្ហា​នេះ​នាំ​ឲ្យ​អង្គការ​សហប្រជាជាតិ និង​ប្រទេស​តំបន់​អាស៊ាន និង​ប្រទេស​បញ្ជូន​ពលករ និង​ប្រទេស​ទទួល​ពលករ ត្រូវ​រួម​គ្នា​ដើម្បី​ជួយ​ការពារ​សិទ្ធិ​ពលករ។ ប្រទេស​ក្នុង​តំបន់​អាស៊ាន​ខ្លះ មិន​ទាន់​ផ្តល់​សច្ចាប័ន​ទៅ​លើ​អនុសញ្ញា​១៨៩ ស្ដីពី​ការ​ការពារ​ពលករ​ចំណាក​ស្រុក ដើម្បី​បង្កើត​ច្បាប់​ការពារ​សិទ្ធិ​ពលករ​នៅ​ឡើយ។

លោក រស់ វ៉ា៖ «ពេល​ខ្លះ​យើង​ផ្ដោត​អារម្មណ៍​តែ​នៅ​ក្នុង​ប្រទេស ប៉ុន្តែ​ចុះ​បញ្ហា​កើត​ឡើង​នៅ​ក្រៅ​ប្រទេស។ អ្នក​ណា​ទទួល​ខុស​ត្រូវ? ខ្ញុំ​ឃើញ​ថា ទាំង​រដ្ឋាភិបាល ទាំង​សង្គម​ស៊ីវិល ផ្ដោត​អារម្មណ៍​ណាស់​ទាក់​ទង​អប់រំ ផ្សព្វផ្សាយ​តាម​សហគមន៍ ក៏​ដូច​ខាង​ប្រព័ន្ធ​ផ្សព្វផ្សាយ ការ​កសាង​ចំណេះ​ដឹង​ផ្សេងៗ។ ប៉ុន្តែ​ជាក់ស្តែង ឥឡូវ​ពលករ​កើន​ឡើង​នៅ​ប្រទេស​ម៉ាឡេ អ្នក​ណា​ទទួល​ខុស​ត្រូវ អ្នក​ណា​ដោះស្រាយ។ ខ្ញុំ​គិត​ថា​នេះ​ជា​មូលហេតុ​មួយ​ដែល​យើង​មក​ជួប​ជុំ​គ្នា»

តំណាង​ក្រុម​ការងារ​ថ្នាក់​តំបន់​ពលករ​អាស៊ាន លោក ស៊ីណាផាន សាមីដូរ៉ៃ (Sinapan Samydorai) ថ្លែង​ថា ពលករ​ចំណាក​ស្រុក​រង​នូវ​ការ​មិន​គោរព​សិទ្ធិ​ពី​សំណាក់​ក្រុមហ៊ុន​នាំ​ពលករ ប៉ូលិស ឬ​អាជ្ញាធរ ដែល​ចាំ​ទារ​លុយ​ពី​ពលករ​ដែល​ចប់​កុងត្រា​ការងារ​ពេល​ត្រឡប់​មក​ប្រទេស​ខ្លួន​វិញ។ លោក​ថា ចំពោះ​អ្នក​បម្រើ​តាម​ផ្ទះ ក៏​មិន​ទាន់​មាន​ច្បាប់​ការពារ​គ្នា​ដែរ ដែល​អង្គការ​ក្រៅ​រដ្ឋាភិបាល​គួរ​រៀបចំ​ដើម្បី​ឲ្យ​មាន​ការ​ពិភាក្សា​ពេល​ប្រជុំ​អាស៊ាន​លើក​ទី៦ ឆ្នាំ​២០១៣ នៅ​ប្រទេស​ប្រ៊ុយណេ។

លោក យ៉ា ណាវុធ ឲ្យ​ដឹង​ថា ពលករ​ទៅ​ធ្វើ​ការ​នៅ​ប្រទេស​ថៃ ស្រប​ច្បាប់ និង​ខុស​ច្បាប់​ប្រហែល​ជាង ៤០​ម៉ឺន​នាក់ នៅ​ប្រទេស​ម៉ាឡេស៊ី ប្រហែល​ជាង ៥​ម៉ឺន​នាក់ នៅ​ប្រទេស​កូរ៉េ ជាង ២​ម៉ឺន​នាក់។ លោក​ថា អនុសាសន៍​ចំនួន​៥ ដែល​បាន​កំណត់​ក្នុង​ការ​ប្រជុំ​អាស៊ាន​លើក​ទី៥ នៅ​ប្រទេស​កម្ពុជា ដែល​នឹង​ត្រូវ​ពិនិត្យ​ដើម្បី​ការពារ​សិទ្ធិ​ពលករ​ទេសន្តរប្រវេសន៍​អាស៊ាន គឺ​ទី១ ចែក​រំលែក​បទ​ពិសោធន៍​គ្នា​ទៅ​វិញ​ទៅ​មក ជុំវិញ​ស្ថានភាព​ពលករ​ចំណាក​ស្រុក។ ទី២ ពិនិត្យ​មើល​សកម្មភាព​អនុវត្តន៍​ឆ្នាំ​២០១២ ជួប​បញ្ហា​អ្វី និង​ជោគជ័យ​អ្វី​ក្នុង​ការ​ការពារ និង​លើក​កម្ពស់​ពលករ​ចំណាក​ស្រុក។

ទី៣ រក​យុទ្ធសាស្ត្រ​បង្កើន​ការពារ​បន្ថែម​សម្រាប់​ជួយ​ពលករ​កម្ពុជា និង​បណ្ដា​ប្រទេស​តំបន់​អាស៊ាន។ ទី៤ រួម​គ្នា​ធ្វើ​ផែនការ​រួម​មួយ​សម្រាប់​ការ​ប្រជុំ​លើក​ទី៦ ឆ្នាំ​២០១៣ នៅ​ប្រទេស​ប្រ៊ុយណេ។ ទី៥ ធ្វើ​ការងារ​រួម​គ្នា​ឲ្យ​បាន​ល្អ​ជាង​មុន​រវាង​សង្គម​ស៊ីវិល សហជីព និង​ភាគី​ពាក់ព័ន្ធ ដើម្បី​បង្កើន​កិច្ច​ការពារ​ពលករ​ចំណាក​ស្រុក​ឲ្យ​បាន​ប្រសើរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល