និពន្ធនាយកកាសែតកោះសន្តិភាព លោក ជា សយនា បានមានប្រសាសន៍យ៉ាងដូច្នេះថា ៖ «អ៊ីចឹងទេធ្វើឲ្យអ្នកកាសែត អ្នកយកព័ត៌មានហ្នឹងមានការពិបាកក្នុងការទទួលព័ត៌មានហ្នឹង ដោយសារតែក្រសួងមន្ទីរផ្សេងៗហ្នឹងមិនទាន់មានមន្ត្រីព័ត៌មាន អ្នកនាំពាក្យឲ្យបានត្រឹមត្រូវ។ អ៊ីចឹងវេទិកាយើងនេះ វេទិកាលើកទី៥នេះ គឺគោលបំណងរបស់យើង បើខ្ញុំក្នុងនាមកោះសន្តិភាព ខ្ញុំចង់សំណូមពរទៅរាជរដ្ឋាភិបាលឬក៏ក្រសួងព័ត៌មានដែលជាម៉ែជាឪហ្នឹងមេត្តានាំពាក្យទៅថាឲ្យរដ្ឋាភិបាលហ្នឹងមេត្តាជួយជំរុញឲ្យមានបណ្ដាក្រសួងនានា មន្ទីរនានាហ្នឹងមានអ្នកនាំពាក្យ។ ឥឡូវហ្នឹងមានបើកវគ្គបណ្ដុះបណ្ដាលអ្នកនាំពាក្យខ្លះៗហើយ ប៉ុន្តែមិនទាន់បានទទួលលទ្ធផលស្អីជាផ្លែផ្កាដុំកំភួនទេ អ្នកយកព័ត៌មាននៅតែជួបប្រទះការលំបាកដដែល។ យកមក ប្រចាំគ្នាមួយទៅមួយ ឆ្លើយដាក់ មួយរុញទៅមួយៗ ដូចមិនទទួលខុសត្រូវក្នុងការផ្ដល់ព័ត៌មានទេ»។
ចំណែកឯអនុប្រធានក្រុមអ្នកយកព័ត៌មានកាសែតភ្នំពេញប៉ុស្តិ៍ លោក នេត្រ ភក្ត្រា បានមានប្រសាសន៍យ៉ាងដូច្នេះ ៖ «និងដើម្បីធ្វើឲ្យលំហូរព័ត៌មានរវាងក្រុមអាជ្ញាធរខេត្ត ខណ្ឌ និងភូមិ ឃុំ និងសាធារណជនកាន់តែល្អប្រសើរនោះ គឺយើងត្រូវធ្វើយ៉ាងម៉េចបង្កើតឲ្យមាន Systemមួយដែលស្ថិតនៅក្នុងអនុសាសន៍របស់ខ្ញុំ ខ្ញុំលើកក្នុងនាមជាអ្នកសារព័ត៌មានហើយក៏ក្នុងនាមតំណាងឲ្យសារព័ត៌មានភ្នំពេញប៉ុស្តិ៍ដែរ ដែលពួកយើងបានជួបប្រទះរាល់ថ្ងៃ គឺធ្វើយ៉ាងម៉េចជាមួយនឹងខេត្តក្រុងហ្នឹងស្នើឲ្យរដ្ឋាភិបាលកម្ពុជា ជាពិសេសក្រសួងព័ត៌មានគួរតែបន្តរៀបចំវគ្គបណ្ដុះបណ្ដាលនិងត្រូវបង្កើតឲ្យមានអ្នកនាំពាក្យឬមន្ត្រីព័ត៌មានសម្រាប់ថ្នាក់ខណ្ឌ ថ្នាក់ខេត្តនិងថ្នាក់ស្រុក ដូចជារដ្ឋាភិបាលនិងដៃគូអភិវឌ្ឍន៍បានធ្វើរួចមកហើយនៅក្នុងខេត្តសៀមរាបនិងខេត្តបាត់ដំបង។ ហើយអ្វីដែលយើងអាចមើលច្បាស់ជាងហ្នឹងទៀតគឺសាលាក្ដីខ្មែរក្រហម ដោយសារតែយើងបង្កើតឲ្យមានអ្នកនាំពាក្យគឺយើងមានភាពងាយស្រួលនៅក្នុងការទទួលបានព័ត៌មាន»។
សូមជម្រាបថា ការជួបជុំរបស់អ្នកកាសែតកម្ពុជាប្រមាណ៤០រូបនេះបានធ្វើឡើងនៅក្នុងវេទិកានិពន្ធនាយកលើកទី៥ដែលរៀបចំឡើងដោយក្លឹបអ្នកកាសែតកម្ពុជា។
ការជួបជុំត្រូវបានគេរៀបចំជារៀងរាល់ឆ្នាំដើម្បីជាឱកាសឲ្យអ្នកចូលរួមលើកឡើងអំពីការលំបាកនានារបស់អ្នកកាសែតក្នុងការសរសេរនិងយកព័ត៌មានដើម្បីធ្វើយ៉ាងណាឲ្យអ្នកកាសែតសរសេរព័ត៌មានបានត្រឹមត្រូវ មានតុល្យភាព ទទួលបានការជឿជាក់ពីអ្នកអាននិងអ្នកស្ដាប់ ពីព្រោះនៅក្នុងឱកាសជួបជុំគ្នានោះមានមន្ត្រីជាន់ខ្ពស់តំណាងក្រសួងព័ត៌មានចូលរួមស្ដាប់ការលើកឡើងរបស់អ្នកកាសែតផងដែរ៕