ព្រះអង្គម្ចាស់ ស៊ីសុវត្ថិ ធម្មិកោ ទីប្រឹក្សាអមព្រះរាជខុទ្ទកាល័យព្រះមហាក្សត្របានមានបន្ទូលប្រាប់វិទ្យុអាស៊ីសេរីថា តាមព្រះរាជសាររបស់ព្រះមហាវីរក្សត្រនៅថ្ងៃ២៥ ធ្នូនេះ បានបញ្ជាក់ថា គ្រូពេទ្យបានរកឃើញថា ព្រះអង្គមានរោគមហារីកថ្មីទៀតហើយ ៖ «លោកបានបញ្ជាក់ថា គ្រូពេទ្យចិនបានរកឃើញមហារីកសាច់ថ្មី ហើយលោកបានបញ្ជាក់ទៀតថា មហារីកហ្នឹងកើតនៅទីតាំងដែលស្រួលព្យាបាល ហេតុដូច្នេះវេជ្ជបណ្ឌិតចិនគេមានសង្ឃឹមច្រើនក្នុងការព្យាបាលលោកជា»។
ព្រះអង្គម្ចាស់បានបញ្ជាក់ថា នៅក្នុងព្រះរាជសារនោះមិនបានបញ្ជាក់ពីពេលវេលាដែលត្រូវព្យាបាលនោះទេ ដូច្នេះក៏មិនអាចដឹងពីពេលវេលាណាដែលត្រូវយាងត្រឡប់មកវិញឡើយ។
ប៉ុន្តែទោះជាយ៉ាងណាក៏ដោយ ព្រះអង្គម្ចាស់ ស៊ីសុវត្ថិ ធម្មិកោ បានមានបន្ទូលដែរថា ស្ថានភាពព្រះរោគរបស់ព្រះមហាវីរក្សត្រប្រហែលជាមិនធ្ងន់ធ្ងរទេ ៖ «ខ្ញុំសូមបញ្ជាក់ទៀតថា ក្នុងព្រះរាជសាររបស់លោកទាំងប៉ុន្មាន លោកបានសរសេរផ្ទាល់ព្រះហស្ថរបស់ព្រះអង្គ ហើយតាមមើលទៅអក្សរដែលលោកសរសេរ មិនមែនជាអក្សរញ័រឡើយ គឺថា ស្មើរហូត ហេតុដូច្នេះបានន័យថា លោកទ្រង់ការបាននៅឡើយទេ ហើយរៀងរាល់ថ្ងៃលោករៀបចំឯកសារដើម្បីផ្សាយតាមវ៉ឹបសាយថ៍របស់លោក ដូច្នេះយើងអាចសន្និដ្ឋានថា មិនធ្ងន់ធ្ងរទេ»។
គួរបញ្ជាក់ថា ព្រះមហាវីរក្សត្រ សម្តេចព្រះ នរោត្តម សីហនុ ដែលមានព្រះជន្ម ៨៧ព្រះវស្សា ទ្រង់ធ្លាប់មានព្រះរាជបន្ទូលរួចម្តងហើយ ដែលចេញផ្សាយក្នុងទំព័រវ៉ឹបសាយថ៍របស់ព្រះអង្គថា ព្រះរោគារបស់ព្រះអង្គកាន់តែមានសភាពធ្ងន់ធ្ងរទៅៗ ហើយមើលទៅហាក់ដូចជាព្រះអង្គមិនអាចមានព្រះជន្មរស់នៅបានយូរតទៅទៀតឡើយ។
យោងតាមព្រះរាជលិខិតជាភាសាបារាំងដែលឡាយដោយព្រះហស្តព្រះអង្គផ្ទាល់ កាលពីដើមខែធ្នូ កន្លងមកនេះ សម្តេចព្រះ នរោត្តម សីហនុ ទ្រង់មានព្រះរាជឱង្ការថា ក្រុមវេជ្ជបណ្ឌិតជំនាញចិន អត់ហ៊ាននិយាយអំពីមរណភាពរបស់ព្រះអង្គដែលមានវ័យចំណាស់នោះទេ ប៉ុន្តែបានទូលប្រាប់ព្រះរាជអគ្គមហេសី សម្តេចព្រះ នរោត្តម មុនីនាថ សីហនុ ថា ប្រសិនបើក្នុងករណីជាបន្ទាន់ណាមួយនោះ សម្តេចព្រះ នរោត្តម សីហនុ ទ្រង់គួរសម្រាកព្យាបាលនៅក្នុងមន្ទីរពេទ្យ។
សម្តេចព្រះ នរោត្តម សីហនុ មានព្រះរាជបន្ទូលបន្តថា ព្រះអង្គទ្រង់ចង់សុគតក្នុងព្រះរាជដំណាក់ជាជាងនៅក្នុងមន្ទីរពេទ្យ។
ព្រះអង្គទ្រង់បានត្រូវក្រុមវេជ្ជបណ្ឌិតជំនាញចិនបង្កើនការត្រួតពិនិត្យព្រះរោគព្រះអង្គដែលមានជំងឺមហារីក ទឹកនោមផ្អែម និងជំងឺលើសឈាម ពីម្តងក្នុងមួយសប្តាហ៍មកជាច្រើនដងវិញ ហើយពេលខ្លះពិនិត្យពីរដងក្នុងមួយថ្ងៃក៏មាន៕