លោក ជា សេងអ៊ី ជាប្រជាពលរដ្ឋរស់នៅក្នុងភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល បានមានប្រសាសន៍ថា ដីសហគមន៍នោះជាដីកម្មសិទ្ធិរបស់ពួកគាត់ដែលបានកាន់កាប់តាំងពីឆ្នាំ១៩៧៩មកដែលមានទំហំជិតកន្លះហិកតារ ប៉ុន្តែប៉ុន្មានឆ្នាំកន្លងមកនេះថៅកែឡឥដ្ឋ លោក តាំង ហាំងលី បានទិញដីនៅជុំវិញនោះ ហើយបានធ្វើរបងព័ទ្ធនិងបិទផ្លូវនោះតាំងពីឆ្នាំ២០០៦មក ដែលធ្វើឲ្យពួកគាត់មិនអាចឆ្លងកាត់ចូលទៅធ្វើស្រែនៅដីសហគមន៍នោះបាន។
លោក ជា សេងអ៊ី បានឲ្យដឹងថា ៖ «ខ្ញុំវេទនាណាស់ ពួកខ្ញុំមិនដឹងរកអីបាន ឥឡូវពិការទៀតមិនដឹងធ្វើអី អាងតែដីស្រែហ្នឹង»។
ប្រជាពលរដ្ឋម្នាក់ទៀតឈ្មោះ ជ័យ សំណាង បានមានប្រសាសន៍ថា លោក តាំង ហាំងលី បានបិទផ្លូវជាបន្តបន្ទាប់ចំនួនបីផ្លូវហើយដែលជាច្រកចូលទៅដីស្រែនោះ។
លោកបានបញ្ជាក់ថា ការធ្វើដូច្នេះគឺដើម្បីឲ្យពួកគាត់លក់ដីឲ្យថៅកែនោះក្នុងតម្លៃថោកដែលមិនអាចទទួលយកបានព្រោះកាលពីមុនលោកបានទិញដីពីប្រជាពលរដ្ឋនៅជុំវិញក្នុងតម្លៃថោកដែរនោះ។
លោកក៏បានដាក់ពាក្យបណ្តឹងទៅតុលាការខេត្តកណ្តាលតាំងពីថ្ងៃ៣១ ខែកក្កដា ឆ្នាំ២០០៧កន្លងទៅ ប៉ុន្តែនៅថ្ងៃទី២៣ ខែធ្នូ ឆ្នាំ២០០៨ខាងមុខនេះ ទើបតុលាការកោះហៅបើកសវនាការជំនុំជម្រះ។
លោក ជ័យ សំណាង បានបញ្ជាក់ថា ៖ «សំណូមពរទៅខាងរដ្ឋសភាអន្តរាគមន៍ឲ្យថៅកែឡឥដ្ឋហ្នឹងគេបើកផ្លូវឲ្យពួកខ្ញុំវិញផង»។
ជុំវិញការចោទប្រកាន់ខាងលើ លោក តាំង ហាំងលី បានឆ្លើយបំភ្លឺតាមទូរស័ព្ទប្រាប់វិទ្យុអាស៊ីសេរីឲ្យដឹងថា ផ្លូវដែលលោកធ្វើរបងបិទនោះពុំមែនជាផ្លូវសាធារណៈនោះទេគឺជាផ្លូវដែលស្ថិតនៅក្នុងដីរបស់លោកតាំងពីយូរមក។
លោក តាំង ហាំងលី បានឲ្យដឹងថា ៖ «ដីកំណាត់លើហ្នឹងខ្ញុំទិញធ្វើឡពីរដ្ឋអំណាច គេចេះតែដើរកាត់តាមឡខ្ញុំទៅធ្វើស្រូវអាក្រោមៗទៅ អ្នកខ្លះក៏គ្នាខ្វះលុយខ្វះកាក់អីអ៊ីចឹងទៅ ចេះតែលក់ឲ្យខ្ញុំហ្នឹងជាហូរហែមកវាអស់ទៅហើយដីហ្នឹង»។
រីឯមេឃុំដីឥដ្ឋ គឺលោក ស៊ុត តូ បានបដិសេធមិននិយាយអំពីបញ្ហានេះ។
ទោះជាយ៉ាងណាជំនួយការ លោក យឹម សុវណ្ណ អ្នកតំណាងរាស្រ្តខេត្តកណ្តាលគណបក្សសមរង្ស៊ី និងជាប្រធានសេវាកម្មច្បាប់របស់គណបក្សសមរង្ស៊ី គឺលោក ពេជ វាសនា បានមានប្រសាសន៍ថា កន្លងមក លោក តាំង ហាំងលី បានបិទផ្លូវសាធារណៈនិងឲ្យប្រជាពលរដ្ឋទាំងនោះដើរតាមផ្ទះគាត់ ប៉ុន្តែពេលនេះបានបិទផ្លូវទាំងអស់ដែលធ្វើឲ្យប្រជាពលរដ្ឋខកខានក្នុងការធ្វើស្រែ ហើយលោកសង្ឃឹមថា តុលាការខេត្តកណ្តាលនិងជួយរកយុត្តិធម៌ជូនប្រជាពលរដ្ឋទាំងនោះ។
សូមជម្រាបថា យោងតាមតំណាងប្រជាពលរដ្ឋនោះបានឲ្យដឹងថា ដីសហគមន៍នោះមានជាង២០គ្រួសារ ហើយចំនួនជាង១០គ្រួសារបានលក់ឲ្យថៅកែឡឥដ្ឋនោះតាំងពីឆ្នាំ១៩៩០មកជាបន្តបន្ទាប់ ហើយនៅចំនួន១០គ្រួសារមិនទាន់លក់ ប៉ុន្តែ៥គ្រួសារផ្សេងទៀតមិនហ៊ានដាក់ពាក្យបណ្តឹងទេ ព្រោះខ្លាចថៅកែឡឥដ្ឋនោះជាអ្នកមាន៕