តុលាការ​ស្នើ​ឲ្យ​សភា​កាត់​ប្រាក់​ខែ​​លោកស្រី មូរ ​សុខ​ហួរ

តុលាការ​ក្រុង​ភ្នំពេញ​បាន​ស្នើ​ឲ្យ​រដ្ឋ​សភា​កាត់​ប្រាក់​ខែ​តំណាង​រាស្ត្រ ​គណបក្ស​ជំទាស់ លោក​ស្រី មូរ សុខហួរ ដើម្បី​សង​ជំងឺ​ចិត្ត​លោក​នាយក​រដ្ឋ​មន្ត្រី ហ៊ុន សែន។
ដោយ យន់ សាមៀន
2010-07-21
អ៊ីម៉ែល
មតិ
Share
បោះពុម្ព
១៩-ឧសភា-២០១០: សាលា​ដំបូង​រាជធានី​ភ្នំពេញ
១៩-ឧសភា-២០១០: សាលា​ដំបូង​រាជធានី​ភ្នំពេញ
RFA/Sok Serey

ចៅក្រម​តុលាការ​ក្រុង​ភ្នំពេញ លោក ជា សុខ​ហៀង នៅ​ថ្ងៃ​អង្គារ ទី​២០ កក្កដា បាន​សម្រេច​ស្នើ​សុំ​ឲ្យ​រដ្ឋ​សភា​កម្ពុជា រឹប​អូស​ប្រាក់​ខែ​រដ្ឋ​សភា​របស់​លោក​ស្រី មូរ សុខ​ហួរ ក្នុង​មួយ​ខែ ៤​លាន ២​សែន ៤​ពាន់ ៨​រយ និង​៩៩​រៀល ដើម្បី​សង​ជំងឺ​ចិត្ត​លោក ហ៊ុន សែន។

តុលាការ​កាត់​ឲ្យ​លោក​ស្រី​បង់​ប្រាក់​ពិន័យ​ជំងឺ​ចិត្ត​លោក ហ៊ុន សែន ចំនួន ៨​លាន​រៀល និង ៨​លាន ៥​សែន​រៀល​ទៅ​ឲ្យ​រតនាគារ​ក្រុង​ភ្នំពេញ។

លោក ជា សុខ​ហៀង ក៏​បាន​បញ្ជា​ឲ្យ​លោក​ស្រី មូរ សុខ​ហួរ មិន​ត្រូវ​រារាំង​ចាត់​ចែង ឬ​ហាម​ឃាត់​មន្ត្រី​ទទួល​បើក​ប្រាក់​ខែ​របស់​រដ្ឋ​សភា ចំពោះ​ការ​រឹប​អូស​បំណុល​នេះ​ទេ។

សមាជិក​គណៈកម្មាធិការ​អចិន្ត្រៃយ៍​រដ្ឋសភា លោក ជាម យៀប មាន​ប្រសាសន៍​នៅ​ថ្ងៃ​ពុធ ទី​២១ កក្កដា​ថា រដ្ឋ​សភា​កម្ពុជា ប្ដេជ្ញា​នឹង​កាត់​ប្រាក់​ខែ​រដ្ឋ​សភា​របស់​តំណាង​រាស្ត្រ​គណបក្ស​ជំទាស់ លោក​ស្រី មូរ សុខ​ហួរ ដើម្បី​យក​ប្រាក់​ទៅ​សង​ជំងឺ​ចិត្ត​លោក​នាយក​រដ្ឋ​មន្រ្តី ហ៊ុន សែន ក្នុង​ករណី​ដែល​តុលាការ​ក្រុង​ភ្នំពេញ​កាត់​ឲ្យ​លោក​ស្រី​ចាញ់​ក្តី ក្នុង​ករណី​បរិហារកេរ្តិ៍​លោក ហ៊ុន សែន។

លោក ជាម យៀប មាន​ប្រសាសន៍​នៅ​ថ្ងៃ​ពុធ ទី​២១ កក្កដា​ថា រដ្ឋ​សភា​កម្ពុជា​គ្មាន​ជម្រើស​ក្រៅ​ពី​កាត់​ប្រាក់​ខែ​រដ្ឋសភា​របស់​លោក​ស្រី មូរ សុខ​ហួរ ដើម្បី​សង​ប្រាក់​ពិន័យ​ជំងឺ​ចិត្ត​របស់​លោក ហ៊ុន សែន។ លោក​ថា ទោះបី​ជា​បទ​បញ្ជា​ផ្ទៃ​ក្នុង​របស់​រដ្ឋសភា មិន​អនុញ្ញាត​ឲ្យ​រដ្ឋសភា​កាត់​ប្រាក់​ខែ​អ្នក​តំណាង​រាស្ត្រ​ក៏​ដោយ ប៉ុន្តែ​សភា​មិន​អាច​ប្រឆាំង​ការ​សម្រេច​របស់​តុលាការ ដើម្បី​បង្ខំ​កាត់​ប្រាក់​ខែ​លោក​ស្រី មូរ សុខ​ហួរ បាន​ទេ។

លោក​ថា​ប្រាក់​ខែ​របស់​លោក​ស្រី មូរ សុខ​ហួរ គិត​ជា​ទឹក​ប្រាក់ ប្រមាណ ៨​លាន​រៀល ក្នុង​មួយ​ខែ។ ហើយ​រដ្ឋសភា​អាច​កាត់​ពី ៧០​ភាព​រយ នៃ​ទឹក​ប្រាក់​ខែ​សរុប​របស់​លោក​ស្រី មូរ សុខ​ហួរ។

លោក​ស្រី មូរ សុខ​ហួរ មាន​ប្រសាសន៍​នៅ​ថ្ងៃ​ពុធ​ដែរ​ថា លោក​ស្រី​មិន​សុខ​ចិត្ត​ឲ្យ​រដ្ឋ​សភា​កម្ពុជា​កាត់​ប្រាក់​ខែ​លោក​ស្រី ហើយ​ប្រសិន​បើ​រដ្ឋ​សភា​កាត់​ប្រាក់​ខែ​លោក​ស្រី​មែន​នេះ ជា​ការ​រំលោភ​សិទ្ធិ​របស់​អ្នក​តំណាង​រាស្ត្រ។ លោក​ស្រី​ថា ការ​រឹប​អូស​ប្រាក់​នេះ មិន​ប៉ះ​ពាល់​ដល់​ការ​បំពេញ​ការ​ងារ​ជួយ​រាស្ត្រ​របស់​លោក​ស្រី​ទេ។

តុលាការ​កម្ពុជា​នៅ​តែ​បន្ត​ការ​អនុវត្ត​ផាក​ពិន័យ​លោក​ស្រី មូរ សុខ​ហួរ ទោះបី​ជា​មាន​ការ​រិះ​គន់​ថា ករណី​របស់​លោក​ស្រី មូរ សុខ​ហួរ ជា​ករណី​នយោបាយ។ ហើយ​ករណី​នេះ ជា​ការ​បង្ហាញ​ពី​ភាព​ធ្លាក់​ចុះ​នៃ​សិទ្ធិ​បញ្ចេញ​មតិ​នៅ​កម្ពុជា៕

ព័ត៌មាន (1)
Share

អ្នក​អាន​អនាមិក

The court orders are:
1- Pay penalty
2- Go to jail.
Mrs Sok Hour has selected "going to jail". Why the court still want her to pay?. That is not right. She has already pick one of two options of the court.

Jul 22, 2010 09:41 PM

គេហទំព័រ​ទាំងមូល