មេធាវី៖ អាការៈជំងឺលោក នួន ជា មានសភាពកាន់តែធ្ងន់ធ្ងរ
2013.02.05
នួន ជា ក្នុងអំឡុងពេលសវនាការបឋមលើសំណុំរឿង ០០២ ថ្ងៃទី៣ នាសាលាក្ដីខ្មែរក្រហម នៅថ្ងៃទី២៩ ខែមិថុនា ឆ្នាំ២០១១។
មេធាវីការពារក្ដីឱ្យជនជាប់ចោទ នួន ជា គឺលោក សុន អរុណ ថ្លែងឱ្យដឹងនៅថ្ងៃទី៤ កុម្ភៈ ថា កូនក្ដីរបស់លោកដែលកំពុងសម្រាកព្យាបាលជំងឺនៅមន្ទីរពេទ្យមិត្តភាពខ្មែរ-សូវៀត មានអាការៈកាន់តែធ្ងន់ធ្ងរគួរបារម្ភ។
លោកមេធាវី សុន អរុណ បញ្ជាក់ថា កូនក្ដីរបស់លោក គឺជនជាប់ចោទ នួន ជា ដែលអតីតជាប្រធានសភាប្រជាជនក្នុងរបបកម្ពុជាប្រជាធិបតេយ្យ កំពុងមានអាការចុះខ្សោយកម្លាំង និងមិនសូវមានស្មារតីចងចាំទេ។
លោកមេធាវី សុន អរុណ បន្តថា អាការសុខភាពចុះខ្សោយរបស់កូនក្ដីលោក មានតាំងពីក្នុងអំឡុងពេលគាត់សម្រាកនៅមន្ទីរពេទ្យលើកដំបូងម្ល៉េះ។ ក៏ប៉ុន្តែលោកមិនយល់ទេថា ហេតុអ្វីបានជាកាលពីថ្ងៃទី ៣០ មករា សប្ដាហ៍មុន គ្រូពេទ្យសម្រេចបញ្ចេញកូនក្ដីរបស់លោកទៅមន្ទីរឃុំឃាំងសាលាក្ដីខ្មែរក្រហមវិញ។ នៅថ្ងៃដដែលនោះ លោកតវ៉ាពីការបញ្ជូនកូនក្ដីលោកទៅមន្ទីរឃុំឃាំងវិញ និងទាមទារទៅអង្គជំនុំជម្រះ ឱ្យកោះហៅគ្រូពេទ្យចូលទៅពន្យល់អំពីបញ្ហាស្ថានភាពជនជាប់ចោទនៅក្នុងសវនាការជាសាធារណ។ ក៏ប៉ុន្តែការទាមទាររបស់លោកមេធាវី ត្រូវបានអង្គជំនុំជម្រះបដិសេធ។
លោកមេធាវី សុន អរុណ ថ្លែងថា ជំហរក្រុមការពារក្ដីរបស់លោក នៅតែទាមទារឱ្យគ្រូពេទ្យជួយព្យាបាលកូនក្ដីរបស់លោកឱ្យមានសុខភាពរឹងមាំសិន មុននឹងបញ្ជូនទៅចូលរួមសវនាការ។
ជនជាប់ចោទ នួន ជា ត្រូវបានគេបញ្ជូនទៅមន្ទីរពេទ្យមិត្តភាពខ្មែរ-សូវៀត ភ្លាមៗ កាលពីថ្ងៃទី១៣ មករា ដើម្បីសង្គ្រោះបន្ទាន់ ដោយសារតែគាត់មានបញ្ហាហត់ ខ្សោយអស់កម្លាំង ហើយដួលនៅក្នុងបន្ទប់ឃុំឃាំងនៃសាលាក្ដីខ្មែរក្រហម។ គ្រូពេទ្យរកឃើញថា ស្ថានភាពជំងឺរបស់លោក នួន ជា មានជំងឺរលាកទងសួតធ្ងន់ធ្ងរ។
បន្ទាប់ពីការព្យាបាលនៅមន្ទីរមិត្តភាពខ្មែរ-សូវៀត រយៈពេល ១៨ថ្ងៃ គឺនៅថ្ងៃទី៣១ មករា គ្រូពេទ្យបញ្ជូនជនជាប់ចោទ នួន ជា ទៅសាលាក្ដីខ្មែរក្រហមវិញ។ ក្រោយពេលបញ្ជូនទៅមន្ទីរឃុំឃាំងដើម្បីឱ្យចូលរួមសវនាការវិញបាន ២យប់ ជនជាប់ចោទ នួន ជា ត្រូវបានគេបញ្ជូនចូលមន្ទីរពេទ្យម្ដងទៀត នៅថ្ងៃទី១ កុម្ភៈ ដោយសារបញ្ហាដូចគ្នាដដែល។
លោកមេធាវី សុន អរុណ ថ្លែងថា ស្ថានភាពជំងឺរបស់ជនជាប់ចោទ នួន ជា មិនបានធូរស្បើយទេ សម្រាប់ការចូលរួមសវនាការ តតាំងរឿងក្ដីឧក្រិដ្ឋកម្ម ដែលសាលាក្ដីខ្មែរក្រហមកំពុងចោទប្រកាន់លើរូបគាត់។ លោកមិនចង់ឱ្យការជំនុំជម្រះប្រព្រឹត្តទៅដោយកំបាំងមុខ ឬគ្មានកូនក្ដីលោកទេ។ បើមិនដូច្នេះទេ ការជំនុំជម្រះរឿងក្ដីនេះ នឹងមិនមានយុត្តិធម៌ឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- ខ្មាន់កាំភ្លើងមិនទាន់ហ៊ានលាតត្រដាងមេខ្លោងនៅពីក្រោយ ព្រោះបារម្ភពីសុវត្ថិភាពគ្រួសារ
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី