ឱម យ៉ិនទៀង ទទួល​តំណែង​ជា​ប្រធាន​អង្គភាព​ប្រឆាំង​អំពើ​ពុក​រលួយ

អ្នក​ដឹកនាំ​អង្គការ​ក្រៅ​រដ្ឋាភិបាល និង​សមាជិក​បក្ស​ប្រឆាំង បាន​លើក​ឡើង​ថា ការ​តែងតាំង​លោក ឱម យ៉ិនទៀង ជា​ប្រធាន​អង្គភាព​ប្រឆាំង​អំពើ​ពុក​រលួយ​របស់​រដ្ឋាភិបាល បាន​បង្ហាញ​ថា បក្ស​កាន់​អំណាច​នៅ​កម្ពុជា​មិន​មាន​បំណង​បំបាត់​អំពើ​ពុក​រលួយ​ដោយ​ពិត​ប្រាកដ​ទេ ទោះ​ជា​មាន​ច្បាប់​ប្រឆាំង​អំពើ​ពុក​រលួយ​ក៏​ដោយ។
ដោយ កែវ និមល
2010-05-20
អ៊ីម៉ែល
មតិ
Share
បោះពុម្ព
លោក ឱម យ៉ិនទៀង ប្រធាន​អង្គភាព​ប្រឆាំង​អំពើ​ពុក​រលួយ ដែល​ទើប​បាន​ទទួល​ការ​តែងតាំង​ថ្មី
លោក ឱម យ៉ិនទៀង ប្រធាន​អង្គភាព​ប្រឆាំង​អំពើ​ពុក​រលួយ ដែល​ទើប​បាន​ទទួល​ការ​តែងតាំង​ថ្មី
RFA/Vohar Cheat

លោក ឱម យ៉ិនទៀង ប្រធាន​អង្គភាព​ប្រឆាំង​អំពើ​ពុក​រលួយ ដែល​ទើប​បាន​ទទួល​ការ​តែងតាំង​ពី​ព្រះ​មហាក្សត្រ​កម្ពុជា បាន​មាន​ប្រសាសន៍​នៅ​ថ្ងៃ​ទី​២០ ឧសភា ថា លោក​ចាត់​ទុក​ជា​រឿង​ធម្មតា​ចំពោះ​ការ​រិះគន់​រូប​លោក ដែល​បាន​ទទួល​ការ​តែងតាំង​ជា​ប្រធាន​អង្គភាព​ប្រឆាំង​អំពើ​ពុក​រលួយ​ពី​សំណាក់​មនុស្ស​មួយ​ចំនួន ៖ «...ខ្ញុំ​ថា និយាយ​ប្រឆាំង​យើង​ខ្ញុំ​ជា​រឿង​ធម្មតា​ទេ!»

លោក ឱម យ៉ិនទៀង បាន​មាន​ប្រសាសន៍​ឲ្យ​ដឹង​ទៀត​ថា ការ​បំបាត់​អំពើ​ពុក​រលួយ​ក្នុង​ដំណាក់កាល​ថ្មី ដែល​មាន​ច្បាប់​ប្រឆាំង​អំពើ​ពុក​រលួយ ដែល​រដ្ឋ​សភា​ទើប​បាន​អនុម័ត កាល​ពី​ពេល​ថ្មី​ៗ​នេះ វា​មាន​លក្ខណៈ​អំណោយ​ផល​ជាង​ពី​ពេល​មុន ដែល​កម្ពុជា​មិន​ទាន់​មាន​ច្បាប់​ប្រឆាំង​អំពើ​ពុក​រលួយ។

លោក ឱម យ៉ិនទៀង បាន​បញ្ជាក់​ថា ៖ «...ខ្ញុំ​គិត​ថា អ្នក​ទាំង​អស់​គ្នា​មិន​គួរ​ធ្វើ​មិន​ដឹង មិន​ឮ​ទេ!កន្លង​មក​មាន​តែ​មាត្រា ២​ទេ​នៅ​ក្នុង​ច្បាប់​អន្តរកាល អ៊ុនតាក់ ស្ដីពី​ការ​ផ្ដន្ទា​ទោស​លើ​បញ្ហា​នេះ ហើយ​សមត្ថកិច្ច​ដែល​ធ្វើ​នេះ អត់​មាន​អំណាច​ធ្វើ​អ្វី​ទាំង​អស់! ឥឡូវ​នេះ យើង​មាន​ច្បាប់​ថ្មី​ដែល​ផ្ដល់​ភារកិច្ច ផ្ដល់​អំណាច​ឲ្យ​យើង​ធ្វើ ពិត​មែន​តែ​មិន​មាន​អំណាច​ដល់​មេឃ ប៉ុន្តែ​អាច​សមរម្យ​សម្រាប់​ដំណើរការ​ចាប់ផ្ដើម​ថ្មី​មួយ​ទៀត នៃ​ការងារ​បោស​សម្អាត​អំពើ​ពុក​រលួយ​នៅ​ប្រទេស​កម្ពុជា​យើង...»

នៅ​ក្នុង​ការ​ចេញ​ផ្សាយ​របស់​ព្រឹត្តិបត្រ The Cambodia Daily ថ្ងៃ​ទី​២០ ឧសភា បាន​លើក​សំដី​របស់​លោក យឹម សុវណ្ណ អ្នក​នាំ​ពាក្យ​គណបក្ស សម រង្ស៊ី បាន​មាន​ប្រសាសន៍​ថា ការ​តែងតាំង​លោក ឱម យ៉ិនទៀង ជា​ប្រធាន​អង្គភាព​ប្រឆាំង​អំពើ​ពុក​រលួយ ក្រោយ​ពេល​មាន​ច្បាប់​ប្រឆាំង​អំពើ​ពុក​រលួយ​នោះ​មិន​មាន​អ្វី​ថ្មី​ទេ និង​បាន​បង្ហាញ​ថា ប្រទេស​កម្ពុជា​មិន​មាន​គោលដៅ​នយោបាយ​ពិត​ប្រាកដ​ក្នុង​ការ​លុប​បំបាត់​អំពើ​ពុក​រលួយ​ឡើយ។

លោក សុន ឆ័យ សមាជិក​គណបក្ស សម រង្ស៊ី និង​ជា​សមាជិក​សភា បាន​មាន​ប្រសាសន៍​ចំពោះ​ការ​តែងតាំង​លោក ឱម យ៉ិនទៀង នោះ​ថា ៖ «...ពី​មុន​ទោះ​បី​ជា​មិន​ទាន់​មាន​ច្បាប់​ប្រឆាំង​អំពើ​ពុក​រលួយ ក៏​វា​មាន​មាត្រា​នៅ​ក្នុង​ក្រម​នីតិ​វិធី​ព្រហ្មទណ្ឌ​អន្តរកាល​ដែរ អំពី​ការងារ​ដែល​គេ​អាច​ផ្ដន្ទា​ទោស​មន្ត្រី​ពុក​រលួយ​បាន។ ប៉ុន្តែ​យើង​មិន​ឃើញ​មាន​សកម្មភាព​អី ដែល​ធ្វើ​ឲ្យ​យើង​មាន​ជំនឿ​ទៅ​លើ​សមត្ថភាព​របស់​គាត់​សោះ! ដូច្នេះ​បាន​ថា វា​ជា​ការងារ​មួយ​ដែល​យើង​ចាំ​មើល​ត​ទៅ​ទៀត។ យើង​ក៏​ចង់​លើក​ទឹក​ចិត្ត​គាត់​ឲ្យ​ធ្វើ​ដែរ តែ​ទោះ​បី​ជា​យ៉ាង​ណា យើង​ហាក់​ដូច​ជា​មិន​សូវ​មាន​ជំនឿ!»

ចំណែក លោក អ៊ូ វីរៈ ប្រធាន​មជ្ឈមណ្ឌល​សិទ្ធិ​មនុស្ស​កម្ពុជា បាន​មាន​ប្រសាសន៍​ថា ៖ «...ចំពោះ​ខ្ញុំ មើល​ទៅ​អត់​មាន​ការ​ឆ្លុះ​បញ្ចាំង​នូវ​ឆន្ទៈ​នយោបាយ​មួយ​ណា ឲ្យ​មាន​ការ​កែ​ប្រែ​ទៅ​លើ​ស្ថានភាព​ប្រឆាំង​ជាមួយ​អំពើ​ពុក​រលួយ​ទេ ព្រោះ​ឯកឧត្ដម ឱម យ៉ិនទៀង គាត់​ជា​អ្នក​ទទួល​ខុស​ត្រូវ​រឿង​សិទ្ធិ​មនុស្ស និង​រឿង​ប្រឆាំង​អំពើ​ពុក​រលួយ តាំង​ពី​យូរ​ណាស់​ហើយ ដូច្នេះ​ខ្ញុំ​ថា បើ​សិន​ចង់​ឲ្យ​មាន​ការ​កែ​ប្រែ ទាល់​តែ​ប្រហែល​ជា​រក​អ្នក​ថ្មី ដែល​អត់​មាន​ទាក់ទង​ជាមួយ​រឿង​នយោបាយ​យូរ។ អ្នក​ថ្មី អ្នក​ក្រៅ ដែល​មាន​រូបភាព​ឯករាជ ហើយ​និង​មាន​ឆន្ទៈ​ផង។ ដូច្នេះ​ខ្ញុំ​មើល​ទៅ អត់​មាន​អី​ប្លែក​ផង! ប៉ុន្តែ​ខ្ញុំ​ថា ជា​ការ​មួយ​សោកស្ដាយ​ដែល​រដ្ឋាភិបាល​មាន​ឱកាស​ក្នុង​ការ​បង្ហាញ​ពី​ឆន្ទៈ​ថ្មី​មួយ​ក្នុង​ការ​ប្រឆាំង​នឹង​អំពើ​ពុក​រលួយ ប៉ុន្តែ​រដ្ឋាភិបាល​អត់​ទាន់​បង្ហាញ​ទេ...»

ច្បាប់​ប្រឆាំង​អំពើ​ពុក​រលួយ​ដែល​រដ្ឋ​សភា​កម្ពុជា ទើប​បាន​អនុម័ត​កាល​ពី​ពេល​ថ្មី​នេះ បាន​ចែង​ថា ប្រធាន​អង្គភាព​ប្រឆាំង​អំពើ​ពុក​រលួយ ជា​សមាជិក​មួយ​រូប​របស់​ក្រុម​ប្រឹក្សា​ជាតិ​ប្រឆាំង​អំពើ​ពុក​រលួយ ហើយ​មាន​ឋានៈ​ស្មើ​ទេស​រដ្ឋមន្ត្រី និង​មាន​សិទ្ធិ​អំណាច​ជា​ច្រើន ក្នុង​ការ​ស្រាវជ្រាវ​បញ្ហា​នានា ទាក់ទង​ជាមួយ​បញ្ហា​ពុក​រលួយ៕

ព័ត៌មាន (1)
Share

អ្នក​អាន​អនាមិក

I agree that before Cambodia didn't have the anti-corruption law. However, it is better not to have this low quality anti-corruption law. The Cambodia government at least should reflect and consider the comments and good intention from local and international NGOs. I feel very ashamed to be Cambodian until such leadership of Cambodia government. Honestly, Cambodia is like this that is the reason 30 years already, Cambodia is still living in bad governance, rule of man and violation.

From a Cambodian youth

Jun 07, 2010 11:25 AM

គេហទំព័រ​ទាំងមូល