កិច្ចប្រជុំនោះនឹងប្រព្រឹត្តទៅរយៈពេល ២ថៃ្ង គឺចាប់ពីថ្ងៃទី៨ និងទី៩ ខែមេសានេះ ដែលនឹងផ្ដោតលើសេចក្ដីថ្លែងការណ៍ស្ដីពីការងើបឡើងវិញ និងការអភិវឌ្ឍសេដ្ឋកិច្ច ប្រកបដោយចេរភាព និងផ្ដោតលើសេចក្ដីថ្លែងការណ៍ស្ដីពីការប្រែប្រួលអាកាសធាតុ។
ទីប្រឹក្សាផ្ទាល់របស់លោកនាយករដ្ឋមន្ត្រី ហ៊ុន សែន លោក ស្រ៊ី ថាមរុង្គ បានមានប្រសាសន៍ប្រាប់ក្រុមអ្នកកាសែត នៅឯព្រលានយន្តហោះអន្តរជាតិភ្នំពេញ នៅថ្ងៃពុធ ទី៧ ខែមេសានេះថា ៖ «សមាគមអាស៊ានកំពុងតែខិតខំសហប្រតិបត្តិការងារដើម្បីឈានឆ្ពោះទៅកសាងសហគមន៍អាស៊ានមួយ នៅក្នុងឆ្នាំ២០១៥។ ដូច្នេះកិច្ចប្រជុំកំពូលហ្នឹង សហការគ្នាយ៉ាងម៉េច ពិភាក្សាយ៉ាងម៉េច អនុវត្តធម្មនុញ្ញអាស៊ានឲ្យបានផង សហប្រតិបត្តិការជាមួយនឹងដៃគូផង ដើម្បីកសាងសហគមន៍អាស៊ានមួយ នៅក្នុងឆ្នាំ២០១៥ ដូចដែលយើងបានគ្រោងទុក។ ដូច្នេះកិច្ចប្រជុំកំពូលនេះយើងសង្ឃឹមថា ផ្ដល់ឱកាសឲ្យមេដឹកនាំអាស៊ានធ្វើការពិនិត្យឡើងវិញ និងដាក់ចេញនូវទិសដៅ ដើម្បីធ្វើយ៉ាងណាប្រែក្លាយចក្ខុវិស័យរួម និងការប្ដេជ្ញាចិត្តក្នុងការកសាងសហគមន៍អាស៊ានទៅជាការពិតជាក់ស្ដែង នៅក្នុងឆ្នាំ២០១៥»។
មន្រ្តីជាន់ខ្ពស់កម្ពុជាដែលបានចូលរួមនៅក្នុងកិច្ចប្រជុំកំពូលអាស៊ានលើកទី១៦នេះ មានលោក ចម ប្រសិទ្ធ រដ្ឋមន្រ្តីក្រសួងពាណិជ្ជកម្ម, លោក ហោ ណាំហុង រដ្ឋមន្ត្រីក្រសួងការបរទេស និងមន្ត្រីរដ្ឋាភិបាលមួយចំនួនទៀត។
ប្រភពបានឲ្យដឹងថា ប្រតិភូជាន់ខ្ពស់នៃរដ្ឋាភិបាលកម្ពុជានេះនឹងវិលមកកម្ពុជាវិញ នៅថ្ងៃទី៩ ខែមេសាខាងមុខនេះ៕