សម្ដេច​ក្រុមព្រះ​ត្រូវ​បាន​ជ្រើសតាំង​ជា​ប្រធាន​បក្ស នរោត្ដម រណឫទ្ធិ ជា​ថ្មី

សម្ដេច​ក្រុមព្រះ នរោត្តម រណឫទ្ធិ ត្រូវ​បាន​អង្គ​សមាជ​ជ្រើសតាំង​ជា​ប្រធាន​គណបក្ស នរោត្តម រណឫទ្ធិ ជា​ផ្លូវ​ការ បន្ទាប់​ពី​គណបក្ស​ជាតិ​និយម បាន​ធ្វើ​សមាជ​ប្ដូរ​ឈ្មោះ​មក​ជា​គណបក្ស នរោត្តម រណឫទ្ធិ​វិញ នៅ​ព្រឹក​ថ្ងៃ​ទី​១១ ខែ​ធ្នូ ឆ្នាំ​នេះ។

0:00 / 0:00

សម្ដេច​ក្រុមព្រះ នរោត្តម រណឫទ្ធិ អតីត​នាយក​រដ្ឋមន្ត្រី​ប្រទេស​កម្ពុជា ក្នុង​អាណត្តិ​ទី​១ ព្រះអង្គ​ បាន​សម្រេច​ព្រះទ័យ​វិល​មក​កាន់​ឆាក​នយោបាយ​ជា​ថ្មី​ម្ដង​ទៀត នៅ​ព្រឹក​ថ្ងៃ​ទី​១១ ខែ​ធ្នូ បន្ទាប់​ពី​បាន​ឈប់​សម្រាក​រយៈ​ពេល ២​ឆ្នាំ ចាប់​តាំង​ពី​ឆ្នាំ​​២០០៨ មក​នោះ។

ក្រោយ​ពី​អង្គ​សមាជ​គណបក្ស​បាន​បោះ​ឆ្នោត​ថ្វាយ​សម្ដេច​ក្រុមព្រះ នរោត្តម រណឫទ្ធិ ជា​ព្រះ​ប្រធាន​គណបក្ស ព្រះអង្គ​បាន​មាន​បន្ទូល​​​​​​​​នៅ​ចំពោះ​​មុខ​​​សមាជិក​សមាជិកា​គាំទ្រ​​​រាប់​ពាន់​នាក់​មក​ពី ២៤ ខេត្ត-​ក្រុង ទូទាំង​ប្រទេស​កម្ពុជា ដោយ​បាន​ប្ដេជ្ញា​ប្រមូល​ផ្ដុំ​សមាជិក​អ្នក​​រាជា​និយម ដែល​បាន​បែកបាក់​ឲ្យ​មក​រួម​ជា​បក្ស​តែ​មួយ​វិញ ដើម្បី​ចូល​រួម​ការ​បោះ​ឆ្នោត​ឃុំ-​សង្កាត់ និង​បោះ​ឆ្នោត​សកល​នៅ​ឆ្នាំ​​​​​​​​២០១២-​២០១៣ ខាង​មុខ។

សម្ដេច​ក្រុម​ព្រះ​មាន​បន្ទូល​បន្ត​ថា គណបក្ស នរោត្តម រណឫទ្ធិ ថ្មីៗ​នេះ មិន​មែន​ជា​បក្ស​ប្រឆាំង​នោះ​ទេ ពោល​គឺ​ប្រកាន់​ជំហរ​កណ្ដាល ហើយ​មិន​ប្រឆាំង​ជាមួយ​គណបក្ស​ប្រជាជន​កម្ពុជា កំពុង​កាន់​អំណាច​នោះ​ទេ។

ព្រះអង្គ​មាន​បន្ទូល​បន្ថែម​ដូច្នេះ ៖ «ដូច្នេះ​យើង​ធ្វើ​យ៉ាង​ម៉េច​ឲ្យ​សម្ដេច​នាយករដ្ឋមន្ត្រី​លោក​យល់​ថា មិន​មែន​ប្រឆាំង​ទេ ក៏ប៉ុន្តែ​ក្នុង​​​ឋានៈ​យើង​ជា​ខ្មែរ យើង​ត្រូវ​មាន​លទ្ធភាព​ចូល​រួម​ចំណែក​ក្នុង​ការ​ដោះស្រាយ​ពិត​ប្រាកដ ដែល​ជា​បញ្ហា​ជាតិ»

សេចក្ដី​ប្រកាស​ពី​ទីក្រុង​ប៉េកាំង ប្រទេស​ចិន ចុះ​ថ្ងៃ​ទី​១០ ខែ​ធ្នូ សម្ដេច​ឪ នរោត្តម សីហនុ ព្រះ​មហា​វីរក្សត្រ ព្រះអង្គ​បាន​​សរសេរ​ព្រះរាជ​សារ​ផ្ទាល់​ព្រះហស្ត​ព្រះអង្គ​ជា​ភាសា​បារាំង ដោយ​បញ្ជាក់​​ថា ព្រះអង្គ​នៅ​តែ​គាំទ្រ​សម្ដេច ហ៊ុន សែន ធ្វើ​ជា​នាយករដ្ឋមន្ត្រី​ប្រទេស​កម្ពុជា ១០០% មិន​ផ្លាស់ប្ដូរ ហើយ​ការ​គាំទ្រ​នឹង​បន្ត​រហូត​ដល់​ព្រះជន្ម​ចុង​ក្រោយ​របស់​ព្រះអង្គ។

លោក សុន ឆ័យ ប្រធាន​ក្រុម​អ្នក​តំណាងរាស្ត្រ​គណបក្ស សម រង្ស៊ី បាន​សាទរ​ចំពោះ​ព្រះរាជ​វត្តមាន​របស់​សម្ដេច​ក្រុមព្រះ ដែល​បាន​​​យាង​​មក​កាន់​ឆាក​នយោបាយ​ជា​ថ្មី ព្រោះ​លោក​យល់​ថា ជីវិត​អ្នក​នយោបាយ​មិន​ងាយ​ចាក​ឆ្ងាយ​ពី​បញ្ហា​ជាតិ និង​ប្រជាជន​នោះ​​​ទេ បើ​ទោះ​គណបក្ស​កាន់​អំណាច​បាន​ប្រើ​ប្រព័ន្ធ​តុលាការ​បង្ខំ​ឲ្យ​អ្នក​នយោបាយ​ចាក​ឆ្ងាយ​ពី​ឆាក​នយោបាយ​បែប​ណា​ក្ដី។

លោក កឹម សុខា ប្រធាន​គណបក្ស​សិទ្ធិ​មនុស្ស មាន​ប្រសាសន៍​ពី​ខេត្ត​កំពង់ចាម ជា​ទី​ដែល​លោក​ចុះ​ជួប​សកម្មជន​​តាម​មូលដ្ឋាន បាន​ឲ្យ​វិទ្យុ​អាស៊ី​សេរី​ដឹង​នៅ​រសៀល​ថ្ងៃ​ទី​១១ ខែ​ធ្នូ ដោយ​បាន​សាទរ​សម្ដេច​ក្រុមព្រះ ដែល​បាន​យាង​មក​កាន់​ឆាក​នយោបាយ​​​​ជា​ថ្មី​នៅ​ពេល​នេះ។ ប៉ុន្តែ​លោក​មិន​មាន​ជំនឿ​ថា សម្ដេច​ក្រុមព្រះ​មាន​ជោគជ័យ​ក្នុង​ឆាក​នយោបាយ​នោះ​ទេ ព្រោះ​ពលរដ្ឋ​នៅ​តាម​មូលដ្ឋាន​បាន​ស្គាល់​ពី​ការ​ដឹកនាំ​របស់​ព្រះអង្គ​រួច​មក​ហើយ។

លោក កឹម សុខា មាន​ប្រសាសន៍​បន្ថែម ៖ «ប្រសិន​បើ​សម្ដេច​ក្រុមព្រះ​នៅ​ឈរ​ជំហរ​ដដែល ឱប​ដៃ​ឱប​ជើង​គណបក្ស​ប្រជាជន​ដដែល គឺ​គ្មាន​ប្រយោជន៍​អី»

ទោះ​បី​យ៉ាង​ណា​ក្តី ព្រះ​ប្រធាន​បក្ស នរោត្តម រណឫទ្ធិ សម្ដេច​ក្រុមព្រះ​ក៏​បាន​ស្នើ​ឲ្យ​សមាជិក និង​ថ្នាក់​ដឹកនាំ​គណបក្ស​​​លើក​​​ដៃ​​​​គាំទ្រ​ព្រះអង្គ​ក្នុង​ការ​បង្កើត​គណបក្ស​​ថ្មី​មួយ​ផ្សេង​ទៀត ដែល​គេ​គ្រោង​ដាក់​ឈ្មោះ​ថា គណបក្ស​ហ៊្វុនស៊ិនប៉ិច៨១។ គណបក្ស​ថ្មី​នេះ ព្រះអង្គ​មាន​សង្ឃឹម​ថា នឹង​មាន​ការ​ចូល​រួម​ពី​គណបក្ស​ហ៊្វុនស៊ិនប៉ិច​បច្ចុប្បន្ន និង​គណបក្ស នរោត្តម រណឫទ្ធិ ក្នុង​ពេល​ដ៏​ឆាប់​ខាង​មុខ។

លោក កែវ ពុទ្ធរស្មី ប្រធាន​គណបក្ស​ហ៊្វុនស៊ិនប៉ិច មាន​ប្រសាសន៍​ថា ហ៊្វុនស៊ិនប៉ិច​បើក​ផ្លូវ​ជានិច្ច​ក្នុង​ការ​ចរចា ដើម្បី​ច្របាច់​បញ្ចូល​គ្នា​ទៅ​ជា​បក្ស​តែ​១ ដែល​មាន​ឈ្មោះ​ថា គណបក្ស​ហ៊្វុនស៊ិនប៉ិច៨១ ប្រសិន​បើ​មាន​សំណើ​ផ្លូវការ។ ប៉ុន្តែ​លោក​ថា រហូត​មក​ដល់​​ពេល​នេះ នៅ​ពុំ​ទាន់​ឃើញ​មាន​សំណើ​ពី​សម្ដេច​ក្រុមព្រះ បាន​ដាក់​សំណើ​ជា​ផ្លូវការ​នៅ​ឡើយ​ទេ។

លោក កែវ ពុទ្ធរស្មី ឲ្យ​ដឹង​ទៀត​ថា ៖ «អ៊ីចឹង​យើង​នៅ​រង់ចាំ​ថ្នាក់​ដឹកនាំ​ទាំង​ពីរ​មើល​ឡើង​វិញ ហើយ​គណបក្ស នរោត្តម រណឫទ្ធិ មាន​បំណង​បន្ត​សម្ព័នភាព​ឡើង​វិញ​ដែរ»

ក្រុម​អ្នក​វិភាគ​នយោបាយ​ឯករាជ្យ បាន​អះអាង​ថា ការ​វិល​ចូល​ប្រឡូក​ក្នុង​ឆាក​នយោបាយ​ជា​ថ្មី​របស់​សម្ដេច​ក្រុមព្រះ នរោត្តម រណឫទ្ធិ នឹង​មិន​ទទួល​បាន​ការ​គាំទ្រ​ច្រើន​ពី​ពលរដ្ឋ​នៅ​តាម​មូលដ្ឋាន​នោះ​ទេ ព្រោះ​​​ប្រជាពលរដ្ឋ​អស់​ជំនឿ​ទៅ​លើ​ការ​ដឹកនាំ​របស់​​​​​​​សម្ដេច​ក្រុម​ព្រះ កាល​ពី​ប៉ុន្មាន​អាណត្តិ​មក​នេះ ដែល​បាន​ធ្វើ​ឲ្យ​ប្រជាពលរដ្ឋ​ជា​ម្ចាស់​​​ឆ្នោត​មាន​ការ​ខក​បំណង៕