ប្រភពពីក្រុមកសិកររងគ្រោះបានឲ្យដឹងថា ពួកគេត្រូវការជំនួយជាបន្ទាន់ពីអាជ្ញាធរមូលដ្ឋានពាក់ព័ន្ធដើម្បីបូមរំដោះទឹកភ្លៀងជំនន់នោះឲ្យបានឆាប់តាមតែអាចធ្វើទៅបានដើម្បីសង្រ្គោះស្រូវពង្រោះជាង២០០០ហិកតារនោះ។
កសិករឈ្មោះ ឈិន តុលា រស់នៅក្នុងភូមិព្រែកជ្រៅ ឃុំព្រែកសំបួរ ស្រុកពាមជរ ខេត្តព្រៃវែង ថែ្លងប្រាប់វិទ្យុអាស៊ីសេរីតាមទូរស័ព្ទពីទីកន្លែងស្រែលិចទឹកនោះថា លោកទើបតែបានធ្វើស្រូវប្រាំងពង្រោះចំនួន៥ហិកតារ ប៉ុនែ្តរងការលិចទឹកជំនន់ទឹកភ្លៀងដោយសារភ្លៀងកក់ខែកាលពីចុងខែធ្នូកន្លងទៅថ្មីៗនេះ ហើយមានសត្វខ្យងក្រហមទ្បើងមកស៊ីស្រូវពង្រោះរលួយនោះទៀត។
លោក ឈិន តុលា បានបញ្ជាក់ថា ៖ «រលួយតែម្ដង ហើយខ្យងស៊ីថែមទៀតមិនត្រឹមតែលិចទឹកទេ។ ដើមឆ្នាំហ្នឹងលិចអស់រលីងហើយ គ្មានពូជគ្មានអីឯណាថែមទៀតផង ហើយពូជក៏ឡើងថ្លៃហើយស្រូវលក់ចេញក៏ថោក អ៊ីចឹងខ្ញុំគិតថា ក្នុងគ្រួសារនីមួយៗនឹងអាចនឹងជួបការអត់ស្បៀងនៅក្នុងឆ្នាំ២០០៩ហ្នឹង»។
លោកស្រីឈ្មោះ ស៊ី នាង ជាកសិកររងគ្រោះម្នាក់ទៀតបានសម្ដែងការត្អូញត្អែរថា ៖ «ព្រួយមែនទែនទី១ គឺអត់ពូជ ដល់ពេលព្រោះអស់អ៊ីចឹង លិចអស់ទៅ វាអត់មានពូជធ្វើទៀត ហើយទី២ ស្រូវដែលលិចទឹកហ្នឹងខ្យងវាស៊ីទៀត ខ្យងពណ៌ក្រហមហ្នឹងវាស៊ីអស់»។
នៅពេលដែលវិទ្យុអាស៊ីសេរីបានទាក់ទងសាកសួរ លោក អ៊ុង សាមី ជាអភិបាលខេត្តព្រៃវែងជុំវិញវិធានការរបស់អាជ្ញាធរខេត្តដោះស្រាយបញ្ហាខាងលើនេះ លោកបានមានប្រសាសន៍ថាពុំមានបញ្ហាដូច្នោះកើតឡើងទេ។
លោក ទឹម សាវិន ជាជំទប់ទី១ ឃុំព្រែកសំបួរ បានមានប្រសាសន៍ថា ស្រូវប្រាំងពង្រោះរបស់លោកចំនួន៥ហិកតារក៏រងការខូចខាតទាំងស្រុងដែរដោយសារចំនួនទឹកភ្លៀងកក់ខែកន្លងទៅថ្មីៗនេះ។
លោក ទឹម សាវិន បានមានប្រសាសន៍ថា ៖ «ខាងប្រជាពលរដ្ឋនៅក្នុងឃុំព្រែកសំបួរហ្នឹង។ ជួយមានវិធានការជីកផ្លូវទឹករំដោះចេញពីស្រែហ្នឹង។ ប្រជាជនហ្នឹងមួយឃុំប្រហែលចូល២ពាន់ហិកតារ»។
លោក ពៅ សាមី ជាអគ្គលេខាធិការនៃគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍ថា លោកមិនទាន់បានទទួលរបាយការណ៍ពីមូលដ្ឋាននៅឡើយទេអំពីបញ្ហាខាងលើនេះ ៖ «អ្នកប្រចាំការហ្នឹងអត់ទាន់ឮមានព័ត៌មានអីចូលផង»។
សូមរំឮកថា មន្រ្តីជំនាញខាងកសិកម្មកាលពីពេលថ្មីៗនេះបានព្យាករណ៍ថា ទិន្នផលស្រូវរដូវវស្សាក្នុងប្រទេសកម្ពុជាសម្រាប់ឆ្នាំ២០០៨ នឹងមានការកើនទ្បើងជាងឆ្នាំ២០០៧ចំនួនជាង៥សែនតោនឯណោះដោយមិនទាន់បានបូកសរុបជាមួយនឹងស្រូវរដូវប្រាំងឆ្នាំ២០០៩នេះចំនួនប្រមាណ៣៥០.០០០ហិកតារ៕