ទិន្នផលស្រូវរដូវប្រាំងគឺប្រមូលបាន ៦,៤៣លានតោន និងស្រូវរដូវវស្សា គឺប្រមូលបានចំនួន ១,៥៣លានតោន នៅលើផ្ទៃដីសរុបជាង ២,៧លានហិកតា។ ចំនួនស្រូវប្រមូលបាននៅឆ្នាំ២០១០នេះ គឺមានចំនួនលើសឆ្នាំ២០០៩ កន្លងទៅបន្តិចបន្តួច។
ប្រធាននាយកដ្ឋានដំណាំស្រូវនៃក្រសួងកសិកម្ម រុក្ខាប្រមាញ់ និងនេសាទ លោក ង៉ិន ឆាយ បានមានប្រសាសន៍ប្រាប់វិទ្យុអាស៊ីសេរីថា លោកមានការពេញចិត្តនឹងផលស្រូវប្រមូលបាននៅឆ្នាំ២០១០នេះ ប៉ុន្តែកម្ពុជានៅខ្វះខាតសម្ភារៈសម្រាប់កែច្នៃនៅឡើយ សម្រាប់នាំចេញទៅទីផ្សារអន្តរជាតិ ៖ «កាលពីឆ្នាំកន្លងទៅយើងបាន ២,៨តោនទេ ឥឡូវយើងឡើងដល់ ២,៩តោនក្នុងមួយហិកតា ហើយបរិមាណផលស្រូវអង្ករដែលយើងនៅសល់ក៏កើនឡើងដែរ»។
លោកបានរំពឹងទុកថា បរិមាណស្រូវនៅសល់ឆ្នាំ២០១០នេះ មានចំនួន ៣,៧៨លានតោន និងអង្ករនៅសល់ ២,៤២លានតោន ៖ «បើតាមបរិមាណស្រូវដែលយើងផលិតបានវាគ្រប់គ្រាន់ហើយ ក៏ប៉ុន្តែបញ្ហាវានៅត្រង់ថា សមត្ថិភាព និងលទ្ធភាពក្នុងការកែច្នៃនៅមានកម្រិតនៅឡើយ។ ឧទាហរណ៍កែច្នៃហ្នឹងឲ្យអង្ករហ្នឹងស្របទៅតាមស្តង់ដារអន្តរជាតិ។ យើងទើបមានម៉ាស៊ីនស្រូវធំៗមួយ ឬពីរប៉ុណ្ណឹងទេ ហើយដើម្បីកិនអង្ករលក់ក្នុង១ឆ្នាំ ១លានតោន យើងត្រូវការសម្ភារៈបន្ថែមច្រើនណាស់»។
កន្លងមកក្រុមហ៊ុនឯកជនមួយចំនួននៅប្រទេសកម្ពុជា បានចុះហត្ថលេខាដើម្បីនាំចេញអង្ករទៅលក់នៅក្នុងទីផ្សារនៅសហភាពអឺរ៉ុប និងនៅសហរដ្ឋអាមេរិក ដោយមានការលើកលែងពន្ធដារសម្រាប់ប្រទេសក្រីក្រដូចប្រទេសកម្ពុជាជាដើម។
នៅក្នុងដំណើរទស្សនកិច្ចរបស់លោកនាយករដ្ឋមន្រ្តី ហ៊ុន សែន ទៅកាន់ប្រទេសចិន កាលពីថ្ងៃទី១៣ ខែធ្នូ ដល់ថ្ងៃទី១៧ ខែធ្នូ កន្លងទៅនេះ កម្ពុជា និងចិន បានចុះហត្ថលេខាលើកិច្ចព្រមព្រៀងចំនួន ១២ នៅក្នុងនោះមានការនាំចេញអង្ករ ពោត ដំទ្បូងមី សណ្តែកបាយ និងសណ្ដែកសៀង ទៅលក់ក្នុងទីផ្សារចិន ដោយមិនយកពន្ធ។
ប្រធានមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា (CEDAC) លោក យ៉ង សាំងកុមារ បានមានប្រសាសន៍ថា កម្ពុជាត្រូវចំណាយពេលច្រើនទៀត និងបទពិសោធន៍នានា ដើម្បីប្រកួតប្រជែងជាមួយប្រទេសថៃ និងវៀតណាម ក្នុងការនាំចេញអង្ករទៅទីផ្សារអន្តរជាតិ។
លោកបន្តថា ៖ «មានរឿង២ រឿងទី១ គឺគេមានម៉ូយច្រើន គេបានបទពិសោធន៍ច្រើន មានន័យថា គេបានដើរមុន យើងយូរឆ្នាំហើយ។ រឿងទី២ យើងមានការចំណាយខ្ពស់ ការផលិតរបស់យើងមានការចំណាយខ្ពស់។ យើងនៅខ្វះខាតហេដ្ឋារចនាសម្ព័ន្ធមួយចំនួន ជាពិសេសឃ្លាំង និងម៉ាស៊ីនសម្ងួត»។
លោកបានបន្តថា កសិករខ្មែរត្រូវការបណ្ដុះបណ្ដាលចំណេះដឹង និងជំនាញក្នុងការដាំស្រូវឲ្យមានគុណភាពល្អ និងមានបរិមាណច្រើន។ កសិករខ្មែរត្រូវការស្រូវពូជល្អៗ និងមានប្រព័ន្ធធារាសាស្ត្រផ្ដល់ទឹកគ្រប់គ្រាន់ ព្រមទាំងមានផ្លូវថ្នល់ដឹកជញ្ជូនកសិផលបានស្រួល៕