អង្គការន័រវេស្ស៍សង្គ្រោះកុមារ (Save The children) បានបង្ហាញអំពីយុទ្ធសាស្ត្រសម្រាប់ឆ្នាំ ២០១២ ខាងមុខ ដើម្បីឲ្យកុមារចូលរៀនថ្នាក់មូលដ្ឋានឲ្យបានកាន់តែច្រើន និងមានប្រសិទ្ធភាព។
ការបង្ហាញផែនការយុទ្ធសាស្ត្រនេះ នៅក្នុងពិធីផ្សព្វផ្សាយឯកសារស្ដីពីការរួមគ្នា នាំមកនូវការផ្លាស់ប្ដូរលទ្ធផលសម្រេចបានពីឆ្នាំ២០០០ ឆ្នាំ២០១០ លើវិស័យអប់រំមូលដ្ឋាននៅកម្ពុជា ដែលគេធ្វើឡើង នៅក្រសួងអប់រំយុវជន និងកីឡា ថ្ងៃទី៨ សីហា ឆ្នាំ២០១១។
ប្រធានកម្មវិធីអប់រំនៃអង្គការន័រវេស្ស៍សង្គ្រោះកុមារ លោក កែវ សារ៉ាត់ បានបញ្ជាក់ថា ផែនការអនុវត្តសម្រាប់ឆ្នាំ២០១២ នោះ រួមមាន ការរៀបចំជនបង្គោលខាងសិទ្ធិកុមារនៅតាមភូមិ ដើម្បីឲ្យពួកគាត់លើកទឹកចិត្តឪពុកម្ដាយ ឲ្យជញ្ជួនកូនទៅរៀន រៀបចំឲ្យមានប្រព័ន្ធឥណទាន ការស្រង់ស្ថិតិខ្នងផ្ទះ ដែលមិនបានជញ្ជួនកូនទៅរៀន និងផែនការពង្រឹងគុណភាពបង្រៀននៅតាមថ្នាក់រៀនជាដើម។
លោក កែវ សារ៉ាត់ បានបញ្ជាក់ថា កន្លងមកនៅមានបញ្ហាមួយចំនួន ដូចជាការខ្វះគ្រូបង្រៀន ខ្វះសម្ភារៈសិក្សា ពិសេសនៅខែត្រដាច់ស្រយាល ដូចជាខែត្រកោះកុង និងខែត្រព្រះវិហារ ៖ «ជ្រើសរើសគ្រូ ពីព្រោះនៅតំបន់អស់នោះ យើងមិនអាចរកធនធានមនុស្ស ដែលអាចធ្វើជាគ្រូបានទេ ដោយសារអត់សាលារៀនកន្លងមក។ ដប់ម្ភៃសាមសិបឆ្នាំហើយ អត់ដែលមានសាលារៀនផង ហើយទៅរកគ្រូយ៉ាងម៉េចបាន។ អត់មានទេ។ អ៊ីចឹងត្រូវរើសគ្រូពីក្រៅ ទៅធ្វើការនៅទីនោះ»។
អង្គការន័រវេស្ស៍សង្រ្គោះកុមារ បានបង្ហាញរបាយការណ៍ក្នុងរយៈពេល ១០ ឆ្នាំ ដែលអង្គការនេះ បានធ្វើការសហការនឹងក្រសួងអប់រំ បានចំណាយថវិកាជាង ២០ លានដុល្លារសហរដ្ឋអាមរិក ក្នុងការអភិវឌ្ឍន៍លើវិស័យអប់រំនៅថ្នាក់មូលដ្ឋាន រួមមាន ការសាងសង់សាលារៀន បង្គន់ អណ្ដូងទឹក មន្ទីរអប់រំខែត្រ ការិយាល័យអប់រំស្រុក ផ្ទះសំណាក់គ្រូបង្រៀន ការបណ្ដុះបណ្ដាលសមត្ថភាពគ្រូ ធ្វើទស្សនាវដ្ដីកុមារ និងបញ្ហាផ្សេងៗ មួយចំនួនទៀត។
រដ្ឋមន្ត្រីនៃក្រសួងអប់រំយុវជន និងកីឡា លោក អឹម សិទ្ធី មានប្រសាសន៍ថា សាលាបឋមសិក្សា នៅក្នុងឆ្នាំ ២០០១ មានជាង ៥.៤០០ សាលា ហើយនៅឆ្នាំ២០១០ បានកើនដល់ជាង ៦ ពាន់ ៦ រយសាលា ៖ «ជាពិសេសគោលដៅរបស់យើងសម្រាប់ការ ធ្វើយ៉ាងណាឲ្យវិស័យអប់រំនេះទទួលបានការប្រែប្រួល ហើយឈានទៅសម្រេចបានគោលដៅរបស់ខ្លួន»។
ទោះជាយ៉ាងនេះក្ដី នាយិកាកម្មវិធីនៃអង្គការន័រវេស្ស៍សង្គ្រោះកុមារ លោកស្រី ស៊ីណៃ ហ្កេប្រា ហ្សាប់ប៊ែរ (Senait Gebregziabher) មានប្រសាសន៍ថា បញ្ហាគុណភាពអប់រំនៅមានកម្រិតទាបនៅឡើយនោះ មិនមែនតែបញ្ហាគ្រូបង្រៀនទេ គឺមានបញ្ហាជាប្រព័ន្ធ ដូចជា បញ្ហាបរិយាកាសជុំវិញនៃការរស់នៅរបស់កុមារ បញ្ហាសម្ភារៈសិក្សា បញ្ហាចូលរួមរបស់កុមារ និងបញ្ហារៀបចំប្រព័ន្ធអប់រំទាំងស្រុងផងដែរ។
របាយការណ៍របស់ក្រសួងអប់រំយុវជន និងកីឡា បានបង្ហាញថា ចំនួនសិស្សពីបឋមដល់សិស្សនៅថ្នាក់ឧត្ដមសិក្សា មានប្រមាណ ៣ លាន ៥ សែននាក់។ សិស្សបឋមសិក្សា ដែលបានចុះឈ្មោះចូលរៀននៅឆ្នាំ២០១០-ឆ្នាំ២០១១ មានជាង ៩៥% អនុវិទ្យាល័យមាន ៣៥% វិទ្យាល័យមានជាង ២០%។
ដោយឡែក សម្រាប់សិស្សបឋមសិក្សាចុះឈ្មោះចូលរៀន កាលពីឆ្នាំ២០០៩-ឆ្នាំ២០១០ មានជាង ៨៤% អនុវិទ្យាល័យមានជាង ៧៨% និងវិទ្យាល័យមានជាង ៨៦%។
សិស្សបោះបង់ការសិក្សានៅឆ្នាំ ២០០៩-២០១០ ដដែលនេះ នៅថ្នាក់បឋមសិក្សាមានជាង ៨% អនុវិទ្យាល័យមានជាង ១៦% និងសិស្ស ដែលបោះបង់ការសិក្សានៅថ្នាក់វិទ្យាល័យមានជាង ១១%៕