មន្ត្រីជាន់ខ្ពស់រដ្ឋាភិបាលបានឲ្យដឹងនៅថ្ងៃទី៤ មិថុនាថា គម្រោងសាងសង់ទំនប់វារីអគ្គិសនីសេសានក្រោម២ នៅក្នុងខែត្រស្ទឹងត្រែងនោះ គឺរដ្ឋាភិបាលត្រូវតែអនុវត្តធ្វើ ទោះបីជាប្រជាពលរដ្ឋបានជំទាស់ទៅនឹងគម្រោងនេះក្ដី ពីព្រោះថារដ្ឋាភិបាលមានគោលនយោបាយផ្ដល់សំណងសមរម្យទៅតាមតម្រូវការរបស់ប្រជាពលរដ្ឋ។
លោក ម៉ុក ម៉ារ៉េត រដ្ឋមន្ត្រីក្រសួងបរិស្ថានបានមានប្រសាសន៍នៅក្នុងពិធីប្រារព្ធទិវាបរិស្ថានលើកទី១៧ ថា ក្រសួងបរិស្ថានបានសិក្សាយ៉ាងល្អិតទៅលើផលប៉ះពាល់បរិស្ថាននៅក្នុងតំបន់កសាងទំនប់វារីអគ្គិសនីសេសានក្រោម២ នេះ បញ្ហាដែលប្រជាពលរដ្ឋបានជំទាស់ទៅនឹងគម្រោងនេះ ដោយសារតែប្រជាពលរដ្ឋមិនទាន់យល់អំពីគោលនយោបាយអភិវឌ្ឍន៍របស់រដ្ឋាភិបាលច្បាស់លាស់នៅឡើយតែប៉ុណ្ណោះ។
លោក ម៉ុក ម៉ារ៉េត បានផ្ដល់បទសម្ភាសន៍ដល់អ្នកសារព័ត៌មានដូច្នេះ នៅក្នុងឱកាសប្រារព្ធទិវាបរិស្ថានជាតិ និងបរិស្ថានពិភពលោក ថ្ងៃទី៥ មិថុនា ដែលគេធ្វើឡើងនៅមុខវត្តបទុមវតី ក្នុងរាជធានីភ្នំពេញ ថ្ងៃទី៤ មិថុនា ឆ្នាំ២០១១។
ទាក់ទងទៅនឹងមន្ត្រីជាន់ខ្ពស់រដ្ឋាភិបាលបានបង្ហាញអំពីគោលជំហររបស់រដ្ឋាភិបាល ក្នុងការបន្តគម្រោងសាងសង់ទំនប់វារីអគ្គិសនីសេសានក្រោម២ នៅចុងឆ្នាំ២០១១ នេះ ត្រូវបាននាយកប្រតិបត្តិវេទិកានៃអង្គការមិនមែនរដ្ឋាភិបាល ស្ដីពីកម្ពុជា លោក ឈិត សំអាត បានពន្យល់ថា គម្រោងសាងសង់ទំនប់វារីអគ្គិសនីនេះ ធ្វើឲ្យប៉ះពាល់ដល់ជីវភាពប្រជាពលរដ្ឋ មច្ឆាជាតិ និងធនធានធម្មជាតិ។
លោក ម៉ុក ម៉ារ៉េត ក៏បានបញ្ជាក់ដែរថា ប្រជាពលរដ្ឋដែលរស់នៅក្នុងតំបន់ទន្លេសេសានក្រោម២ ដែលស្ថិតនៅក្នុងតំបន់អភិវឌ្ឍន៍ គឺរដ្ឋាភិបាលនឹងធ្វើបន្លាស់ទីពួកគាត់ឲ្យទៅនៅទីតាំងថ្មី។
ទោះជាយ៉ាងនេះក្តី ប្រជាសហគមន៍មកពីខែត្រស្ទឹងត្រែង និងខែត្ររតនគីរី នៅក្នុងសិក្ខាសាលាមួយ កាលពីថ្ងៃទី៣១ ឧសភា បានស្នើទៅរដ្ឋាភិបាលឲ្យផ្អាកគម្រោងសាងសង់ទំនប់វារីអគ្គិសនីនេះ ដោយហេតុផលថា គម្រោងនេះប៉ះពាល់ដល់បរិស្ថាន ជីវភាពរស់នៅប្រចាំថ្ងៃ និងផ្នូរខ្មោចជីដូចជីតារបស់ពួកគាត់ជាដើម។
របាយការណ៍សិក្សាអំពីផលប៉ះពាល់របស់អង្គការមិនមែនរដ្ឋាភិបាលស្ដីពីកម្ពុជាបានបង្ហាញថា គម្រោងកសាងទំនប់វារីអគ្គិសនីសេសានក្រោម២ មានផ្ទៃលិចទឹកប្រមាណ ៣៣៥ម៉ែត្រក្រឡា និងអាចធ្វើឲ្យមានទឹកជន់លិចលើផ្ទៃដីចំនួន ៣ម៉ឺនហិកតារ និងធ្វើឲ្យប៉ះពាល់ប្រជាពលរដ្ឋជិត ២ពាន់គ្រួសារ។
រដ្ឋាភិបាលកម្ពុជា និងរដ្ឋាភិបាលវៀតណាមបានចុះកិច្ចព្រមព្រៀងគ្នាកាលពីថ្ងៃទី២៤ ខែមេសា ឆ្នាំ២០១១ ផ្ដល់សិទ្ធិឲ្យក្រុមហ៊ុនវៀតណាម ឈ្មោះ អ៊ី វី អែន (EVN) មានភាគហ៊ុន ៥១ភាគរយនិងក្រុមហ៊ុនក្នុងស្រុកឈ្មោះ រ៉ូយ៉ាល់គ្រុប របស់លោកឧកញ៉ា គិត ម៉េង ចំនួន៤៩% ដើម្បីធ្វើទំនប់វារីអគ្គិសនីសេសានក្រោម២ ដែលចំណាយទឹកប្រាក់ប្រមាណ ៩០០លានដុល្លារ៕