មេបញ្ជាការរងកងពលអន្តរាគមន៍លេខ១២នៃកងយោធពលខេមរភូមិន្ទប្រចាំនៅតំបន់ព្រះវិហារ លោកឧត្ដមសេនីយ៍ត្រី យ៊ីវ វ៉ាន់ថន បានមានប្រសាសន៍ឲ្យដឹងកាលពីល្ងាចថ្ងៃសៅរ៍ ទី២៩ ខែវិច្ឆិកា ថា មេបញ្ជាការរងកងពលទី៦ស៊ូរៈណារីរបស់ថៃ លោក ឆៃយ៉ាន់ហ៊ុយស៊ុងនឿន បានស្នើសុំឲ្យទាហានថៃ១០នាក់ស្លៀកពាក់ស៊ីវិលដែលអាចនៅវត្តកែវសិក្ខាគិរីស្វៈរៈបានតែពេលថ្ងៃនោះ គឺសុំឲ្យដេកយប់នៅក្នុងវត្តពេលខ្លះដែលមានការត្រួតពិនិត្យរបស់គណៈប្រតិភូរបស់ថៃ។
មន្ត្រីយោធាខ្មែរដដែលបានឲ្យដឹងថា សំណើសុំរបស់មេបញ្ជាការយោធាថៃនោះត្រូវបានបដិសេធមិនយល់ព្រមទេ ហើយបន្ទាប់មកកាលពីព្រឹកថ្ងៃសៅរ៍ ទាហានថៃមួយក្រុមបានចូលមកបម្រុងបោះជំរំនៅម្ដុំខ្សែត្រៀមជួរមុខប្រាសាទព្រះវិហារ ក៏ប៉ុន្តែត្រូវទាហានខ្មែរបង្ខំឲ្យចាកចេញទៅវិញ។
មន្ត្រីយោធាខ្មែរដដែលបានមានប្រសាសន៍ថា ៖ «ម្សិលមិញថៃវាមកជួប។ កម្លាំងដែលវាកែសម្រួលចេញពីវត្ត ហើយថ្ងៃឡើងមកធ្វើការស្លៀកពាក់ស៊ីវិល សុំយើងថា នៅពេលដែលមេវាមកត្រួតម្ដងៗ វាសុំមកដេកនៅវត្ត តែវាអត់មានយកកាំភ្លើងចូលទេ។ យើងមិនឯកភាពទេ។ ជួរមុខថែមកម្លាំងទៀត យើងអត់ឲ្យចូលផង វាមកបោះតង់បោះអី ប៉ុន្តែយើងឲ្យវារើទៅវិញ»។
ចំណែកនៅឯតំបន់ជម្លោះព្រំដែនខ្មែរថៃ ខែត្រឧត្ដរមានជ័យ ចាប់ពីប្រាសាទតាមាន់រហូតដល់តាក្របីនោះ មន្ត្រីនគរបាលប្រចាំព្រំដែនមួយរូបដែលសុំមិនបញ្ចេញឈ្មោះបានមានប្រសាសន៍កាលពីព្រឹកថ្ងៃអាទិត្យថា កងរក្សាព្រំដែនខ្មែរនៅតែរាយបណ្ដាក់ប្រុងប្រយ័ត្ន ហើយនៅចម្ងាយប្រមាណ៣គីឡូម៉ែត្រភាគខាងកើតពីតំបន់ជប់គគីរ គេបានឃើញទាហានថៃបានចូលទៅធ្វើរោងចំនួនពីរនៅទីនោះនិងដើរល្បាតចូលម្ដងម្កាល។
មន្ត្រីនគរបាលដដែលបានបញ្ជាក់ថា ៖ «កម្លាំងយើងនៅត្រៀមរហូត តាំងពីប៉ុស្តិ៍រំដួលដល់តាក្របី។ វានៅម្ដុំយើងហៅថា ច័ន្ទក្រហប ឆ្ងាយពីជប់គគីរប្រហែលបីបួនប្រាំគីឡូ ខាងកើត។ វាធ្វើរោងពីរនៅនោះចោលទៅ បើថ្ងៃណាវាមកទៅ ថ្ងៃណាវាទៅវិញទៅ។ យើងក៏ដើរល្បាតនៅតាមនោះដែរ»។
មជ្ឈដ្ឋានប្រជាពលរដ្ឋនិងអ្នកនយោបាយខ្មែរខ្លះចង់ឲ្យបញ្ហាជម្លោះព្រំដែនខ្មែរថៃត្រូវបានដោះស្រាយឆាប់ៗ។ ក៏ប៉ុន្តែកាលពីថ្ងៃទី២៨ ខែវិច្ឆិកាកន្លងមក រដ្ឋមន្ត្រីក្រសួងការបរទេសកម្ពុជា លោក ហោ ណាំហុង បានមានប្រសាសន៍ថា ស្ថានភាពស្មុគស្មាញនៅឯប្រទេសថៃបច្ចុប្បន្នមានផលប៉ះពាល់ចំពោះការចរចានិងការបោះបង្គោលព្រំដែនរវាងកម្ពុជានិងថៃ ដែលនឹងគ្រោងធ្វើនៅខែធ្នូខាងមុខនេះ។
សូមរំឭកថា ចាប់តាំងពីថៃបានបញ្ជូនទាហានចូលលុកលុយទីវត្តខ្មែរ កែវសិក្ខាគិរីស្វៈរៈ តំបន់ជិតប្រាសាទព្រះវិហារ កាលពីថ្ងៃទី១៥ ខែកក្កដា ការចរចារកដំណោះស្រាយបញ្ហាជម្លោះព្រំដែនថ្នាក់រដ្ឋមន្ត្រីការបរទេសខ្មែរថៃបានធ្វើឡើងចំនួនបីលើករួចមកហើយ ដោយការចរចាមានភាពរអាក់រអួសដោយសារស្ថានការណ៍នយោបាយស្មុគស្មាញនៅឯប្រទេសថៃ៕