មន្រ្តី​បក្ស​សមរង្ស៊ី​ទៅ​ចូល​រួម​កិច្ច​ប្រជុំ​ស្ដីពី​យន្តការ​ប្រឆាំង​អំពើ​ពុករលួយ

គណបក្ស​ប្រឆាំង​សមរង្ស៊ី បាន​បញ្ជូន​តំណាង​រាស្រ្ត​ម្នាក់​ទៅ​ចូល​រួម​នៅ​ក្នុង​កិច្ច​ប្រជុំ​លើក​ដំបូង​របស់​អង្គការ​សហ​ប្រជាជាតិ​(អ.ស.ប)​នៅ​ទីក្រុង​បាងកក ប្រទេស​ថៃ ស្តី​អំពី​យន្តការ​ប្រឆាំង​អំពើ​ពុករលួយ​រយៈពេល​៣​ថៃ្ង​តាម​ការ​អញ្ជើញ​របស់​អ.ស.ប។
2010-01-31
អ៊ីម៉ែល
មតិ
Share
បោះពុម្ព
សកម្មជន​នៃ​អង្គការ​សង្គមស៊ីវិល​នាំគ្នា​ដង្ហែ​ក្បួន​ធ្វើ​យុទ្ធនាការ​ទាមទារ​ឲ្យ​រដ្ឋាភិបាល​ពន្លឿន​ការ​ធ្វើ​ច្បាប់​ប្រឆាំង​អំពើ​ពុករលួយ​កាលពី​ចុង​ឆ្នាំ​២០០៦។
សកម្មជន​នៃ​អង្គការ​សង្គមស៊ីវិល​នាំគ្នា​ដង្ហែ​ក្បួន​ធ្វើ​យុទ្ធនាការ​ទាមទារ​ឲ្យ​រដ្ឋាភិបាល​ពន្លឿន​ការ​ធ្វើ​ច្បាប់​ប្រឆាំង​អំពើ​ពុករលួយ​កាលពី​ចុង​ឆ្នាំ​២០០៦។
RFA Photo

កិច្ច​ប្រជុំ​នោះ​នឹង​មាន​តំណាង​មក​ពី​ប្រទេស​ចំនួន​២១​ប្រទេស នៅ​តំបន់​អាស៊ី​ប៉ាស៊ីហ្វិក​នឹង​ចូល​រួម ដែល​នឹង​ចាប់​ផ្តើម​ពី​ថៃ្ង​ទី​១ ដល់​ថៃ្ង​ទី​៣ ខែ​កុម្ភៈ ឆាប់​ៗ​នេះ ដើម្បី​ចែក​រំលែក​បទពិសោធន៍​គ្នា​ក្នុង​ការ​ប្រឆាំង​អំពើ​ពុករលួយ។

លោក សុន ឆ័យ ជា​តំណាងរាស្រ្ត​នៃ​គណបក្ស​ប្រឆាំង​សមរង្ស៊ី ដែល​កំពុង​តែ​រៀបចំ​ចាក​ចេញ​ដំណើរ​ទៅ​ចូល​រួម​នោះ បាន​មាន​ប្រសាសន៍​ប្រាប់​វិទ្យុ​អាស៊ី​សេរី​តាម​ទូរស័ព្ទ​ពី​អាកាស​យានដ្ឋាន​អន្តរជាតិ​ភ្នំពេញ​មក​ថា ៖ «ខ្ញុំ​គេ​បាន​ឲ្យ​ធ្វើ​ជា​ប្រធាន​អង្គ​ប្រជុំ​មួយ ហើយ​ដោយសារ​យើង​ជា​ប្រទេស​មួយ​គ្មាន​ពិសោធន៍​អី​ទៅ​ផ្ដល់​ឲ្យ​គេ ដោយសារ​យើង​អត់​បាន​ប្រឆាំង​អំពើ​ពុករលួយ​ស្ទើរ​តែ​អត់​សោះ​នៅ​ក្នុង​ប្រទេស​យើង​ហ្នឹង យើង​មិន​មាន​អ្វី​ត្រូវ​ជួយ​ផ្ដល់​ដល់​គេ​ទេ ក្រៅ​ពី​ការ​ពិសោធ​ខ្លះ​ដែល​ខ្ញុំ​មាន ប្រហែល​ជា​គ្រាន់​តែ​មាន​ការ​ផ្លាស់​ប្ដូរ​គំនិត​គ្នា​ប៉ុណ្ណឹង»

លោក ប៉ែន បញ្ញា ជា​តំណាង​រាស្រ្ត​នៃ​គណបក្ស​ប្រជាជន​កម្ពុជា ដែល​កំពុង​តែ​គ្រប់គ្រង​ប្រទេស​កម្ពុជា ត្រូវ​បាន​អ.ស.ប​អញ្ចើញ​ឲ្យ​ទៅ​ចូល​រួម​ផង​ដែរ បាន​មាន​ប្រសាសន៍​ថា លោក​មិន​អាច​ទៅ​ចូល​រួម​បាន​ទេ ដោយសារ​តែ​លោក​មិន​សូវ​ស្រួល​ខ្លួន ៖ «ខ្ញុំ​មិន​សូវ​ស្រួល​ខ្លួន ហើយ​ខ្ញុំ​ក៏​ដូច​ជា​មិន​ទាន់​បាន​ឃើញ​សំបុត្រ​អី​ផង»

សុខ សេរី ៖ អ៊ីចឹង​គេ​អញ្ជើញ​ដែរ​ប៉ុន្តែ​លោក​មិន​អាច​ទៅ​បាន​អ៊ីចឹង​ទេ? ប៉ែន បញ្ញា ៖ វា​មិន​ចាំបាច់​តែ​ខ្ញុំ​ទៅ​ទេ មាន​សមាជិក​គណៈកម្មការ​៦-​៧​នាក់​ទៀត​ដែរ។

ប្រធាន​នៃ​អង្គការ​ការពារ​សិទ្ធិ​មនុស្ស​លីកាដូ លោកស្រី ពុង ឈីវកេក ដែល​កន្លង​មក​លោកស្រី​បាន​ចូល​រួម​ក្នុង​យុទ្ធនាការ​ប្រឆាំង​អំពើ​ពុករលួយ​នោះ បាន​មាន​ប្រសាសន៍​ថា ៖ «ដូចជា​សិង្ហបុរី​គេ​ធ្វើ​បាន​ល្អ ដូច្នេះ​ខ្ញុំ​សង្ឃឹម​ថា នៅ​បាងកក​នេះ ឯកឧត្ដម សុន ឆ័យ នឹង​បាន​ទាញ​នូវ​ការ​ពិសោធ​ល្អៗ​ដើម្បី​យក​មក​ដាក់​ចូល​ក្នុង​ពង្រាង​ច្បាប់​របស់​យើង»

ប្រទេស​កម្ពុជា​បាន​ចុះ​ហត្ថលេខា​និង​បាន​ផ្តល់​សច្ចាប័ន​លើ​សន្ធិសញ្ញា​នៃ​កិច្ច​ព្រមព្រៀង​របស់​អ.ស.ប ស្តី​ពី​ការ​ប្រឆាំង​អំពើ​ពុករលួយ​កន្លង​មក។

គណៈរដ្ឋមន្រ្តី​នៃ​រដ្ឋាភិបាល​កម្ពុជា កាល​ពី​ថៃ្ង​ទី​១១ ខែ​ឆ្នូ ឆ្នាំ​២០០៩​កន្លង​ទៅ បាន​អនុម័ត​លើ​សេចក្តី​ព្រាង​ច្បាប់​ប្រឆាំង​អំពើ​ពុករលួយ ដែល​សហគមន៍​ជាតិ​និង​ប្រទេស​ផ្តល់​ជំនួយ​អត្តរជាតិ​កំពុង​តែ​រង់ចាំ​រយៈពេល​១៦​ឆ្នាំ​មក​ហើយ តាំង​ពី​ឆ្នាំ​១៩៩៤​មក។

ប្រភព​នានា​បាន​និយាយ​ថា គេ​មិន​បាន​ដឹង​ប្រាដក​ទេ​ថា តើ​សេចក្តី​ព្រាង​ច្បាប់​នោះ​នឹង​ត្រូវ​បាន​សភា​ជាតិ​កម្ពុជា​នឹង​អនុម័ត​នៅ​ពេល​ណា​នៅ​ទ្បើយ​ទេ។

កាល​ពី​ឆ្នាំ​២០០៧​និង​ឆ្នាំ​២០០៨​កន្លង​ទៅ ក្រុម​សកម្មជន​ការពារ​សិទ្ធិ​មនុស្ស​ក្រៅ​រដ្ឋាភិបាល​ជា​ច្រើន​អង្គការ បាន​បើក​យុទ្ធនាការ​ព្រមៗ​គ្នា​ប្រមូល​ស្នាម​ផ្តិត​មេដៃ​ពី​ប្រជាពលរដ្ឋ​ខ្មែរ​នៅ​តាម​បណ្ដា​ខេត្ត​នានា​ទូទាំង​ប្រទេស​កម្ពុជា បាន​ចំនួន​ជាង​១​លាន​ស្នាម​មេដៃ ដើម្បី​ទទូច​សុំ​ឲ្យ​រដ្ឋាភិបាល​កម្ពុជា​ពន្លឿន​ការ​ធ្វើ​សេចក្តី​ព្រាង​ច្បាប់​និង​អនុម័ត​ច្បាប់​ប្រឆាំង​អំពើ​ពុករលួយ​នោះ​ឲ្យ​បាន​ឆាប់​តាម​តែ​អាច​ធ្វើ​ទៅ​បាន។

កន្លង​មក​មាន​សេចក្តី​រាយ​ការណ៍​និង​ការ​សា្រវជ្រាវ​រក​ឃើញ​ថា ប្រាក់​ចូល​រដ្ឋ​ជា​ច្រើន​រយ​លាន​ដុល្លារ​អាមេរិក​ត្រូវ​បាន​បាត់​បង់​ដោយសារ​អំពើ​ពុករលួយ​និង​ការ​ប្រព្រឹត្ត​ខុស​ច្បាប់ ព្រមទាំង​អំពើ​សូក​ប៉ាន់​ក្នុង​វិស័យ​ពាណិជ្ជកម្ម គយ​និង​តុលាការ ព្រម​ទាំង​វិស័យ​មួយ​ចំនួន​ទៀត៕

ព័ត៌មាន (0)
Share
គេហទំព័រ​ទាំងមូល